Read bassa SHƐZUNGA TUZUNGANGANA AGWANGWAMA 35 Bible Online

SHƐZUNGA TUZUNGANGANA AGWANGWAMA 35 - bassa bible

SHƐZUNGA TUZUNGANGANA AGWANGWAMA 35

¹Azunga na ge Devid Zunganganɛ AGWANGWAMA Oo AGWANGWAMA, sukakana atwa na ma n sukakana du, twa ifelu na atwa na a twa ifelu ne mi!

²Shapa abula ujasa keeni i'wɛŋnɛ ujasa ya ashɛmbɛrɛ, zhajɛ maa n lesheji!

³Shapa isɛnu bu keeni ụtagwụ bụ maa sukakanɛ atwa na n urigeni nu usumwa! N shileni-unu maa bi zhɛ bu mo bicingo.

⁴Ga atwa na ma n jala tụkwụna leyegeji maa ezuye shɛ aŋ! Ge iyi sukwutogonu atwa na ma n haŋsagana iyi iwɛ maa e gwuri mabaaba!

⁵Ga a shɛ gana afwụrɛkɛcɛ na uvwugo wo sugo, iwɛnɛ ta butumwa ba AGWANGWAMA ba azuba urigeni aŋ nu usumwa!

⁶Ga uhwaŋna wa aba ụ shɛ tishi, gɛ irɛrɛ shericinji uŋ na aka na ta butumwa ba AGWANGWAMA ba azuba bo unzo aŋ!

⁷O mo m bitono ugwuru zawa ecilo, oo mo n hinongo ushapa maa ma laya nu bwa N njɛ shɛ kaa iyi elele o.

⁸Ama ufwu tɛnda zhɛ wo vwutono aŋ tobwolo e te mepi shi o; ugwuru wa aba na ee bici ni ikɛnyi aba kaa zhɛ wa ima aŋ, ɛ zhɛ a 'waŋ nu ufwu wa aba tɛnda!

⁹Nazhɛ amɛ mi zhɛ o lomo no ofwo AGWANGWAMA; u'waba kaa zhɛ ma n hia iwɛnɛ ti bee m bicinji.

¹⁰N zhɛ mɛ hiɛŋ AGWANGWAMA na amɛ mi oko hwɛɛ maa, I zasa bụtụ okwo bu ko na shɛ gana bụ o. Gabụ ba lashaga bụtụ na mama zasa ni i'ɛlɛ bụtụ na hwuri bu ikɛnyi, keeni okofwo ni i'ɛlɛ ya atwa na a nda aŋ umungwuta.

¹¹Atwa awɛ ma dumangana tiseyida tu tukata; aa ma n shanangana iwɛ ni iyi nɛ Ngee mepi shi iwɛ ibɛ.

¹²A n cɛpɛ itɛpwɛ iwɛ tụlụkpashɛ ti iyi ibiye, ibɛ po Ngee iri ya nu udwodwo.

¹³Ama aka na ta a gwumanga, Ngee urigeni tugwuno tụ ụcɛnjɛ tɛnda; Ngee meme shiyeni ne ezumi tɛnda; Ngoo to bizhiri Ngaa njɛ adua,[18]

¹⁴M mama njɛ gana biyejilo ba aba keeni yɛu-bino ya aba na adua mi tɛnda. Mo rungo mehihiri nụ ụkwụla-tuta, gana ta bụtụ na ba ta-ụkwụla iwɛ bino bwa.

¹⁵Ama aka na tụ ụbaụta n vwuteni, aa nda unyasa hwɛɛ aba, o sotulonu yworworwo aa ma n nda asada; oo mo n kwuto, e n genji shi kaa tudwatwaga o.

¹⁶A ma n kaana asada tɛnda gana ta bụtụ bu tusashɛ, aa pa ivwɛ ya aba rine ni i'ime nɛ oo n to.

¹⁷AGWANGWAMA, i ci ụkwụmbwụ naa ɛbi zhɛ ba ngbaraka kwakwaa? N lesheji na tukapangana ta aba; bicingo uraiŋ mu ni izeci gɛ!

¹⁸Nazhɛ Ngɛɛ zhɛ ma bu 'walụ no tusotulonu tụ 'wụtụ ta atwa bụ; N zhɛ kaa ma bu shɛtana ne eshe aba kpaaŋ.

¹⁹To lono maa ma laya maa atwa i'ime mi a na shɛ ejwe-ụzagwụ a n hiɛnjɛ ilɛtu o. To lono kaa maa atwa na mo n imo gbi a hiɛnjɛ ụngwụ mu tuhwuga ilɛtu reeree o.

²⁰A jɛmɛ shɛ n-ndumwa nu uhwaŋna wa amɛ-olom; ama a ma amɛ nụ ụzagwụ we elele iwɛ atwa na 'yajɛ amɛ-olom, a na kaa o lubo atwa.

²¹A ma n shanangana iwɛ, aa ugaga, ɛɛ hiɛŋ, Eebɛ! Tụ kwụbɛ kaa iyi nɛ abɛ njɛ!

²²Oo AGWANGWAMA, bụ kwụbɛ kaa ijɛ hwɛɛ. Iwɛbɛ po oo AGWANGWAMA, ta nama shiruu o; ta dụlụma kaa ne mi o!

²³Oo AGWANGWAMA, mɛmɛ zhingicinjɛ, maa n lesheji; Agwatana mi, ishijɛ maa jɛmɛ ụshɛrɛya iyi nɛ aa ma n nda!

²⁴Oo AGWANGWAMA, m peni n-ndumwa-zhɛ ne tiririri tụ bụ; to lono kaa maa atwa i'ime mi a n hiɛnjɛ ilɛtu o.

²⁵To lono maa a mama hianụ, Iiŋ, tu vwuteni bu kaa, mizha tɛ njɛ bu ma gana na utu kwụlanɛ kwakwa o!

²⁶Ga atwa na a hinga tiriri ti mi ilɛtu e leyegeji hwɛɛ aba maa o sukwutogwu; ge ezuye keeni ụpụrụsa urigeni atwa elele na mama zhɛzhɛna maa aba zhɛmɛ n hwuri!

²⁷Ga atwa na a jala maa n-ndumwa mɛ n zhɛmɛ a na kala n'ungwa mu unyasa na amɛ-olom, maa a na duma aka elele maa, AGWANGWAMA gembi tebiye! Amɛ ubwa lemi ti iyi 'yaganɛ yɛu ibwɛ ugondu eshe!

²⁸Nazhɛ Ngɛɛ zhɛ ma ananga tiririri tụ bụ, N zhɛ kaa ma bu dumanga tutu ụrụmɛ.