Read bassa JOB 35 Bible Online

JOB 35 - bassa bible

JOB 35

¹Nazhɛ ge Elihu hiɛŋ,

²O-Job, bi heŋshi suu maa bi teni cɛŋ? Bi hiɛŋ suu Agwatana zhɛ ma bụ pana n-ndumwa-zhɛ?[57]

³Okwo bi zhɛ suu bo hoŋtono Agwatana maa, Imbe kwuŋ shɛ ule mu, kwo kaa imbe tuba shɛ titeni ti mi tu Ngaa njɛ shɛ iwɛwɛɛ?

⁴N zhɛ mɛ bi jishijɛ te eyejilo bu du hwɛɛ.

⁵Mbiyana tụla! Kwụba gana na to odomu dụlụmɛ na bụ!

⁶Yaa shɛ abɛ njɛ iwɛwɛ, imbe yɛɛ zhɛ ya nda Agwatanaa? Okwo ebu bweji undwa kpalụ gembi ufwugwo, i 'yajɛ suu iyi elele nɛ zhɛ ya nda bụ?

⁷Yaa shɛ abɛ shɛ bụtụ bi tiririri, asha imbe ebi mbiyeni Agwatana ni ibɛɛ? Okwo i 'yajɛ suu iyi elele nɛ ukekeshi ibɛ to Agwatana no olugwo bu?

⁸Atwa vwɛ a na iwɛ iwɛwɛ bu to, aba du a ya ule tiririri ti iyi nɛ aba nda.

⁹Aka na aa nda atwa tuhwulo, o no 'nyongo; a na ugaga maa bụtụ bu ko zhajɛ maa mbiyono aŋ.

¹⁰I zasa kaa bụtụ okwo bu ko na hiɛŋ, Cee Agwatana na n karɛ, ubwa na ma m pana amɛ-olom okwo nụ ụjita, na aka bụ ụbaụta mu namɛɛ?

¹¹E zhegeni shi Agwatana na mo tu mbisogono iyi maa ta inta, uhwuri usunda ehilo kwo kaa shanụnụ she elele o.

¹²A ugaga maa e mbiyeni aŋ, ama Agwatana kaa jɛshɛjɛ shɛ aŋ o, iwɛnɛ ta a busa, aa shɛ kaa atwa tugworozwo.

¹³Iwɛ-tɛkana maa Agwatana hwụjɛ shɛ n'ungwa ma aba mu tugadaga o; Agwatana na Hwuri Kpaaŋ kaa peni shi abashɛ iwɛ n'ungwa ma aba o.

¹⁴O-Job, bi hiɛŋ ree maa bi eri shi ba kwụba Agwatana o; no ofwo ubwa kaa ụshɛrɛya bụ namɛ, asha bɛ shɛ ba ima-isɛbwɛ maa shɛlana bụ tilɛɛ.

¹⁵Bi heŋshi maa Agwatana peni shi bụtụ ulwapɛ o, maa ubwa 'wa sụ du iwɛ iwɛwɛ kpororo.

¹⁶N-ndumwa mu na abu uranjɛ tụdụma, mɛ shɛ iwɛ tɛgadaga. I shiri ya caakwụ maa bi mepi shi iyi nɛ aba duma o.