Read bassa SHƐZUNGA TUZUNGANGANA AGWANGWAMA 105 Bible Online

SHƐZUNGA TUZUNGANGANA AGWANGWAMA 105 - bassa bible

SHƐZUNGA TUZUNGANGANA AGWANGWAMA 105

¹Oo 'walụ ma AGWANGWAMA; ananga ma ugombo ubwa. Mbiso ma edenji iyi nɛ baa nduwa!

²Zungangana ma AGWANGWAMA azunga ashɛtwa. Duma ma iwɛ ugondu ụrụhwajɛ na baa nduwa!

³Ge izeci ɛtɛ ibwɛ i tijilo 'yaga ụjɛrụma. Ga shɛmɛ sha atwa na a zhɛba AGWANGWAMA shɛ na bwada unyasa!

⁴Jalakaka ma AGWANGWAMA ti ikɛnyi ibwɛ hwɛɛ, keeni eshe ubwa tutuu!

⁵Oo ahiɛba ajalalo Abraham na shɛ yɛu ibwɛ ugondu, ahiɛba miaụŋ-me-eyi mi Jekob na bee teri.

⁶Ne teyinje ma ugondu ubwa u tudama na baa nduwa, ta arụhwajɛ ubwa, keeni ashɛrɛya ubwa na baa jɛmɛ nu unu ubwa.

⁷Ubwa shɛ AGWANGWAMA na shɛ Agwatana tu; onu ubwa tụpana namɛ na cɛnjɛ tu unyizo ga hwɛɛ.

⁸Ubwa ba untangana unu ubwa tutwa unyizo-nom, ibɛ shɛ unu ubwa na bee peni awaŋnɛ akpakwụ-ata,

⁹ibɛ shɛ unu na baa twa la na Abraham; keeni unu ubwa na bee shileni la Azik.

¹⁰Anaa na bee shikicingeni Jekob maa a shɛ okpogo, a shanɛ atwa Isrɛl unu-tutwa unyizo-nom.

¹¹Bɛɛ hiɛŋ, Gabụ Ngɛɛ zhɛ ma pana cɛnjɛ ti Kenan maa tɛ shɛ urobwo bu na ɛbi zhɛ ba 'yaga.

¹²Aka na ta tɛrɛta tu ufwugwo wa atwa Isrɛl tu twa sụ ufwugwo, iwɛnɛ ta a shɛ alashɛ na cɛnjɛ ta ata ti Kenan,

¹³oo rungo gbom, ee beni nu udenji uko, o tono nu udenji unya; ee beni na cɛnjɛ tu ko o tono na cɛnjɛ ti nya.

¹⁴Ama Agwatana leni shi kaa maa bụtụ be elele njɛ aŋ umungwuta o. Bee tezhigeni shɛgwuma iwɛ aba,

¹⁵bɛɛ hiɛŋ, To tumongono ma atwa mi anaa na Ngee teri o. Ta nda ma egesere mi iyi iwɛ o!

¹⁶Aka na ta AGWANGWAMA tumwanɛ imunɛ-tiya na cɛnjɛ ta aba, bee suji iyimɛyɛ ya aba kpaaŋ.

¹⁷Ama bu tumwanɛ bụtụ bu ko nu umbe wa aba, ubwa shɛ go Josɛf ata ee senji la maa sha bujama.

¹⁸Ɛvwɛvwɛjɛ ubwa a gwumanga bu no shigbo shɛ na oo to bu, e shiyeni i'ilu ibwɛ nụ ụshɛmbɛrɛ;

¹⁹uuwa i ci aka na ti iyi nɛ baa jɛmɛ sɛ, n-ndumwa ma AGWANGWAMA mi mbiseni caakwụ maa bi teni cɛŋ.

²⁰Nazhɛ agwuma Ijipti tumwanɛ maa ge tufwurinji bu, ibɛ po uhiu wa atwa ata genji bu maa mama 'yaga;

²¹baa njɛ bu ya agwuma-ihwɛ ibwɛ, keeni uhiu i'wɛŋnɛ ibwɛ kpaaŋ,

²²maa bu no sokokono[84] anjɛ-ugondu agwuma iyi gana na kwụlanɛ bụ, maa kaa mbisogono n-nyarɛ mu bwa ti'inta.

²³Ge Jekob zhe ni Ijipti; boo zokwu na cɛnjɛ tu Ham.

²⁴AGWANGWAMA peni atwa ubwa miaụŋ mu ufwugwo duwa, baa njɛ aŋ maa a 'yaga ikɛnyi uhwuri atwa i'ime ya aba.

²⁵Baa njɛ maa ga atwa Ijipti o to atwa ubwa ni i'ime, maa a njɛ miaụŋ mu bwa mu ugondu ti'inta.

²⁶Ibɛ po baa tumwanɛ yɛu ibwɛ ugondu go Moses, keeni Aron a na bee teri.

²⁷A njɛ ugondu u tudama tedure nu ukpahiŋ wa Agwatana, aa njɛ du arụhwajɛ ni Ijipti.

²⁸Agwatana tumwanɛ tishi na cɛnjɛ ta ata,

²⁹Bee sheyinji erefu aba aa shɛ mehieŋ, baa kwụnɛ ijɛnɛ ya aba hwɛɛ.

³⁰Azhɛgwa shini cɛnjɛ ta aba, to shimwono she buweci she ehiu aba.

³¹Agwatana peni-unu, ibɛ po ishi na akwarụkwata sukwurukwo, oo rungwutwonu cɛnjɛ ta aba kpaaŋ.

³²Baa tumwananɛ aŋ atayɛ-eshilo keeni ɛbɛrɛ na cɛnjɛ ta aba kpaaŋ.

³³Baa njɛ ikpɛri ya afwafwa keeni owowo aba ufwu, bee seshenji i'wɛ'wɛ nɛ namɛ na cɛnjɛ ta aba hwɛɛ.

³⁴Baa dumanɛ iwɛ, nazhɛ ovworo keeni ekpikpikpi-ovworo a na zasa tɛrɛta zhajɛ; aa yɛ tububa ta cɛnjɛ ta aba hwɛɛ; aa yɛ du tụ'walụ ti iyimɛyɛ nɛ aa bɛrɛ na cɛnjɛ ta aba hwɛɛ.

³⁵Baa kwụnɛ miaụŋ-me-eyi mu umbe ma amwamwa atwa Ijipti mu naa na ee meci ne tisemberi ta aba kpaaŋ.

³⁶Nazhɛ baa 'yagajɛ atwa Isrɛl ee beni; ee suji azụrụfa keeni azhɛnarɛya.

³⁷A 'yajɛ kaa ulapiya keeni ukpahiŋ hwɛɛ aba.

³⁸Atwa Ijipti a nda unyasa te e beni, iwɛnɛ ti inyɛsɛ ya aba ga shɛ aŋ.

³⁹Bee berishiji udomu wee urigeni aŋ, keeni ulwa na wa pana aŋ uhioko-uhwaŋna nụ ụjita.

⁴⁰A lụpɛ bụ, bee sugeni aŋ shorubo, bee peni aŋ iyimɛyɛ i tishigwo nɛ banɛ na azuba.

⁴¹Ubwa kepishinji uparatayɛ, ibɛ po meni mu bwa mụ fwụnjɛ na cɛnjɛ ta ata tu hwoo gana Urefu.

⁴²Iwɛnɛ po bi teyinje unu na bee shileni la yɛu ibwɛ ugondu ga Abraham.

⁴³Ibɛ po baa 'yagajɛ atwa ubwa na bee teri ee beni, a zụnjɛ azunga, ee keri n'ungwa mu unyasa.

⁴⁴Bee peni aŋ cɛnjɛ cɛnjɛ ta anya edenji; ibɛ po ee leshiji tụ'walụ ti iyi nɛ atwa ata njɛ tire ti ibɛ,

⁴⁵iwɛ maa atwa ubwa hwụjɛ-unu wa andwa ubwa, maa kaa a untangana onu ubwa tụpana kpaaŋ. Shɛtana ma AGWANGWAMA!