Read bassa SHƐZUNGA TUZUNGANGANA AGWANGWAMA 27 Bible Online

SHƐZUNGA TUZUNGANGANA AGWANGWAMA 27 - bassa bible

SHƐZUNGA TUZUNGANGANA AGWANGWAMA 27

¹Azunga na ge Devid Zunganganɛ AGWANGWAMA. AGWANGWAMA ubwa shɛ uhioko-uhwaŋna mu, keeni ubino mu; N zha shɛ ma nda ya inyɛsɛ bụtụ be elele o. AGWANGWAMA ubwa shɛ bikepi mi,[10] N zha shɛ ma nda ya inyɛsɛ kwukwuŋ.

²Aka na ta atwa awɛ e n kepengeni, atwa ifelu mi na atwa i'ime mi mekeni maa a n kwụnɛ,[11] ɛ zhɛ a twa udukwutwa aa 'waŋ na cɛnjɛ.

³Okwo yaa shɛ ejeshi kpaaŋ kpaaŋ o n rungwutwonu, N zha shɛ ma nda inyɛsɛ o; okwo yaa shɛ atwa i'ime e n kepengeni, ohwulu mi kaa zhɛ a nama oko waa.

⁴N lụpɛ AGWANGWAMA iyi ike gba; iyi ike gba kiri Ama dwalakaka. Ibɛ shɛ tunama nu umwono wa AGWANGWAMA tutu tu'wo ti mi, no ofwo iyi ibwɛ ụrụhwajɛ nɛ pilanụ, maa ma lụpa du ti'yagaga tu bwa.

⁵Ubwa ma n intana nu uhwuŋnu ubwa, na aka bụ ụbaụta; ubwa kaa ma n untangana nu umwono ubwa lapiya, baa nda kaa maa ma patana nu uparatayɛ ubwa suu.

⁶Ibɛ po Ngɛɛ zhɛ ma lasụ atwa i'ime mi a na n rungwotwonu. N zhɛ kaa mu na kala n'ungwa mu unyasa tubwada ta Ama shɛkana arụpɛ na amɛ umwono ubwa. N zhɛ ma zunga, maa ma shɛtana AGWANGWAMA.

⁷Oo AGWANGWAMA, aka na Ngaa bu suyanɛ, hwuga! Hioko inyɛmɛnyɛmɛ mi maa n jishijɛ!

⁸Aka na ɛbi hiɛŋ, Zhajɛ maa n zhɛbɛ, Ngɛɛ jishijɛ, Ngɛɛ hiɛŋ, AGWANGWAMA, N zhɛ ma zhajɛ,

⁹Oo Agwatana na shɛ ubino mu, ta mama intana maa kede ma bu kwụba o! Ta nda isɛbwɛ ne mi o; ta ma n kala kaa, Gamba yɛu gɛ bu ugondu o. Oo Agwatana Bibicinji mi, gabụ bu mo m mbiyono; ta ma ganga, to mo jinoko kaa o!

¹⁰Okwo bishi mi no bino mi eri mo n jinoko, ama AGWANGWAMA tuba ubwa ma n ima u'ala.

¹¹Oo AGWANGWAMA, M mbisegeni andwa bu, maa n eshicigeni kaa unu bu tụpana na 'yajɛ ulapiya, iwɛnɛ tu Ngaa 'yajɛ atwa i'ime ufwugwo.

¹²To mo n jinokono atwa i'ime mi, a na ma n la tiseyida tụ ụzagwụ, na tuhwungwatangwụ ta aba ta abwagara o.

¹³N tɛtanɛ rishe maa N zhɛ ma ya uraiŋ maa ma kwụba ụzhɛ wa AGWANGWAMA, nu unyizo ga.

¹⁴Patana AGWANGWAMA rishe. 'Yaga rishe-tɛtɛtana, ta ganga ashɛlatụ ubwa o. Patana AGWANGWAMA rishe tutuu.