Read bassa JOB 34 Bible Online

JOB 34 - bassa bible

JOB 34

¹Ge Elihu hiɛŋ,

²Ahiɛba atwa ti'inta, shɛlaga ma n-ndumwa mi mi. Shɛlaga ma n-ndumwa mi mi, ahiɛba na hi mepi iyi.

³Ụcɛbɛ wa hwuga n-ndumwa, gana na ta bụratụ ba hwungana iyimɛyɛ.

⁴Mizha ti heŋshi ma iyi nɛ zhɛmɛ keeni iyi nɛ teni cɛŋ ni ikɛnyi tu.

⁵Go Job hiɛŋ maa n-ndumwa mɛ zhɛmɛ bụ, Agwatana lacɛ maa dumangana bụ ụshɛrɛya u tishiriri.

⁶Bɛɛ hiɛŋ, Iwembe po Ngɛɛ zhɛ ma dwa-ụzagwụ maa mɛ hiɛŋ maa N 'wanjɛɛ? A n gwụcɛnjɛ tebiye, i zasa kaa iwɛwɛ ye elele nɛ Ngaa njɛ o.

⁷Hiɛ kwụbwa kwukwuŋ bụtụ na shɛ gana ga Job hŋ? Bu mụnɛ shɛ Agwatana ụjɛrụma o.

⁸I kwụlanɛ bụ maa bu na nda iyi na atwa ci'nyɛ, boo rungo na atwa iwɛwɛ.

⁹Bɛɛ hiɛŋ, Ukwulana wa Agwatana tɛnda zasana butugwumwa ule we elele o.

¹⁰Ahiɛba atwa na eshiciji iyi, shɛlaga ma iwe mi, Agwatana na Hwuri Kpaaŋ suu eri a nda iyi tugworozwo? Ge iyi iwɛ tɛnda dụlụmɛ no olugwo ubwa.

¹¹Ubwa ba tụpa atwa iyi nɛ aa njɛ, baa nda aŋ te teni cɛŋ nu gana na ga shɛ maa a njɛ aŋ.

¹²Iwɛ-tɛkana maa Agwatana na Hwuri Kpaaŋ njɛ shɛ iyi tugworozwo kwukwuŋ.

¹³Bi zha shɛ kaa du bo ubo ụshɛrɛya u tishiriri kwukwuŋ. I 'yajɛ suu bụtụ peni Agwatana ukpahiŋ? Bụtụ suu teri bu maa ga untangana unyizo kpaaŋ?

¹⁴Yaa shɛ Agwatana leshiji ihwungwɛ[56] nɛ atwa a hwungwa,

¹⁵asha bụtụ be elele na namɛ nu unyizo zhɛ bo 'wo, bɛɛ zhɛ kaa bo gwulo nu upwupwutu sasana.

¹⁶Yaa shɛ abɛ incɛ, asha shɛlaga n-ndumwa mi mi.

¹⁷Bụtụ na bo imo ụshɛrɛya u tishiriri tụdụma suu eri ba untangana ofwo? Bi zhɛ suu ba pana Agwatana tiririri na kaa Hwuri Kpaaŋ n-ndumwa-tụwụma?

¹⁸Agwatana ubwa ba pana shɛgwuma keeni a'yagajɛ n-ndumwa-tụwụma; na aka na te e teni shi cɛŋ kwo kaa aa njɛ tugworozwo.

¹⁹Bu zasa na shɛgwuma keeni azhɛgba a na a sukakana okofwo; iwɛnɛ po ubwa karɛ aŋ hwɛɛ aba.

²⁰Bụtụ eri bo 'wo nụ ụjita eshigiri. Agwatana ubwa ba pa atwa iyi, ibɛ po aa nda ufwu; ubwa ba kwụna atwa na 'yajɛ ukpahiŋ uzawa i'ɛlɛ butugwumwa be elele.

²¹Agwatana a ngbaraka iyi elele nɛ atwa a nda keeni uvwuna we elele na atwa a shapa.

²²I zasa tishi tu na tu waŋnɛ maa tu sweci bụtụ bi iwɛwɛ maa kede Agwatana kwụbɛ bu o.

²³Utakashɛ te shi Agwatana maa shilono aŋ aka na shɛ maa duma ụshɛrɛya wa aba o.

²⁴Utakashɛ iyi tuhwoyigono te shi bu nazhɛ bacɛnga a'yagajɛ maa zwono anya atwa no ohwolu aba o.

²⁵Iwɛnɛ po bu mwopwo iyi nɛ aa njɛ; iwɛbɛ po ba bizhanga aŋ, baa bwarataga aŋ nụ ụjita.

²⁶Ubwa ba pana aŋ ulwapɛ iwɛ tugworozwo ta aba, no ofwo na atwa kpaaŋ eri a kwụba aŋ,

²⁷iwɛnɛ te e genji bu tu'wa; aa 'wa sụ unu ubwa tụpana.

²⁸A nda okofwo iji maa a ugananɛ Agwatana, Agwatana kaa a hwuga n'ungwa ma aba mu na aa ugaga maa mbiyono aŋ.

²⁹Yaa shɛ Agwatana heŋshi shi maa nda iyi elele, asha i zasa bụtụ eri ba dumangana bụ n-ndumwa me elele o. Yaa shɛ kaa baa intanɛ ụpɛshɛka ubwa, asha i zasa bụtụ na eri ba kwụba bu o, okwo yaa shɛ udenji mudu baa njɛ iŋ kwo kaa bụtụ mokondo.

³⁰I zasa iyi elele nɛ edenji zhɛ a ala tɛnda maa kede atwa ga mepi shi Agwatana, a na a nda aŋ tuhwulo na untangana aŋ o.

³¹O-Job, bu lwonuo-unu iwɛwɛ bu no ofwo Agwatana maa shileni bu unu maa bi zha shɛ ba nda ya iwɛwɛ hŋ?

³²Bu lụpwa Agwatana maa, M mbiseni ụsasụ mu hŋ? Bi leni tuba maa genji ya iyi iwɛ tɛnda kaa?

³³Ta abu lacɛ bana iyi nɛ Agwatana njɛ, bi eri tuba ba 'yaka bụ maa nda iyi nɛ aba jala kaa? Tuhaŋsa tɛ shɛ ma tụ bụ, shɛ me ti mi o. Iti mbishi ya hwuwayɛ go, iyi nɛ ebi heŋshi.

³⁴Atwa elele na eshiciji iyi keeni atwa elele na incɛ, a na hwụjɛ n-ndumwa mi mi, ɛ zhɛ ɛ hiɛŋ,

³⁵Go Job ba duma n-ndumwa no tugbodu; i zasa kaa iyi elele nɛ baa jɛmɛ i shɛ iyi tandụ o.

³⁶Haŋsa iyi nɛ go Job jɛmɛ; bi zhɛ ba kwụba maa bɛ jishijɛ n-ndumwa gana ogworozwo.

³⁷Tigezhe tu bwa ta kaana iwɛwɛ ibwɛ ugombo ne eshe tu hwɛɛ, boo puso i'ɛlɛ baa kaana Agwatana n-ndumwa mụ wɛ tudumangana.