Read bassa JOB 30 Bible Online

JOB 30 - bassa bible

JOB 30

¹Ama hwuwayɛ go atwa na n ci shi tusara ma n nda ya asada! Eshi aba lanɛ shɛ la maa e mbiyeni okwo shiwawa, na agwụdụ mi tungbaraka o.

²Ule imbe Ngɛɛ tɛ zhɛ ma ya ni i'ɛlɛ ya atwa na ukpahiŋ wa aba hwuwowoo?

³A shɛ okofwo a'wụtụ, anaa na imunɛ ya kwụna, harɛ aa ya ụhwụla nụ ụjita na cɛnjɛ tu hwoo, no ofwo na atwa zasaba.

⁴O mushongo iyi nɛ shikekeni ne ehilo, aa ya, ti ishiwɛ nɛ shikekeni inɛɛ nɛ kaa lacɛmɛ shɛ tiya kwukwuŋ!

⁵Nu n'ungwa ibɛ atwa o unzo aŋ maa e beni na ashashɛ atwa, gana atwa na o unzo ozundo.

⁶Na apangwụ aa nama, keeni a'ibwa na namɛ no tuhwolu ta aparatayɛ.

⁷A na ugaga ne ehilo gana isundɛ ehilo, oo momo tonu oo ubogono no okokoto tuka.

⁸E becinji atwa na zasa uhwara we elele a na kaa du ee mepi shi na cɛnjɛ tu ga.

⁹A zhajɛ ya hwuwayɛ go aa ma n hinga ilɛtu; N shanɛ shɛ aŋ ya iyi elele o, semi iyi ya asada kiri Ngaa shanɛ aŋ.

¹⁰Gamba aa ngbaracɛ cwɛŋ bana, e heŋshi maa a zhɛmɛ ee n hwuri duwa; aa zhajɛ du oo mo zwogono mecemi ne eshe.

¹¹Iwɛnɛ Agwatana n lwogwocenji, Ngee eri shi ti'ishijɛ, ibɛ po aa ma n sukakana ni isɛbwɛ ya aba ti'ishijɛ.

¹²Atwa ga ma n sukakana ti geri-be-eshe; ee m biteni modugwulo nu uhwaŋna; ee n hweri oo rungwutwonu.

¹³E kepi ofwo na Ngee ngee eri mo dulo maa ma banangana, aa jala maa a n njɛ ufwu, i zasa kaa bụtụ namba maa ba lakana aŋ o.[50]

¹⁴E dure ofwo na ijilɛni mi haŋpɛ, ee teni sururu; ibɛ po aa zhajɛ ee n ubi, aa jala maa e m bwereteji.

¹⁵Tiriri ti n iri ya; iyi nɛ i n zhɛmanɛ la hwulwo gana uvwugo, urishi mu na Ngee beni la hwulwo du gana udomu.

¹⁶N gwumwonu ga tu'wo; ụbaụta mu kaa lacɛ tuhwuwowu.

¹⁷Aka na ụjita shi hwɛɛ, to o'umpwo mi na ma gwumanga. Ụngwụ na mo n cwomwo lacɛ tuhwuwowu.

¹⁸Agwatana zukpanɛ i'ilu idikɛ mi, baa njɛ idikɛ mi kwanya kwanya.

¹⁹Ubwa n keri nu udwodwo, Ngaa shɛ ya gana upwupwutu keeni ma'alụ.

²⁰Oo Agwatana,[51] M bu suyanɛ, ama bu n jɛshɛjɛ shɛ o; aka na Ngaa njɛ adua no ofwo bu, bu 'wa sụ iwe mi o.

²¹Bu n bwɛjɛ mazhanga; abu n sukakanɛ nu ukpahiŋ bụ.

²²Ebi leni maa uvwugo n suji, abu ma m pagana na cɛnjɛ nu uvwugo ata ụ'wụtụ.

²³M mepi maa bi zhɛ bu ma shapa no ofwo tu'wo, tuba tɛ shɛ iyi nɛ zhɛ yo jitono bụtụ be elele.

²⁴Iwembe po abu ta sukakanɛ bụtụ na aa lasawaa? Bụtụ na eri shi ba nda ya iyi elele, semi maa ba lụpa maa e hieci inyɛmɛnyɛmɛ ibwɛ kiri.

²⁵N cwɛŋ shɛ la suu u'wo na atwa na namɛ nụ ụbaụta? Amɛ mi a hashɛganụ iwɛ atwa na shɛ okofwo.

²⁶Ma nda ashɛlatụ unyasa keeni uhioko-uhwaŋna, ama ụbaụta keeni tishi, ibɛ n temi ya.

²⁷Oruwo nụ ụngwụ-tuhwuga n eŋsetenji; ụbaụta mu wa kaana ugombo iyi-heri.

²⁸Mo rungo ne tishi uzawa uhioko-uhwaŋna uwaŋna; Ngee shikeni nu ufwugwo Ama lụpa maa e m mbiyeni.

²⁹N shɛ ya gana batagwụ ba Aka, Ngaa shɛ bụtụ na namɛ na ashashɛ Ozhikwukwu. Ama kala n'ungwa ma amɛ-tụhaŋtụ, na rụhwụŋ rụ 'wụtụ.

³⁰Tu'waba ti mi tɛ jɛshɛrɛjɛ taa shɛ ti shi; Ụngwụ mpiala tisha wo hwoŋzhongo tu'waba ti mi.

³¹Ofwo na Ama hwuga la i'nyemi 'nyemi keeni ihwure hwure unyasa, apata shɛ ya ofwo ụkwụla-tuta keeni u'wo-tutwa gboo.