Read bassa JOB 31 Bible Online

JOB 31 - bassa bible

JOB 31

¹N shiri-unu ta 'yajɛ ikɛnyi maa, N zha shɛ ma ngbaraka yɛu-yo-o nu ukwekeyi ụwɛ o.

²Imbe kwuŋ Agwatana na Hwuri Kpaaŋ utu ndanɛɛ? Gana na baa tụpa butugwumwa iyi nɛ baa njɛɛ?

³Ubwa ba tumwananɛ atwa na 'wanjɛ ufwu tɛnda, baa tumwananɛ ogworozwo abara-ne-ebe.

⁴Agwatana mepi iyi elele nɛ Ama nda; baa kwụbɛ kaa uvwuna we elele na Ngee shepi.

⁵N to-tuwa maa N ta njɛ shɛ tugworozwo; N te helekeci shi du kaa atwa vwɛ o.

⁶Ga Agwatana m menji ne bimenji bi tiririri, nazhɛ bɛɛ zhɛ ba kwụba maa N zasa tụwụma o.

⁷Yaa shɛ Ngaa vwụrɛ Ngee genji uhwaŋna na teni cɛŋ, kwo kaa Ngee leni maa iyi iwɛ i n helekeci, yaa shɛ iwɛwɛ njɛ i'ɛlɛ mi tiri,

⁸asha ga iyimɛyɛ mi izɛgwu i njɛ ufwu, kwo kaa ga anya atwa yɛ iyimɛyɛ nɛ Ngaa hwɛŋ.

⁹Yaa shɛ Ngaa njɛ ukwedeyi biyikwo bu uyebi mu, kwo kaa Ngee zhe Ngaa swacɛ Ngaa 'yacɛ bụ no odubo ubwa,

¹⁰asha ge biyikwo mi ndanɛ binya bụtụ tiyikwo, maa anya atwa du woto nu bwa.

¹¹Ga ajɛmɛ-ụshɛrɛya peni bụtụ na njɛ iwɛwɛ tugworozwo gɛnɛ ɛtɛ ulwapɛ.

¹²I zhɛ ya sha gana ulwa na wo hwoŋzhingo iyi, na wa nda iyi ufwu, maa u hwoŋzhinji iyi elele nɛ Ngaa 'yajɛ.

¹³Yaa shɛ Ngaa ngbaracɛ yɛu-ugondu mu ye eyi keeni inɛ yo o cwɛŋ, na aka na ta a n 'waŋnanɛ usweji-unu wa aba,

¹⁴asha gana naa Ngɛɛ zhɛ ma nda ta Agwatana n zhaganɛɛ? Yaa shɛ bee n heŋteni iwɛ ibɛ, gana naa Ngɛɛ zhɛ mɛ jishijɛ bụụ?

¹⁵Agwatana ata n karɛ, ubwa kaa du karɛ miaụŋ-mu-ugondu mu.

¹⁶N ta lacɛ shɛ maa mo mbiyono okofwo kwukwuŋ; N te leni shi du kaa maa ụpụrụsa 'imɛ olulo kwukwuŋ.

¹⁷Kwo kaa maa Mo lono maa imunɛ kwụnɛ miaụŋ-me-e'weteji tu Ngaa 'yajɛ iyimɛyɛ Ama ya o.

¹⁸Taa na cɛnɛnɛ tu bwa, Ngɛɛ wɛŋnicinjɛ bụ gana te bishi mi. Gamba kaa mo mbisono bu uhwaŋna te kwune ni igwune i tumata i bino bwa.[52]

¹⁹Yaa shɛ Ngaa kwụbɛ bụtụ na ukekeshi wa nda, keeni bukofwo na eri shi ba sa tugwuno maa urugono,

²⁰Ma pana bu tugwuno tu na aa nɛ ne tihiŋzhe ta agwụdụ mi. Nazhɛ bu ma dumanga na amɛ ubwa oko hwɛɛ.

²¹Yaa shɛ Ngaa yɛwa yɛu-bu'weteji imwere, iwɛnɛ Ngee mepi maa n-ndumwa eri ma n zhɛma na agba ụshɛrɛya,

²²asha ga u'ala mu dwonu; ga ụ sashɛngwa nu ututu mu.

²³Iwɛnɛ po Ma nda inyɛsɛ ulwapɛ wa Agwatana, N eri shi kwukwuŋ Ma nda iyi gɛnɛ ɛtɛ, iwɛ maa abara-ne-ebe Agwatana no mo n holono.

²⁴M patanɛ shɛ uzhɛgba rishe o.

²⁵N zasa du kaa tubusa iwɛ uduciya mu o.

²⁶N ta zhɛbɛ shɛ uwaŋna iwɛnɛ tu woo vwo, kwo kaa upiana iwɛnɛ tu waa pilanụ tebiye o.

²⁷A ta ma inzhɛnjɛ shɛ maa Ma zhɛba iŋ, kwo kaa maa Mo sugono iŋ i'ɛlɛ mi na azuba maa Ma pana iŋ ụjɛrụma o.

²⁸Iwɛwɛ gɛnɛ ɛtɛ shɛ aa pana ulwapɛ no tu'wo; ashamanjɛ Agwatana na Hwuri Kpaaŋ tutala yaa shɛ.

²⁹N ta njɛ shɛ unyasa na aka na tụ ụbaụta vwuteni atwa i'ime mi kwukwuŋ, kwo kaa maa amɛ mi lemi aka na ti iyi iwɛ jiteni aŋ o.

³⁰N ta njɛ shɛ du kaa iwɛwɛ na adua tɛnda maa Ma kalana aŋ unu kwukwuŋ.

³¹Atwa na n ndwanua ugondu mepi maa, Ma biga agaiŋ aka elele.

³²Ma suyanɛ ezhe-tahaŋnụ ni ihwɛ mi, N leni shi maa o woto nu ukpekiti ụshɛpwụ o.

³³Atwa vwɛ a makana iwɛwɛ ya aba tuswaka ama N te sweci shi inee mi kwukwuŋ.

³⁴N ta njɛ shɛ kwukwuŋ inyɛsɛ iwɛ iyi nɛ atwa zhɛ a duma o; N ta zasa kaa saiiŋ kwo kaa maa Mo shiyono nu umwono, iwɛnɛ Ama nda inyɛsɛ ya asada aba o.

³⁵Asha i zasa ree bụtụ zhɛ ba shɛlaga iyi nɛ Ama duma? N to-tuwa maa iyi elele nɛ Ama duma, i shɛ iwɛ-tɛkana; Ga Agwatana na Hwuri Kpaaŋ n jishijɛ. Yaa shɛ ee ge 'nyeci iyi nɛ atwa ga ma n sukakana ni ibɛ maa Ma kwụba,

³⁶N ngɛ zhɛ ma patana iŋ no shitutu shi mi mu na busa; N ngɛ zhɛ ma patana iŋ nu uhiuhiu mu gana udara.

³⁷N zhɛ Me swegeni Agwatana iyi elele nɛ Ngaa nduwa, maa Mo shikicingo uhiuhiu mu na agba ubwa.

³⁸Yaa shɛ izunde Ngee zunji cɛnjɛ tu na Ama hwaŋ itimɛ, yaa shɛ tɛlashɛga Ngee leshiji tu ni i'ɛlɛ ya agwuma tuba,

³⁹yaa shɛ kaa Ngaa yɛwa iyimɛyɛ nɛ waŋnɛ na tuba, iwɛ maa afwashɛ na hwɛŋ iŋ tuba yɛ imunɛ,

⁴⁰asha tụlụkpashɛ tu na maa ohiu, nu ushɛkapa waŋnɛ ni ibɛ, asha ga shɛ tu'unto no okolokwu-shɛngala leshegeji iŋ. N-ndumwa mu Job mu hwuwowu.