Read bassa SHƐZUNGA TUZUNGANGANA AGWANGWAMA 139 Bible Online

SHƐZUNGA TUZUNGANGANA AGWANGWAMA 139 - bassa bible

SHƐZUNGA TUZUNGANGANA AGWANGWAMA 139

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA Oo AGWANGWAMA, gabụ bo hikokono amɛ mi, gabụ kaa bu m mepi!

²Gabụ bu mepi aka na Ngaa jɛjɛ, na aka na Ngɛɛ ishijɛ; gabụ kaa ba manganga tuhaŋsa tu na tu namɛ na amɛ mi kpaaŋ taa dụlụ.

³Gabụ ba kwụba aka na Ama bana, kwo kaa aka na Ngee weci; gabụ bu mepi iyi elele nɛ Ama nda.

⁴Oo AGWANGWAMA okwo Ngaa ta dumanɛ shɛ iwɛ, asha bu mwopwo iyi nɛ Ngɛɛ zhɛ ma duma cebe.

⁵Gabụ bu n hogogonu geri elele kpaaŋ, gabụ kaa bu m peni u'ala bụ.

⁶Iyi bu tumapa i n hwuleni me'ilwo; i keshici ti'eshicigo ti mi.

⁷Cee Ngee eri ma zha maa Ma bu bananganaa? Cee kaa Ngee eri mo gozhigono eshe buu?

⁸Yaa shɛ Ngee munji na azuba, bu namba apata; yaa shɛ kaa Ngee zhe maa Mo woto ne e'uye; bu namba apata!

⁹Yaa shɛ Ngaa hiɛrɛ Ngee zhe tutu uwaŋna-ụbanụ itekwu; kwo kaa maa Ma zha ma nama nu ukwunanga uwaŋna-utwonuo;

¹⁰okwo yaa shɛ apata, bu namba maa n 'yagaga; u'ala ubiye bu kaa zhɛ ma n untangana.

¹¹Yaa shɛ Ngɛɛ hiɛŋ, Ge tishi tu n urigeni, maa go uhioko-uhwaŋna mu shɛ ụjita,

¹²okwo tishi, tụ bụ shanɛ shɛ kaa tishi o, ụjita kaa wa ta raawụụ gana uwaŋna no ofwo bu; iwɛnɛ te tishi nu uhioko-uhwaŋna tɛ shɛ iyi ike no ofwo bu.

¹³Gabụ bɛ njɛ i'wɛŋnɛ ya amɛ mi, gabụ kaa bu togotogwu itwɛ mi taa ni igwune tumata bino mi.

¹⁴Ma bụ shɛtana, iwɛnɛ po gabụ bɛ shɛ aa sụma inyɛsɛ, iwɛ uhwaŋna ụrụhwajɛ na abu n karɛ;[104] ugondu bu zhɛmɛ kpaaŋ, waa dama kaa bụtụ. M mepi inɛ ɛtɛ na amɛ mi tebiye tebiye.

¹⁵Aka na ta a njɛ o'umpwo mi, e cimbengeni aŋ tebiye ni igwune tumata bino mi; aka na Ama waŋna apata ne tusweci, bi mepi maa N namba apata waa,

¹⁶bu n kwụbɛ nazhɛ ee m meci. Ijitɛ nɛ ee n dweji kpaaŋ 'nyeci nu utakada bụ, nazhɛ inɛ ye elele ibɛ kwuni.

¹⁷Oo Agwatana, tuhaŋsa tụ bụ tu n shanɛ iyi yo ogwumishi tebiye; tumba tutogotogwu ta tuba tu namɛɛ?

¹⁸Yaa shɛ Ngaa rɛcɛ tụ, tu hwuri ahwayɛ ufwugwo. Aka na Ngɛɛ zhinjɛ malabụ, N ta namɛ kaa na bụ waa.

¹⁹Oo Agwatana, i n kwụlanɛ tebiye maa kwụnɛ ogworozwo; maa edudweji ata mehieŋ e n genji!

²⁰Aba mo bu zwogono n-ndumwa mu tugworozwo; aa dumangana kaa izeci bu iyi iwɛ.[105]

²¹Oo AGWANGWAMA, mo imo atwa ata mo bu imo tebiye! M ngbaracɛ kaa atwa na ma bụ tana tigezhe cwɛŋ bana!

²²Mo imo aŋ tutu i ci uce. N rɛcɛ aŋ maa a shɛ atwa i'ime mi.

²³Oo Agwatana, n yeleji, maa mepi amɛ mi! M menji maa mepi tuhaŋsa ti mi!

²⁴Dwalakaka maa kwụbɛ okwo iyi tugworozwo[106] namba na amɛ mi maa n zeriji nu uhwaŋna unyizo-nom![107]