Read bassa JOB 32 Bible Online

JOB 32 - bassa bible

JOB 32

¹Iwɛnɛ tu go Job mepi gom maa n-ndumwa mɛ zhɛmɛ bụ na ahaŋsa ubwa, ibɛ po atwa ata atatụ jɛshɛjɛ shɛ bụ ya.

²Ama bụtụ bu ko na ɛɛ hiɛŋ ge Elihu, yɛu-ye-eyi Barakɛl, na shɛ Bubuz, nu umwamwa Ram na shikeni dashɛ. Bi eri shi ba ima-isɛbwɛ, iwɛnɛ tu go Job mama pana n-ndumwa-zhɛ, baa pana tuba Agwatana n-ndumwa-tụwụmao.

³Amɛ ubwa du hashɛganụ ne eyejilo ata Job atatụ. A zasa ya kaa ajɛshɛgwa elele maa e peni Job o, iwɛbɛ po yaa shɛ maa Agwatana[53] 'wanjɛ.

⁴Iwɛnɛ ti ge Elihu shɛ yɛu na ashashɛ aba, ibɛpo baa 'yacɛ maa e hwuwi tugwo mu na aba n-ndumwa tụdụma hwɛɛ.

⁵Aka na tu baa kwụbɛ maa atwa ata atatụ eri shi ɛ jishijɛ ya Job o, iwɛbɛ po amɛ ubwa hashɛganụ;

⁶nazhɛ bee kwuni ya mu na bwa n-ndumwa tụdụma. Bɛɛ hiɛŋ, N ta shɛ usemberi, ahiɛ shɛ kaa n-nyarɛ, iwɛbɛ po inyɛsɛ i n shɛ maa Mo hi mbiso iyi nɛ Ngee heŋshi.

⁷Nazhɛ Ngɛɛ mɛmɛ hiɛŋ, N shɛ ma dumana iwɛ, iwɛ maa ahiɛba na hiɛ shɛ n-nyarɛ, maa hi bwɛ du ti'inta ti hiŋ.

⁸Ama mpiala ma Agwatana na Hwuri Kpaaŋ, ma zhajɛ pa atwa, maa pana aŋ ti'inta.

⁹Shɛ ti'inga ta nda maa bụtụ incɛ o, kwo kaa maa bụtụ mepi iyi nɛ teni cɛŋ o.

¹⁰Hwuwayɛ go Ma jala maa hi shɛlaga iwɛ mi. Me ci ba me hi mbiso iyi nɛ Ngee heŋshi.

¹¹N namɛ saiiŋ Ngaa shɛlajɛ aka na ahia njɛ n-ndumwa; Ngaa ngbaracɛ ta ahia dwalakaka n-ndumwa mi ti'inta.

¹²M peni abashɛ, Ngaa hwụjɛ ofwo na ahiɛ njɛ ụsasụ; hi ta lacɛ shɛ iyi nɛ go Job jɛmɛ o.

¹³Gana naa ehi eri hiɛ hiɛŋ maa hi towo ti'inta ugbee? Agwatana zhɛ ɛ jishijɛ Job, iwɛnɛ ehi loywogwogwo ahiɛ njɛ ụsasụ.

¹⁴Ne hiŋ go Job ba njɛ, shɛ ne mi o, ama N zha shɛ tuba mɛ jishijɛ bụ gana hiŋ o.

¹⁵O-Job, n-ndumwa mụ bụ mu po aŋ na cɛnjɛ; a zasa ajɛshɛgwa elele maa e bi peni o.

¹⁶Ma 'yaka aŋ wa suu ta a namɛ shiruu? E shikekeni ya kaa apata, a zasa iyi elele maa a jɛmɛ o.

¹⁷Awo, N zhɛ ma pana ajɛshɛgwa mi, maa Mo bu mbiso du iyi nɛ Ngee heŋshi.

¹⁸N eri shi ma ima ya isɛbwɛ o; ahaŋsa mi ma n tɛtaga maa Ma dumana iwɛ.

¹⁹Yaa shɛ Ngaa zasa ohwolu maa Ma duma n-ndumwa, asha N zhɛ mo pwuswo gana okoko na ee zweni mayaga mu ufwo.

²⁰I shɛ tilɛɛ maa Ma dumana iwɛ maa Ma hwungwa, N zhɛ mɛ kɛpishinjɛ unu mu maa Ma pana ajɛshɛgwa.

²¹I zasa bụtụ Ngɛɛ zhɛ ma nama nu bwa na ashamanjɛ ga o; i zasa kaa bụtụ be elele Ngɛɛ zhɛ ma dumangana unu-ụlatụ o.

²²N 'ye shi du ta a dumangana bụtụ unu-ụlatụ o, yaa shɛ Ngaa dumanganɛ bụtụ unu-ụlatụ, asha Agwatana zhɛ ma m pana ulwapɛ kakayɛ.