Read bassa SHƐZUNGA TUZUNGANGANA AGWANGWAMA 31 Bible Online

SHƐZUNGA TUZUNGANGANA AGWANGWAMA 31 - bassa bible

SHƐZUNGA TUZUNGANGANA AGWANGWAMA 31

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA Oo AGWANGWAMA, N zhajɛ pụ bụ, to lono maa e m peni ezuye kwukwuŋ. Gabụ bɛ shɛ Agwatana tiririri; ma bụ tabwa, m bicinji!

²Hwuga iwɛ mi! M bicinji hwuwayɛ go! Sha bikepi mi maa n jilanɛ; keeni uba mu maa m bicinji!

³Iiŋ, gabụ bɛ shɛ uparatyɛ mu keeni uba mu; N 'yagaga maa no mo sokono uhwaŋna, iwɛ izeci bu.

⁴N leshiji nu ugwuru na ee m biteni, N intanɛ iwɛ iyi mazhanga, iwɛnɛ ta abɛ shɛ ofwo mi tuswaka.

⁵Ni i'ɛlɛ bu Ngee shiyeni mpiala mi mi. Oo AGWANGWAMA, gabụ kaa bu me n gwube; gabụ bɛ shɛ Agwatana tɛcara.

⁶Mo imo[14] atwa na a zhɛba tuwa tu na tɛ shɛ iyi tusashɛ, ama gabụ tuba Ngaa patanɛ-rishe.

⁷Ma nda unyasa, Ama bwada kaa unyasa iwɛ inyɛmɛnyɛmɛ bu tihioko. Gabụ kaa bụ kwụbɛ ụbaụta mu; ebi mepi kaa amɛ-tụhaŋtụ mi.

⁸Gabụ kaa bi leni shi maa ga atwa i'ime mi e n teni u'ala; gabụ kaa bu m peni tumama 'yaga maa ma zha ofwo elele na Ama jala.

⁹Oo AGWANGWAMA, hioko inyɛmɛnyɛmɛ mi, iwɛnɛ tu Ngaa namɛ ne tiriri; eshe mi lukwumi iwɛ u'wo ụ'wụtụ na Ama twa; N lukwumi ya hwɛ hwɛɛ mu, to ohwulu mi ta tu'waba ti mi.

¹⁰N hweteni tedure nu ụngwụ-tuhwuga, tụwụma ti mi kaa tu munananɛ ukpahiŋ mu. Shɛmɛ-shɛ-tụhaŋtụ shi mi kpaaŋ shi n logwocenji hwɛɛ; okwo o'umpwo mi zweni arụkwa hwɛɛ.

¹¹N shɛ iyi tutwa no ofwo atwa i'ime mi, inɛ anya mi ibɛ du wumanjɛ ya; atwa mi tumapa a nda inyɛsɛ mi; aka na a n kwụbɛ nu ukpekiti ụshɛpwụ, o no mo gozhigono.

¹²Atwa elele keri ya eye mi gana maa N uwo; Ngaa shɛ ya gana ejejebi na aa wɛŋ.

¹³N hwụjɛ ta atwa i'ime mi a dumanga swɛɛ swɛɛ, ɛɛ hiɛŋ, Iyi inyɛsɛ rungwutwonu bu geri elele hwɛɛ. A ma n haŋsagana iwɛ, a jala maa a n kwụnɛ.

¹⁴Oo AGWANGWAMA, gabụ Ngaa patanɛ-rishe; N hiɛŋ, Gabụ kaa bɛ shɛ Agwatana mi.

¹⁵Aka mi namɛ ni i'ɛlɛ bu; n leshiji ni i'ɛlɛ ya atwa i'ime mi keeni i'ɛlɛ ya atwa na ma n shɛka.

¹⁶Mbiyanɛ bujama ga bụ na amɛ-olom; m bicinji tedure ni inyɛmɛnyɛmɛ bu tihioko.

¹⁷Oo AGWANGWAMA, M bu suyanɛ, to lono maa ezuye n shɛ o, ge ezuye shɛ ogworozwo; ge e zwi ne e'uye maa kede e eri ya iwɛ tudumana o.

¹⁸Nda maa ejwe-ụzagwụ 'imɛ ilɛmɛ, ta atwa elele na a nda unyangana, a na mama sata na azuba, a na a duma iyi iwɛ nu uhiuhiu wa atwa tiririri.

¹⁹Iyi ibiye nɛ kaa abu intananɛ atwa na ma bu sụma inyɛsɛ i gembi! Bụtụ be elele kaa mepi gana na ta abɛ zhɛmɛ tebiye, gabụ kaa bɛ shɛ ijilɛni nɛ ba lashaga atwa na ubu patanɛ-rishe.

²⁰Gabụ bu intanɛ aŋ na agba bu, iyi elele kaa zha shɛ ya nda aŋ ya na ti'imangana tu na atwa a imangana aŋ o; abu intanɛ aŋ nu uhwuŋnu bu ulapiya maa e benengeni tutwa ta atwa i'ime ya aba.

²¹Ga ashɛtwa shɛ a na AGWANGWAMA! Ubwa m mbiseni tulubo tu bwa tu ụrụhwajɛ na aka na te e n hweri e n kepengeni du!

²²Inyɛsɛ i n shɛ iwɛnɛ ti Ngee heŋshi maa okwo bu n unzhi maa ma bana[15] na agba[16] bụ. Ama bu hwụjɛ n'ungwa mi mi na aka na Ngaa bu suyanɛ maa m mbiyeni.

²³Ahiɛba atwa tijilo kpaaŋ, lubo ma AGWANGWAMA. AGWANGWAMA a jilanɛ atwa tɛcara, ama ba pana anjɛ unyangana ulwapɛ gana na teni cɛŋ na aba.

²⁴Ahiɛba na hia shɛtana AGWANGWAMA kpaaŋ, shana ma ikɛnyi maa hiɛ 'imɛ-isɛbwɛ.