Read bassa SHƐZUNGA TUZUNGANGANA AGWANGWAMA 25 Bible Online

SHƐZUNGA TUZUNGANGANA AGWANGWAMA 25 - bassa bible

SHƐZUNGA TUZUNGANGANA AGWANGWAMA 25

¹Azunga na ge Devid Zunganganɛ AGWANGWAMA. Oo AGWANGWAMA, gabụ Ngoo momo shikicingono na adua mi;

²oo Agwatana mi, gabụ Ngaa patanɛ-rishe, N leshiji ne ezuye u tụlasụ; to lono maa atwa i'ime mi a n hiɛnjɛ ilɛtu o.

³Iwɛ-tɛkana, kede ezuye shɛ bụtụ na ma bu patana-rishe okwo bu ko, ama ge ezuye shɛ atwa na ma bu tana tigezhe.

⁴Oo AGWANGWAMA, M mbisegeni ihwɛŋnɛ bu; M mbiseni ilɛmu bu.

⁵M mbisegeni maa mu na ya uraiŋ te teni cɛŋ gana na ti iwɛ-tɛkana bu namɛ, iwɛnɛ ti yaa shɛ gabụ bɛ shɛ Agwatana mi, no mo m bicingo. Gabụ kaa Ngaa patanɛ-rishe aka elele.

⁶Oo AGWANGWAMA, teyinje iwɛ bu tumapa keeni inyɛmɛnyɛmɛ bu nɛ obo hioko te kwune cala cala.

⁷Oo AGWANGWAMA, te ne teyingenji iwɛwɛ mi keeni undwa mu tubwada na Ngaa njɛ ne tisemberi ti mi o, ama ne me teyinje ni inyɛmɛnyɛmɛ bu tihioko, keeni uwebiye bu!

⁸AGWANGWAMA ubwa shɛ bụtụ bi tiririri na kaa zhɛmɛ, iwɛbɛ po boo sokokono atwa iwɛwɛ uhwaŋna na maa e duri.

⁹Ubwa bo mbisono atwa tusaiiŋ uhwaŋna na teni cɛŋ, boo mbisogono aŋ kaa ukwulana ubwa.

¹⁰Na tɛcara keeni ni inyɛmɛnyɛmɛ ibwɛ, baa 'yagaga atwa elele na a untangana unu ubwa tutwa a na kaa a hwuga-unu wa andwa ubwa.

¹¹Oo AGWANGWAMA, n gengeni tụwụma ti mi iwɛ izeci bu, iwɛnɛ ti yee gembi tebiye.

¹²Atwa na a sụma AGWANGWAMA inyɛsɛ, aba du o soso no ofwo ubwa maa e mepi uhwaŋna na maa e duri.

¹³Aba iyi zhɛ na zhɛmana aka elele, miaụŋ ma aba kaa mi zhɛ ma lashɛga cɛnjɛ ta ata.

¹⁴AGWANGWAMA shɛ biyejilo ba atwa na a sụma bụ inyɛsɛ, a na kaa bee swegeni unu ubwa tutwa.

¹⁵AGWANGWAMA ubwa eshe mi ngbaracɛ, iwɛnɛ ti yaa shɛ ubwa kiri ma n lashaga ni iyi mazhanga.

¹⁶AGWANGWAMA, m mbiyanɛ, maa hieci inyɛmɛnyɛmɛ mi, iwɛnɛ Ngaa namɛ ngooko, Ngaa shɛ kaa bụtụ bụ ụbaụta.

¹⁷Salanana kaa amɛ-tụhaŋtụ na namɛ na amɛ mi, maa m bɛcinjɛ ne tiriri ti mi.

¹⁸Na yalaga ụbaụta mu keeni tiriri ti mi, maa kaa n gengeni iwɛwɛ nɛ Ama nda kpaaŋ.

¹⁹Yalaga ufwugwo na atwa i'ime mi gembi, yalaga gana na oo mo n imo duwa.

²⁰Na ngbaraka uraiŋ mu maa m bicinji; to lono maa ezuye n shɛ o. Gabụ bɛ shɛ bikepi mi.

²¹Ge tiririri keeni tɛcara ti mi ti n leshiji, iwɛnɛ tu Ngaa bu patanɛ-rishe.

²²Oo Agwatana, bicingo atwa bu Isrɛl maa a banɛ na shɛmɛ-shɛ-tụhaŋtụ sha aba!