Read bassa SHƐZUNGA TUZUNGANGANA AGWANGWAMA 17 Bible Online

SHƐZUNGA TUZUNGANGANA AGWANGWAMA 17 - bassa bible

SHƐZUNGA TUZUNGANGANA AGWANGWAMA 17

¹Adua na ge Devid njɛ Oo AGWANGWAMA, shɛlaga ilupwɛ mi i tiririri; shilo acɛbɛ nu n'ungwa mi mi! Shɛlaga adua mi a na Ama nda na tɛkana!

²Gabụ bi zhɛ ba duma ụshɛrɛya mu ni iwɛ-tumapa, iwɛnɛ te ebi mepi iyi nɛ teni cɛŋ.

³Gabụ kaa bi mepi amɛ mi, gabụ kaa bu me n hikeni okwo nụ ụjita; gabụ kaa bu ma m manga hwɛ hwɛɛ mu, obu to kaa ugbe maa tuhaŋsa tụ wɛ tu zasaba na amɛ mi kwukwuŋ.

⁴Iyi iwɛ tụdụma beni shi nu unu mu gana atwa vwɛ o; Ma hwuga kaa onu andwa bu, M meme hiŋci shi kaa na atwa na a nda abwagara o.

⁵Aka elele Ma zha tahaŋnụ ni ihwɛŋnɛ bu, ɛvwɛvwɛjɛ mi kaa sherimeni shi ni ibɛ o.

⁶Oo Agwatana, M bu suyanɛ na adua mi, iwɛnɛ tɛ ɛbi mɛ n jishijɛ. Ibɛ po m mbiyanɛ maa shɛlaga n-ndumwa mi mi.

⁷Kapɛshɛnga tulubo ta ata tụ bụ tụ 'wụtụ maa iti bicinji; na bụ'aŋbụ bụ ata swaka lapiya iwɛ atwa i'ime tu.

⁸Na ma intana gana bụzagwụ be rishe rụ bụ; na ma swaka nu uhwuŋnu wa apiambɛ bụ,

⁹iwɛ ogworozwo na ma n sukakana, aba shɛ o'uwowo i'ime a na n rugwutwonu.

¹⁰A zasa inyɛmɛnyɛmɛ tihioko, a duma ishɛkɛ.

¹¹O n rungwutwonu hwuwayɛ go, ti geri elele na Ngee duri, aa dwalakaka ohwolu na maa o m po na cɛnjɛ.

¹²A shɛ gana izeci, e n gwubeji, aa jala kaa maa e n seshenji wunzu wunzu.

¹³Oo AGWANGWAMA, ishijɛ maa tefuleji atwa i'ime mi maa fwụjɛ aŋ! N leshiji no olugwo ogworozwo tedure nu utokwobi bu.

¹⁴Oo AGWANGWAMA, M bicinji no olugwo atwa na uraiŋ wa aba tiya ụ shɛ nu unyizo ga kiri, a na kaa 'yajɛ iyi elele nɛ aa jala. Pana aŋ ulwapɛ nu ụbaụta na ebi sutengeni iwɛ aba; ga u gembi ti iwɛ miaụŋ ma aba, maa unoo uko ụ vwɛ iwɛ ajalụ aba du!

¹⁵Yaa shɛ inee mi, N zhɛ ma bu kwụba iwɛnɛ tu Ngaa bu 'wanganɛ shɛ; aka na Ngɛɛ zhinjɛ, tunama na agba bu ti zhɛ tu mo n shidingo nu unyasa.