Read bassa SHƐZUNGA TUZUNGANGANA AGWANGWAMA 144 Bible Online

SHƐZUNGA TUZUNGANGANA AGWANGWAMA 144 - bassa bible

SHƐZUNGA TUZUNGANGANA AGWANGWAMA 144

¹Azunga na ge Devid Zunganganɛ AGWANGWAMA Zhemonjino ma AGWANGWAMA na shɛ ijilɛni mi! Ubwa m mbisegeni ujasa, ba n imanganjɛ kaa iwɛ ifelu.

²Ubwa shɛ ijilɛni mi keeni ofwo mi tuswaka; ubwa shɛ uba mu keeni bileleji mi, ubwa shɛ abula mi ujasa, ubwa Ngaa datanɛ maa mo bino. Ubwa tileni atwamwa nu ukaka mu.[109]

³Oo AGWANGWAMA, imbe bwa bụtụ shɛ abu ta haŋsa iwɛ ubwaa? Kwo kaa yɛu bụtụ nɛ abu ta 'wa iwɛ ubwaa?

⁴Bụtụ shɛ gana ihwungwɛ nɛ ya banɛ ni inyɛnu; ijitɛ tunama tu bwa i shɛ gana uzhizhi na wa kashɛka kwakwa.

⁵Oo AGWANGWAMA, dwatwajɛ tụla maa kezhe! Tumongono nshama maa mi bɛcinjɛ nshikwo!

⁶Tumwanɛ ɛbɛrɛ bu maa e gereteji atwa i'ime bu; karɛ aŋ a'inla bu maa e gezhiji!

⁷Banɛ na azuba maa kezhe, m mbo, maa Ma banɛ ne meni mu ga mi iri, maa n leshiji; m bicinji nu ukpahiŋ wa atwa cɛnjɛ ti nya.

⁸Anaa na jɛmɛ shɛ iwɛ-tɛkana kwukwuŋ, u'ala wa aba ubiye ụ shɛ u'ala tukata.

⁹Oo Agwatana, N zhɛ ma bu zungangana azunga ofwo. N zhɛ ma bu 'nyamangana uta na 'yajɛ ihwehwe umpwa na azunga mi.

¹⁰Gabụ bɛ njɛ maa ga shɛgwuma shɛ lasụ atwa i'ime ya aba. Ebi leshiji yɛu bu ugondu ge Devid.

¹¹M bicinji no olugwo atwa i'ime mi umungwuta. N leshiji nu ukpahiŋ wa atwa cɛnjɛ ti nya, anaa na i'ɛlɛ ya aba ibiye i shɛ i'ɛlɛ tukata.

¹²Ga miaụŋ mu tu me eyi mɛ shɛ gana okokoto na hwuwi uwaŋna ne tisemberi ta aba. Ga miaụŋ mu tu mo o mɛ shɛ gana atayɛ na ee shebi maa a njɛ ukpogwu wa agwuma tiseberi.

¹³Go orubwu tu shinenji ni iyimɛyɛ i tuswoswoswo; ga agwụdụ tu na mata miaụŋ igbɛɛ-itɛ-itɛ ne shihilo shi tu.

¹⁴Gɛ inɛ tu na matanana duwa duwa uzawa tubasaga kwo kaa ufwu tɛnda. Kede n'ungwa me tiriri mu nama ne ekpekiti tu o!

¹⁵Atwa na uwebiye namanɛ gana ga gwoje! Atwa na AGWANGWAMA shɛ Agwatana aba gwoje!