Read bassa JOB 29 Bible Online

JOB 29 - bassa bible

JOB 29

¹Go Job to tuhwulo tu n-ndumwa, bɛɛ hiɛŋ,

²I n kwụlanɛ maa tu'waba ti mi tu gwuri yebe maa tɛ shɛ gana aka ala Agwatana ta ma n 'yaka.

³AGWANGWAMA namɛ la ne mi na aka ata, baa ma m pana uhioko-uhwaŋna to Omo rungo ne tishi.

⁴Iyi ta ma n zhɛmanɛ la na aka ata, Agwatana jilanɛ la ihwɛ mi iwɛ tiyejilo ti mi nu bwa.

⁵Agwatana na Hwuri Kpaaŋ namɛ la ne mi na aka ata, maiụŋ mi mi mu mo n holongonu la hwɛɛ aba.

⁶Inɛ mi, ni iyweywe mi 'yajɛ la mosubo tebiye, i'wɛ'wɛ mi buta ya waŋna la na cɛnjɛ tu na ti 'yajɛ atayɛ uhwuri ofwo vwɛ hwɛɛ.

⁷Aka elele Ngee zhe la no odubo ụshɛpwụ ata, Ngaa jɛjɛ na ashashɛ n-nyarɛ,

⁸esemberi a vwula gwunu na ta a n kwụbɛ, n-nyarɛ ma ishajɛ mu ma m muna ụjɛrụma.

⁹Ehiu atwa ata a nama saiiŋ a ima onu aba.

¹⁰Okwo bụtụ na hwuri aŋ hwɛɛ, zhɛ ba ima ilɛmɛ, bi zha shɛ ba dumana iwɛ ye elele o.

¹¹Bụtụ be elele na n kwụbwa kwo kaa na hwugwa iwe mi, bi 'yajɛ iyi ibiye nɛ bɛɛ zhɛ ba duma iwɛ iyi nɛ Ngaa nduwa la.

¹²Ibɛ shɛ maa aka na okofwo a ugaga, Mo mbiyono aŋ; Omo mbiyono du miaụŋ-me-e'weteji mu na mu zasa geri na maa mu hwuri.

¹³Atwa na namɛ ne tiriri tebiye ma n shɛtana, Ngee mbiyeni du olulo maa e gwushiji ofwo na maa a swaka.

¹⁴Ma nda iyi mi ne tiririri, te teni cɛŋ ta zhɛmɛ, maa tiririri ti mi tɛ shɛ gana ureweni mu.

¹⁵Gamba la n shɛ eshe sholubo; Ngaa shɛ la ivwunɛ yo okwuturu.

¹⁶N shɛ la gana bishi bo kofwo; Ama nama na agaiŋ na ụbaụta jiteni.

¹⁷M bwereteji la ukpahiŋ wa atwa shimiaụŋ; Ngee lesheji atwa na aa ga 'imɛ.

¹⁸Ma nda la ashɛlatụ aka elele maa Ma ya uraiŋ te ilegeji, maa Mo 'wo ni ihwɛ mi na ti'ingatanga.

¹⁹N shɛ la gana ụ'wụ'wụ na tini tu bwa ti 'yajɛ meni aka elele, na du kaa a'walụ ubwa a 'wala cime aka elele.

²⁰Ụjɛrụma mu wa kaana la gu ugombo, ukpahiŋ mu kaa wa sha ufwo aka elele.

²¹Aka elele Ama pana la atwa ahaŋsa, a nama saiiŋ, a shɛlaga iyi nɛ Ama duma;

²²Aka Ngee hwuwi hwayɛ iwɛ mi tụdụma, asha i zasa bụtụ tɛ zhɛ ba 'yaga ya iyi inyɛ maa kaana o. N-ndumwa mi mi mo tonongo aŋ na shɛcɛbɛ,

²³bụtụ be elele ba lashɛga mụ, gana na afwashɛ a lashɛga eshilo ugbama.

²⁴Mu na hinga aŋ ilɛtu musɛɛ, aka elele na ta a zasa ya gana elele maa a njɛ. Ụpɛshɛka mu na ụ shɛ gu unyasa ubaba,[49] wa ta aŋ ikɛnyi.

²⁵N untanganɛ aŋ Ama haŋsagana aŋ iwɛ; N 'yagajɛ aŋ gana na agwuma a 'yagaga ejeshi ubwa; Ma ingatanga aŋ ni iyi iwɛ ye elele nɛ yo jitono aŋ.