Read bassa SHƐZUNGA TUZUNGANGANA AGWANGWAMA 108 Bible Online

SHƐZUNGA TUZUNGANGANA AGWANGWAMA 108 - bassa bible

SHƐZUNGA TUZUNGANGANA AGWANGWAMA 108

¹Azunga na ge Devid Zunganganɛ AGWANGWAMA Oo Agwatana, amɛ mi namɛ kpekee! N zhɛ ma zunga azunga maa ma bu shɛtana! Ohwulu mi zhinjɛ malabụ!

²Oo ugwoje mu keeni aduma mi, zhinjɛ ma! N zhɛ mɛ zhingicinjɛ uwaŋna!

³Oo AGWANGWAMA, N zhɛ ma bu 'walụ na ashashɛ atwamwa, N zhɛ ma bu zungangana azunga na ashashɛ edenji.

⁴Tulubo tụ bụ ti tikpeke ti gembi tee henici azuba, tɛcara tụ bụ kaa ti ce tụla.

⁵Oo Agwatana, mbisono ugombo bu na tụla! Keeni ụjɛrụma bụ na cɛnjɛ tu unyizo kpaaŋ!

⁶Ga u'ala bụ ubiye u ti bicinji maa jishijɛ adua mi, iwɛ maa atwa na obo lubo benengeni!

⁷Agwatana shiri-unu no ohwolu ubwa tijilo[87] na tụlasụ tu bwa, bɛɛ hiɛŋ, N zhɛ mo dwotwogonu Shɛkɛm, N zhɛ kaa ma mangangana atwa Ulomu Sokot.

⁸Gamba n 'yajɛ Giliad, Gamba du n 'yajɛ Manasɛ; Ge Ifrem shɛ utukpa uhiuhiu mu; go Juda shɛ bukwuto mi.

⁹Go Moab shɛ igbɛ nɛ Omo sukwuto i'ɛlɛ mi; ge Idụm Ngɛɛ zhɛ ma 'wanga abida mi; N zhɛ ma kalana Afilistia n'ungwa mụ tụlasụ.

¹⁰Gaaba zhɛ ma n shapa nụ ụshɛpwụ na 'yajɛ tukapaa? Gaaba zhɛ ma n zarɛga ni Idụmm?

¹¹Oo Agwatana, shɛ gabụ suu bi ti jeneci? Bu zhagajɛ shɛ kaa ne ejeshi tu maa beni na aba o.

¹²Iti mbiyeni na atwa i'ime tu, iwɛnɛ te timbiyono ta bụtụ ti te shi eshe!

¹³Ti zhɛ ta lasụ atwa i'ime tu, iwɛnɛ ti bɛɛ zhɛ bo rukoto atwa na ma tu sukakana.