Read bassa SHƐZUNGA TUZUNGANGANA AGWANGWAMA 106 Bible Online

SHƐZUNGA TUZUNGANGANA AGWANGWAMA 106 - bassa bible

SHƐZUNGA TUZUNGANGANA AGWANGWAMA 106

¹Shɛtana ma AGWANGWAMA! Oo 'walụ ma AGWANGWAMA, iwɛnɛ po ubwa zhɛmɛ; tulubo tu bwa ti tikpeke kaa tɛ shɛ unyizo-nom!

²Gaaba eri ba duma iwɛ iyi i'wɛtwɛ nɛ AGWANGWAMA njɛɛ? Gaaba eri ba shɛtana bụ ta lanɛɛ?

³Atwa na a hwuga-unu na bee peni aŋ; a na kaa a nda iyi nɛ teni cɛŋ aka elele gwoje!

⁴Oo AGWANGWAMA, ne me teyinje, aka na aba mapana atwa bụ iwɛ; m mbiyeni na aka na aba lashɛga aŋ;

⁵iwɛ maa Ma kwụba tɛzhɛmana ta atwa bụ na ebi teri, iwɛ maa Ma bwada unyasa iwɛ amɛ-olom na udenji bu 'yajɛ, iwɛ maa Mu na busa na atwa na shɛ a naa bụ.

⁶Ta atuba, te eshi tu, tụ bụ njɛ iwɛwɛ; tɛ njɛ iyi iwɛ, atɛ njɛ tugworozwo.

⁷Aka na eshi tu namɛ la ni Ijipti, e eshiciji shi ugondu u tudama na abɛ njɛ kpaaŋ o; e teyinji shi kaa ugombo tulubo tụ bụ ti tikpeke o, ama a njɛ tigezhe no ofwo bu na shɛ Bụtụ ata na Hwuri Kpaaŋ[85] ni itekwu ɛtɛ Ishenje.

⁸Ama kaa gabụ bi bicinji aŋ iwɛ izeci bu, iwɛ maa mbiseni aŋ ukpahiŋ ata bụ ụ'wụtụ.

⁹Gabụ bi peni Itekwu ɛtɛ Ishenje unu, ibɛ po yaa hwɛŋ; ebi keshicinji atwa bụ na cɛnjɛ tu hwoo.

¹⁰Gana ebi bicinji aŋ ni i'ɛlɛ ya atwa na a sukakana aŋ ta, ebi leshiji aŋ maa e beni nu ukpahiŋ wa atwa i'ime ya aba.

¹¹Ibɛ po meni mu suji atwa na ge urigeni aŋ; okwo bụtụ ba aba bu ko vwɛ shɛ o.

¹²Nazhɛ atwa bụ tɛtanɛ n-ndumwa mụ bụ rishe; nazhɛ aa bu shɛtanɛ na azunga.

¹³Ama isɛbwɛ ugondu na abɛ njɛ 'wi aŋ kakayɛ; a bu 'yacɛ shɛ maa peni aŋ ahaŋsa o.

¹⁴Akparɛ munje aŋ tebiye nụ ụshɛka ata, ee bi menji nu udadarɛ ata;

¹⁵ebi peni aŋ iyi nɛ aa bụ lụpɛ, ama kaa bu tumwanɛ ụngwụ ụwɛ na ashashɛ aba.

¹⁶Aka na te etwenyi na namɛ nu ugba tu'ula ta ata njɛ isɛbwɛngwɛ no Moses, keeni Aron, bụtụ ata bi tijilo ba AGWANGWAMA,

¹⁷ibɛ po cɛnjɛ tɛ kapɛshɛngwa tee tweri Detan, taa mɛcɛ aŋ abana na atwa Abiram.

¹⁸Ulwa zweeneni no ohiuhiu atwa aba; ibɛ po bụratụ bu ulwa ata hwoŋzhinji ogworozwo ata.

¹⁹A njɛ itɛtɛnuwɛŋ yɛu buna ni Ishɛmɛ Horɛb; aa zhɛbɛ itɛtɛnuwɛŋ ɛtɛ oo mo.

²⁰E sheyinji ụjɛrụma wa Agwatana ni itɛtɛnuwɛŋ buna na baa ya ambɛ.

²¹Isɛbwɛ bu nɛ bicinji aŋ tedure nu ugondu bu ukpahiŋ na abɛ njɛ ni Ijipti 'wi aŋ.

²²Ibɛ shɛ arụhwajɛ na abu ndanjɛ na cɛnjɛ tu Ham, keeni iyi igɛhi nɛ abu ndanjɛ nu ụpalanụ Itekwu ɛtɛ Ishenje.

²³Iwɛbɛ po ɛbi hiɛŋ bi zhɛ bo iricingo aŋ, ama go Moses, na shɛ yɛu bu ugondu nɛ ebi teri, ubwa shikeni maa ma bu lakana maa kaa sheyingo isɛbwɛ ɛtɛ bu maa kede iricingo aŋ o.

²⁴Nazhɛ aa lacɛ cɛnjɛ ta ata tu unyasa, iwɛnɛ aa tɛtanɛ shɛ unu na ebi shileni aŋ gabụ Agwatana rishe.

²⁵O ngwulongongo te e zweni no shimwono sha aba, a hwụjɛ shɛ kaa unu bu gabụ AGWANGWAMA o.

²⁶Iwɛbɛ po ebi keleni aŋ unu maa bi zhɛ ba nda aŋ maa e 'wegeni nụ ụshɛka ata,

²⁷Maa njɛ ajalalo aba maa a garatagwụ na ashashɛ anya edenji, maa kaa e 'wegeni na cɛnjɛ cɛnjɛ.

²⁸Nazhɛ oo momo togotogwu na tuwa ti Beɛl piụ, aa yɛ iyi nɛ oo to ụrụpɛ na tuwa tu na tɛ shɛ u'uwowo.

²⁹Ibɛ po iyi nɛ aa nda vwunji isɛbwɛ bu gabụ AGWANGWAMA, nazhɛ ụngwụ u tishikpe bwadụ na ashashɛ aba.

³⁰Ama ge Finihas ishijɛ bee shikeni, bee peni tụwụma ta ata ulwapɛ, nazhɛ tishikpe ta ata tu hwuwowu.

³¹Ibɛ po ee teyinje bu iwɛ iyi ibiye nɛ baa njɛ, te kwuni na awaŋnɛ oko i ci awaŋnɛ anya, unyizo-nom.

³²Atwa ata ishicinjɛ isɛbwɛ bu gabụ AGWANGWAMA no ofwo meni ma ata mu Mɛriba, ibɛ po go Moses leshiji amɛ-tụhaŋtụ tụlụkpashɛ ta aba.

³³Iwɛnɛ po ee heshigeni amɛ ubwa, ibɛ po n-ndumwa mi izɛlɛgwu mu bananganɛ bụ nu unu.

³⁴A kwụnɛ shɛ kaa atwa ata shɛ shɛ atwa bụ gabụ Agwatana, gana na tu gabụ na bɛ shɛ AGWANGWAMA ge peni aŋ unu maa ga a njɛ o,

³⁵ama e meme hiŋci na aba na tụmbụla, oo soso iyi ya aba nɛ ibu 'wa sụ gabụ Agwatana.

³⁶Atwa bụ a zhɛba tuwa ta aba, ibɛ po inɛ ɛtɛ shɛ ya ugwuru na 'imɛ aŋ.

³⁷Aa kwunanga ntatanuwaŋ mi Kenan miaụŋ ma aba me eyi na mu na mo o na arụpɛ aba;

³⁸aa kwụna miaụŋ ma aba me eyi keeni mu na mo o mu na mu zasa tijama, mu na aa ta ụrụpɛ na tuwa ta atwa Kenan; nazhɛ tụkwụna ta ata ti heshigeni ya cɛnjɛ ta ata.

³⁹Gobwonu du ugondu wa aba na a ndangana heshigeni aŋ, ibɛ po aa bu shanɛ shɛ ya atwa tɛcara.

⁴⁰Nazhɛ isɛbwɛ bu gabụ AGWANGWAMA ishijɛ no ofwo atwa bu, ibɛ po atwa bu ubu shanɛ ya iyi inyizhi;

⁴¹ebi zweni aŋ ni i'ɛlɛ ya anya denji, ibɛ po atwa i'ime ya aba 'yajɛ ya ụhwada wa aba.

⁴²Atwa i'ime ya aba njɛ aŋ umungwuta, ee meme tileni tuta tu ukpahiŋ wa aba hwɛ hwɛɛ.

⁴³Gabụ bi lesheji aŋ kpalụ gembi ufwugwo, ama kaa e teri waa maa a na bu tana tigezhe, ibɛ po iwɛwɛ ya aba yo zucingo aŋ.

⁴⁴Okwo ti yaa shɛ gana ata, gabụ AGWANGWAMA ba hwuga n'ungwa ma aba, ebi mepi kaa tiriri ta aba.

⁴⁵Iwɛ aba, ebe teyinje unu bu tutwa, ebi hieci kaa inyɛmɛnyɛmɛ ya aba nu gana na tu ugombo tulubo tụ bụ ti tikpeke tu namɛ.

⁴⁶Abɛ njɛ kaa maa gɛ inyɛmɛnyɛmɛ ya aba i shɛ atwa elele na ge zweni aŋ na ti'ima.

⁴⁷Oo AGWANGWAMA na shɛ Agwatana tu, iti bicinji, iti bɛcinjɛ na ashashɛ edenji maa utu sotulonu urubwo uko, iwɛ maa ta nda ugwoje bu, maa kaa ta shɛtana izeci ɛtɛ bu tijilo.

⁴⁸Zhemonjino ma AGWANGWAMA, na shɛ Agwatana atwa Isrɛl, te kwuni hwuwayɛ tutu unyizo-nom! Ga atwa kpaaŋ hiɛŋ, Ami! Shɛtana ma AGWANGWAMA!