Read bassa SHƐZUNGA TUZUNGANGANA AGWANGWAMA 118 Bible Online

SHƐZUNGA TUZUNGANGANA AGWANGWAMA 118 - bassa bible

SHƐZUNGA TUZUNGANGANA AGWANGWAMA 118

¹Oo 'walụ ma AGWANGWAMA, iwɛnɛ po ubwa zhɛmɛ; tulubo tu bwa ti tikpeke kaa ta nama unyizo-nom!

²Ga atwa Isrɛl jɛmɛ maa, Tulubo tu bwa ti tikpeke ta nama unyizo-nom.

³Go onongbo Agwatana jɛmɛ maa, Tulubo tu bwa ti tikpeke ta nama unyizo-nom.

⁴Ga atwa na a sụma AGWANGWAMA inyɛsɛ jɛmɛ maa, Tulubo tu bwa ti tikpeke ta nama unyizo-nom.

⁵N suyanɛ AGWANGWAMA ne tiriri ti mi; bɛɛ n jishijɛ, bee n tufwurinji.

⁶AGWANGWAMA namɛ ne mi, N zha shɛ ma nda inyɛsɛ o; imbe bụtụ be elele eri ma n ndaa?

⁷AGWANGWAMA namɛ ne mi maa mo m mbiyono; N zhɛ ma ngbaraka ta a lasatagwụ atwa i'ime mi.

⁸I zhɛmɛ maa patana AGWANGWAMA rishe uhwuri maa datana butugwumwa.

⁹I zhɛmɛ maa patana AGWANGWAMA rishe uhwuri maa datana miaụŋ mu tugwama.

¹⁰Atwa i'ime ufwugwo e n hweri o n rungwutwonu; Ngee iricinji aŋ kaa hwɛɛ tedure nu ukpahiŋ wa AGWANGWAMA!

¹¹E n hweri o n rungwutwonu geri geri; Ngee iricinji aŋ kaa hwɛɛ tedure nu ukpahiŋ wa AGWANGWAMA

¹²O sukwurukwo o n rungwutwonu gana iswɛ; ama e hwoŋni kakayɛ[97] gana tɛka tu na ulwa 'imɛ, Ngee iricinji aŋ kaa hwɛɛ tedure nu ukpahiŋ wa AGWANGWAMA!

¹³E n shishingeni[98] duwa maa ma laya, ama AGWANGWAMA ubwa m mbiyeni.

¹⁴AGWANGWAMA ubwa shɛ ikɛnyi mi keeni azunga mi; ubwa m bicinji.

¹⁵Shɛlaga n'ungwa mu unyasa u tụlasụ; na amɛ umwono wa atwa AGWANGWAMA: U'ala wa AGWANGWAMA na 'yajɛ ikɛnyi kaa ubwa njɛ iŋ!

¹⁶U'ala ata ukpahiŋ wa AGWANGWAMA ubwa utu lasagwụ, u'ala ubwa ukpahiŋ ubwa njɛ ujasa!

¹⁷N zha shɛ mo 'wo, ama N zhɛ ma nama, maa ma ananga iyi nɛ AGWANGWAMA njɛ.

¹⁸AGWANGWAMA n vwuri ta 'yajɛ ikɛnyi; ama bu n kwụnɛ shɛ kaa o.

¹⁹N kepishingeni shidubo shi Umwono wa Agwatana, maa Mo tono ma 'walụ AGWANGWAMA!

²⁰Odubo AGWANGWAMA na; atwa tiririri kiri o dulo aŋ maa e teni na amɛ.

²¹AGWANGWAMA, ma bụ 'walụ iwɛnɛ abụ hwụjɛ iwe mi; abɛ shɛ kaa ubino mu.

²²Utayɛ na omo tuma jineci' ubwa shɛ ya utayɛ ụtandụ tebiye iwɛ usugwulumi u tuma.

²³Inɛ gɛ banɛ no olugwo AGWANGWAMA, iyi ụrụhwajɛ kaa ya shɛ ne eshe tu!

²⁴Ụjita ụ tụlasụ ta AGWANGWAMA na, ga amɛ tu lemi maa ta bwada unyasa nu bwa!

²⁵Oo AGWANGWAMA, ta bu tabwa, iti bicinji! Oo AGWANGWAMA, lono maa iyi elele iti 'yagana eshe!

²⁶Ge uwebiye i shɛ inɛ bụtụ na be ci ni izeci ya AGWANGWAMA! To bu zhemonjino nu Umwono wa AGWANGWAMA.

²⁷AGWANGWAMA ubwa shɛ Agwatana, bu tu pwonuo uhioko-uhwaŋna; 'waŋna ma a'wa'walụ i'wɛ'wɛ maa hi kwuni isene, maa hi no rungo utukwu-ụrụpɛ.

²⁸Gabụ bɛ shɛ Agwatana mi, ma bụ 'walụ; N zhɛ ma ananga ugombo bu.

²⁹Oo 'walụ ma AGWANGWAMA, iwɛnɛ baa zhɛmɛ; tulubo tu bwa ti tikpeke ta nama unyizo-nom!