Read bassa JOB 3 Bible Online

JOB 3 - bassa bible

JOB 3

¹Go Job ubwa kwuni n-ndumwa tụdụma, bee keleni ụjita na ee meci bu unu.

²Go Job hiɛŋ,

³Agwatana, kalana ụjita ata ee m meci la unu; kalana ụrụmɛ ata ee le la ofubo mi unu!

⁴Agwatana, jɛshɛrɛga uwaŋna ụjita ata maa ụ shɛ tishi. Te teyinje ya kwukwuŋ ụjita ata, to lono kwukwuŋ maa uhioko-uhwaŋna to nụ ụjita ata o.

⁵Nda uŋ maa ụ shɛ tishi zhuuŋ; urugono uŋ odomu, 'woricingo uwaŋna ubwa.

⁶'Woricingo ụrụmɛ ata na amɛ uywa ata, to lono maa a rɛcɛ uŋ ya o.

⁷Nda maa ụrụmɛ ata ụ shɛ gana bu'ulo, kede a hwụjɛ n'ungwa mu unyasa nu bwa kwukwuŋ.

⁸Mbiso ashɛjɛ maa ge keleni ụjita ata unu, aba shɛ atwa na mepi ta a 'yagaga buduwo.[7]

⁹Kede ikpɛsu ya aasavwungwa to; kede du kaa iyi heri nụ ụjita ata o.

¹⁰Kalana ụjita ata unu iwɛnɛ tu wee leni maa e m meci, maa mu na nda ụbaụta keeni ụngwụ-tuhwuga.

¹¹I ga ma n kwulana maa go mo 'wo la taa na amɛ bino mi; kwo kaa gunu na te e m meci la.

¹²Iwembe kwuŋ po bino mi n 'waŋnɛ la no n'unto mu bwaa? Iwembe kwuŋ po bee m peni la mosubo mu bwaa?

¹³Yaa shɛ Ngee nge 'wi la taa na aka ata, asha N namɛ hwayɛ nụ ụhinjanụ,

¹⁴Omo woto gana shɛgwuma keeni a'yagajɛ a na meeneni nhwaŋ ma shɛgwuma sha ala shɛ cala.

¹⁵Nazhɛ Ngɛɛ ngɛ zhɛ mu no woto gana miaụŋ mu tugwama mu na mi shidenji shimwono sha aba na azhɛnarɛya keeni azụrụfa.

¹⁶Kwo kaa maa mu no woto gana yɛu nɛ ee te meci shi.

¹⁷Okwo ogworozwo, a njɛ shɛ ya iwɛwɛ ne e'uye o, atwa na kaa lukwumi nu ugondu, a ta ya ụhinjanụ.

¹⁸Okwo yaa shɛ ajama a na zweni nu umwono-tishi, a 'yaga amɛ-olom, aa banangana tɛtazhagaganɛ keeni tɛnda gbezhe gbezhe.

¹⁹Bụtụ be elele na namɛ apata, ta atwa na beni urishi, ta atwa na atwa mepi shi, na aka umɛwɛɛ ajama kaa zhɛ a banangana ni i'ɛlɛ ya agwuma-ihwɛ aba.

²⁰Iwembe kwuŋ po ebi leni maa ga atwa na ya uraiŋ ụ shɛbaraa? Iwembe po aba pana atwa na a hwuga-ụngwụ uhioko-uhwaŋnaa?

²¹A shɛlana tu'wo, ama e'wi shi kaa o; u'uye debegeni aŋ uhwuri uduciya we elele.

²²A zasa amɛ-olom, semi aka na ee 'wi, ee ni aŋ;

²³Agwatana sweci geri beshe aba, bee uregegeni iyi ya aba ye elele.

²⁴Ụlụkpashɛ we ebe maa Mu na ya iyimɛyɛ, ibɛ gɛnɛnɛ Ama ta ya ụkwụla; N eri shi kaa ma ganga ti'nyongo.

²⁵Iyi elele nɛ Ama nda inyɛsɛ ibɛ, inɛɛ nɛ kaa uriri ibɛ ma n sha, ibɛ mo vwutongono ya.

²⁶N zasa amɛ-olom, N zasa kaa ụhinjanụ o, ụbaụta mu kaa zasa ukwunanga o.