Read bassa SHƐZUNGA TUZUNGANGANA AGWANGWAMA 36 Bible Online

SHƐZUNGA TUZUNGANGANA AGWANGWAMA 36 - bassa bible

SHƐZUNGA TUZUNGANGANA AGWANGWAMA 36

¹No Ofwo Iyɛri ya Azụnjɛ: Azunga na ge Devid, Yɛu-ugondu ya AGWANGWAMA Zunganganɛ AGWANGWAMA Iwɛwɛ ya duma iwɛ taa tuta ta amɛ ugworozwo; gana na tu baa lacɛ Agwatana, bụ sụmɛ shɛ kaa Agwatana inyɛsɛ ne eshe ubwa o.

²Iwɛnɛ po bi heŋshi te gembi ni ikɛnyi ibwɛ maa Agwatana zha shɛ a ta iwɛwɛ ibwɛ ugbe maa pana iŋ tụwụma o.

³N-ndumwa mu bwa mɛ shɛ no tugworozwo; ụzagwụ kaa hwuleji bu tudwa; bɛ incɛ shɛ ya maa nda iyi ibiye o.

⁴Ba imanganga iyi iwɛ ti bee weci no ogodo ubwa; i zasa iyi ibiye nɛ baa nda o, bu lacɛ shɛ iyi iwɛ ye elele kwukwuŋ.

⁵Oo AGWANGWAMA, tulubo tụ bụ ti tikpeke ti ce azuba; tɛcara tụ bụ kaa ti timengeni tụla.

⁶Tiririri tụ bụ tɛ shɛ gana nshama mụ 'wụtụ 'wụtụ; ashɛrɛya na aba kwunanga kaa a shɛ gana me'ilo mi itekwu. Oo AGWANGWAMA, gabụ kaa ba ima atwa, keeni isundɛ ehilo u'ala.

⁷Oo Agwatana, tulubo tụ bụ ti tikpeke tɛ shɛ iyi yo ogwumishi! Uhwuŋnu wa apiambɛ bụ kaa ubwa wa jilanɛ atwa bụ.

⁸A ya iyimɛyɛ unyasa ni iyimɛyɛ i'wɛtwɛ nɛ ebi peni aŋ; gabụ kaa bi leni maa ge tuwebiye tụ bụ tu balana aŋ gana Urefu.

⁹Iwɛnɛ po no olugwo bu uraiŋ we elele wɛ zhinjɛ; iwɛ uhioko-uhwaŋna bu kaa upo ata kwụba uhwaŋna.

¹⁰No lubo atwa na ubu mepi tutu maa na ndana kaa atwa na shɛmɛ sha aba shɛ namɛ ririri iyi ibiye.

¹¹To lono maa atwa tumama sata e n rikeci o, kwo kaa maa ogworozwo e n urigeni nu usumwa o.

¹²Kwụba ofwo na anjɛ iyi iwɛ 'waŋtatangwụ ejwe-cibɛ kaa zha shɛ a ala ti'ishɛjɛ apata ya o.