Read bassa JOB 37 Bible Online

JOB 37 - bassa bible

JOB 37

¹Uto wa nda maa ohwulu na ma nda bwuu bwuu.

²Shɛlaga ma rụhwụŋ ra Agwatana hwɛɛ hiŋ, hwulaga ma uto na banɛ nu unu ubwa.

³Ba nda maa ɛbɛrɛ na baga tụla, te kwuni nu umokwuno mɛ cɛnjɛ uuwa ici uce tuba.

⁴Na aba na ta a hwugwa rụhwụŋ ru n'ungwa, tedure nu uto ata ụ shɛ rụhwụŋ ri igɛhi ibwɛ, bi zha shɛ kaa bo gwuricingo ru ya o.

⁵Tedure nu unu-tupana wa Agwatana, ibɛ po iyi tudama ya ndangana, ti iyi ya arụhwajɛ nɛ eti eri shi to eshicigo.

⁶Ubwa ba pana atayɛ-eshilo unu maa ga a na 'waŋ na cɛnjɛ, ubwa kaa ba nda maa eshilo no ngbo, tɛ ɛgbɛrɛshɛ, ta bu na bụ 'wụtụ.

⁷Ubwa ba nda maa bụtụ be elele genji ugondu tɛnda;[60] boo mbisono aŋ maa e mepi maa ubwa ba nda iŋ.

⁸Isundɛ ye ehilo yo tonongo na a'ibwa aba maa o zwono apata.

⁹Ujipo wa banɛ tuta, ugbofworo tuba wa banɛ tuzuba.

¹⁰Ihwungwɛ ya Agwatana ibɛ yo hwulupono meni, ibɛ po moo 'wo moo hwotono kakarakwụ gana utayɛ.

¹¹Ubwa togotogwu meni bee zweni mu no odomu, ubwa kaa ba baga tụla nɛ ɛbɛrɛ.

¹²Ubwa bo sokokono iŋ gana na maa i no rungo no ofwo elele na unyizo teje, maa i na nda iyi elele nɛ bee peni iŋ unu.

¹³Agwatana ubwa bo lomicingo unyizo ne eshilo; bee eri kaa du ba pana atwa ulwapɛ ne eshilo; kwo kaa maa mbisono aŋ tulubo tu bwa.

¹⁴O-Job, nda de zhiiŋ maa shɛlaga; haŋsa de iwɛ iyi ya arụhwajɛ nɛ Agwatana a nda.

¹⁵Bi mepi hŋ gana na Agwatana a pana iŋ unu, nazhɛ ɛbɛrɛ a nda na tụla?

¹⁶Bi mepi suu gana na odomu a fwunga na tụla, keeni iyi tudama nɛ Agwatana a nda ni iyi ibwɛ tumapa nɛ ulwa nụ ụzhɛ?

¹⁷Awo, oholobwo kiri aba hwuga na aka na tu mpiala ma banɛ tuta maa mu vwengicinji cɛnjɛ.

¹⁸Bi eri hŋ bo mbiyono Agwatana tụla tubarɛshɛga maa tɛ shɛ gana irɛtɛ ụshɛmbɛrɛ?

¹⁹Iti mbisegeni iyi nɛ shɛ maa tɛ hiɛŋ Agwatana; shihaŋsa shi tu shi libegeni, tu zasa iyi elele nɛ maa ta duma o.

²⁰A lụpa hwuŋ suu maa ma jala maa ma duma n-ndumwa na Agwatana? I 'yajɛ suu bụtụ be elele ba jala maa a njɛ bụ ufwu?

²¹Uhioko-uhwaŋna uwaŋna wa ta raawụụ na tụla, aka elele na tu uvwugo suji odomu na tụla, tụraawụụ tu uhioko-uhwaŋna ata to hwulogo maa bụtụ mbiyanɛ uŋ.

²²Ụzalụ tuzuba wa sha gana azhɛnarɛya na a ta, ibɛ po igɛhi ụjɛrụma wa Agwatana mo tu zwono inyɛsɛ.

²³Ukpahiŋ wa Agwatana hwuleji maa to gwumwonu nu bwa; ubwa ba nda iyi ne tiririri, baa duma ụshɛrɛya wa atwa ne tishiriri; bi zha shɛ ba nda atwa umungwuta o.

²⁴Iwɛbɛ po bụtụ be elele ba nda inyɛsɛ ibwɛ, iwɛnɛ tu baa 'wa sụ iwɛ atwa na hiɛŋ maa a incɛ na shɛmɛ sha aba.