Read bassa JOB 9 Bible Online

JOB 9 - bassa bible

JOB 9

¹Go Job jishijɛ bụ, bɛɛ hiɛŋ,

²Iwɛ-tɛkana, M mepi gana ata gom. Ama gana naa tuba n-ndumwa mi eri ma zhɛma bụtụ na agba Agwatanaa?

³Gana naa bụtụ eri ba nda ashamanjɛ nu bwaa? Ubwa eri bo hoŋtono Iheŋtene i ci akpakwụ-a-ta (1,000) nɛ kaa zasa bụtụ na eri ba pana bụ ajɛshɛgwa ibɛ kwukwuŋ okwo oko.

⁴Agwatana incɛ tebiye, baa 'yajɛ kaa ukpahiŋ duwa; i zasa bụtụ be elele na eri ba sukakana bụ, yɛɛ zhɛ ya 'yagana bu eshe o.

⁵Ubwa bo mushongo nshama eshigiri, baa nda mu ufwu ni isɛbwɛ ibwɛ.

⁶Agwatana o zhingoto cɛnjɛ; boo zhingoto du aparatayɛ a na shɛ atukpa unyizo.

⁷Ubwa eri ba nda maa kede uwaŋna banɛ o, ubwa du eri ba nda maa kede mkpasu mu to nụ ụjita o.

⁸I zasa bụtụ mbiyeni Agwatana azuba tubarɛshɛga o, i zasa kaa du bụtụ bo mbiyono bu adanga itekwu[10] turukoto.

⁹Agwatana ubwa njɛ ayiwale, ti ikpɛsu ɛtɛ i'wɛtwɛ namɛ tuzuba, ta ajalagashiwawa, tu mkpasu mu ụzalụ tuta.

¹⁰Ti eri shi to eshicigo iyi i'wɛtwɛ 'wɛtwɛ nɛ baa njɛ o, arụhwajɛ ubwa kaa zasa tɛrɛta o.

¹¹Agwatana m palanganɛ, ama N eri shi kaa ma kwụba bụ o, baa ta tuhwulo tɛ tɛkashɛka, M peni shi kaa abashɛ ubwa o.

¹²Ba shapa iyi nɛ baa jala, i zasa bụtụ eri ba lakana bụ o; i zasa kaa du bụtụ eri bo hoŋtono bu maa, Imbe tɛ kwuuŋ aba ndaa o?

¹³Isɛbwɛ ya Agwatana shikeni aka elele. Ubwa ba bwarataga atwa ubwa i'ime, agata mbiyeni la udegbe ata maa u sukakanɛ bụ.

¹⁴Cee Ngɛɛ zhɛ ma banɛ nu n-ndumwa mu na maa mɛ jishijɛ Agwatanaa?

¹⁵Okwo yaa shɛ n-ndumwa mu ga ma n zhɛmɛ, iyi nɛ kiri Ngee eri ma nda yebe i shɛ maa ma lụpa maa Agwatana na shɛ bɛjɛmɛ-bụ-ụshɛrɛya mu hieci inyɛmɛnyɛmɛ mi.

¹⁶Okwo Ngaa nga suyanɛ bụ, bee leni maa ma dumana iwɛ, N tɛtanɛ shɛ rishe maa bi zhɛ ba shɛlaga iwɛ mi o.

¹⁷Ubwa tumwanɛ uvwugo maa u n hwelipi maa u n keeni tụgwụcanga uzawa iyi elele tɛnda.

¹⁸Bi leni shi maa ma 'waŋ ihwungwɛ o; ubwa njɛ maa i wụmanɛ uraiŋ mu duwa duwa.

¹⁹Okwo yaa ga shɛ iyi nɛ ɛɛ hiɛŋ ga a njɛ nu ukpahiŋ, ubwa kaa hwuri atwa kpaaŋ nu ukpahiŋ! Okwo yaa ga shɛ maa ma suyana bu ukara, gaaba eri ba nda bụ[11] ni iji maa zhaa?

²⁰Okwo tu Ngaa zasa n-ndumwa-tụwụma, Ngaa shɛ du kaa bụtụ bɛ tɛcara, ama n-ndumwa mi mi, mu ma m pana ya n-ndumwa-tụwụma; okwo tu Ngaa zasa unu-tusapa, ama kaa iyi elele nɛ Ama duma ma m pana ya n-ndumwa-tụwụma.

²¹N zasa unu-tusapa o, ama shɛ inɛ ɛtɛ i n to, iwɛnɛ tu Ngaa ngbaracɛ ya uraiŋ mu cwɛŋ bana.

²²Iyi ike ike yaa shɛ ya, iwɛnɛ ti bɛɛ zhɛ bo iricingo ta atwa na n-ndumwa mu ga zhɛmɛ, ta atwa na n-ndumwa mụ wụmɛ.

²³Aka na bụtụ na zasa unu-tusapa 'wi eshigiri, Agwatana a laya ni ilɛtu.

²⁴Agwatana shepi unyizo bee peni ogworozwo. Bee lubicinji ajɛmɛ-ụshɛrɛya unyizo hwɛɛ. Yaa shɛ shɛ Agwatana njɛ iŋ, asha gaaba njɛ iŋ tubaa?

²⁵Ijitɛ mi yo gozhigo ye hwuri bụtụ na bo gozhigo, i zasa kaa ụjita na zhɛmɛ okwo uko.

²⁶Ya kashɛka gana ụhaŋtụ na wa kashɛka hwuŋri hwuŋri ne meni, ya kashɛka gana ugbeji na zhɛ wa ima azwɛ.

²⁷Yaa shɛ Ngɛɛ hiɛŋ, N zhɛ ma ganga ya ụgagwụ tugagwuma, maa ma ganga ya eshe mi tɛhashɛgana maa mu na bwada ilɛtu,

²⁸N zhɛ kaa waa mu na nda inyɛsɛ ụbaụta mu, iwɛnɛ po M mepi maa Agwatana zha shɛ ma m pana ya n-ndumwa-zhɛ o.

²⁹Taa to o m pwonuo n-ndumwa-tụwụma, iwembe po Ngɛɛ tɛ zhɛ M mama kaana ụbaụta gadagaa?

³⁰I zasa ukwo na eri wa fwata iwɛwɛ mi o.

³¹Agwatana zhɛ ma n kala nu u'ibwa tiri, okwo tugwuno ti mi ti zhɛ tu ma n shana iyi inyizhi.

³²Yaa shɛ Agwatana ga shɛ butugwumwa gana mi, N Ngɛ zhɛ mɛ jishijɛ bụ; ti ge eri ta zha no ofwo ajɛmɛ-ụshɛrɛya maa atu dumanganɛ.

³³Ama i zasa bụtụ na eri be teni na ashashɛ tu o, i zasa kaa bụtụ namba maa ma n dumangana ụshɛrɛya na Agwatana o.

³⁴Agwatana, N genji ya ulwapɛ tụpana! N genji ya tuholono maa kede inyɛsɛ i n shɛ o.

³⁵N zha shɛ ma nda inyɛsɛ bu o, N zhɛ ma dumana iwɛ iwɛnɛ ti Ngee mepi amɛ mi.