Read bassa SHƐZUNGA TUZUNGANGANA AGWANGWAMA 37 Bible Online

SHƐZUNGA TUZUNGANGANA AGWANGWAMA 37 - bassa bible

SHƐZUNGA TUZUNGANGANA AGWANGWAMA 37

¹Azunga na ge Devid Zunganganɛ AGWANGWAMA Kede amɛ bụ hashɛganụ iwɛ iyi nɛ ogworozwo a nda o; Ta nda kaa isɛbwɛngwɛ na atwa na a nda iyi nɛ teni shi cɛŋ o.

²Ɛ zhɛ a inanga eshe hwuwayɛ hwuwayɛ gana ambɛ na hweteni; ɛ zhɛ o 'wo gana ambɛ olom na lụmbɛ.

³Patana AGWANGWAMA rishe maa na nda iyi ibiye; nazhɛ ɛbi zhɛ ba nama na cɛnjɛ ta ata maa bini.

⁴Dwalakaka unyasa bụ na amɛ AGWANGWAMA, nazhɛ bɛɛ zhɛ ma bu pana iyi nɛ ya kwulana amɛ bụ.

⁵Meme peni AGWANGWAMA hwɛ hwɛɛ bụ; patana bu rishe, nazhɛ bɛɛ zhɛ mo bu mbiyono,

⁶ubwa kaa zhɛ ba nda maa ge tiririri tụ bụ tu na ta raawụụ gana uhioko-uhwaŋna, maa tutono cɛn tụ ụshɛrɛya bụ tu na ta gana uwaŋna na wo vwo.

⁷Ima-isɛbwɛ maa shɛlana iyi nɛ AGWANGWAMA zhɛ a nda; kede amɛ bụ hashɛganụ iwɛ atwa na iyi zhɛmanɛ kwo kaa atwa na shɛ ogworozwo a na tuhaŋsa ta aba ti 'yaganɛ eshe o!

⁸Ganga tugwumana keeni isɛbwɛ tɛnda; amɛ-tụhaŋtụ kiri yaa shapɛ.

⁹Atwa na patanɛ AGWANGWAMA rishe aba zhɛ a lashɛga cɛnjɛ ta ata, ama ɛ zhɛ o unzo ogworozwo na tuba.

¹⁰I vwɛ cwɛŋ to ogworozwo zha shɛ a nama ya; okwo aba jalakaka aŋ, bi zha shɛ ba kwụba aŋ ya.

¹¹Ama atwa na meme zucinje zhɛ a lashɛga cɛnjɛ ta ata, ɛ zhɛ kaa a ya uraiŋ wa aba na tɛzhɛmana keeni amɛ-olom.

¹²Ugworozwo wa haŋsagana bụtụ bi tiririri iyi iwɛ, baa pa buvwa bwa rine ni i'ime tɛta bụ.

¹³Ama AGWANGWAMA ba hinga ogworozwo ilɛtu, iwɛnɛ ti bee mepi maa ụjita ti'ilono ta aba wo gwumwongonu ba kakayɛ.

¹⁴Ogworozwo hwucwokwo otokwobi aba, o mbowo kaa itɛ ya aba maa a kwụnɛ okofwo keeni atwa na zasa iyi, maa kaa e iricinji atwa na a nda iyi nɛ teni cɛŋ.

¹⁵Ama otokwobi aba zhɛ a kwuna aŋ ni ikɛnyi aba, itɛ ɛtɛ ya aba kaa zhɛ yo dwotwogonu.

¹⁶Iyi ticwɛŋ nɛ bụtụ bi tiririri 'yajɛ, i zhɛmɛ yee hwuri uduciya we elele na ogworozwo 'yajɛ.

¹⁷AGWANGWAMA zhɛ a lashɛga kaa ukpahiŋ wo ogworozwo, ama bi zhɛ tuba bo shikicingo una wa atwa wa tiririri.

¹⁸AGWANGWAMA zhɛ a ngbaraka atwa na zasa unu-tusapa; cɛnjɛ ta ata kaa ti zhɛ ta sha iyi-yo-ogwu aba tutu unyizo-nom.

¹⁹Ezuye zha shɛ a sha aŋ na aka awɛ o, iyi kaa zhɛ ya balana aŋ okwo na aka imunɛ-tiya.

²⁰Ama ogworozwo zhɛ a nda ufwu; atwa i'ime AGWANGWAMA zhɛ a inanga eshe gana tusumbo ta ambɛ; ɛ zhɛ o hwuwowu gana nshikwo.

²¹Ugworozwo zhɛ na una iyi, bi zha shɛ kaa ba ala tụtụpa kwukwuŋ, ama bụtụ bi tiririri zhɛ na pana atwa apwaŋ kwakwa ni iwɛ tumapa.

²²Atwa na AGWANGWAMA peni uwebiye aba zhɛ a lashɛga cɛnjɛ ta ata, ama ɛ zhɛ tuba o unzo atwa na bee keleni-unu.

²³AGWANGWAMA ubwa ba zarɛga bụtụ nu uhwaŋna na maa dulo, ubwa kaa bo shikicingo atwa na o lomicingo bu amɛ dimi.

²⁴Okwo ee leyi, a zha shɛ o woto apata o, iwɛnɛ ta AGWANGWAMA zhɛ ɛ ishicinjɛ aŋ.

²⁵N shɛwa la usemberi, uuwa Nga injɛ ya hwuwayɛ, N ta kwụbɛ shɛ kaa ta AGWANGWAMA jineci bụtụ bi tiririri kwukwuŋ; kwo kaa ta miaụŋ mu bwa ma lụpa iyimɛyɛ o.

²⁶Aka elele ubwa ba pana atwa iyi arahaŋ, ubwa kaa ba unanga atwa iyi, miaụŋ mu bwa kaa mi zhɛ me gwoje.

²⁷Ishɛga no olugwo iyi iwɛ, na nda iyi ibiye, nazhɛ ajalalo bu zhɛ a nama na cɛnjɛ ta ata unyizo-nom.

²⁸AGWANGWAMA o lubo ụshɛrɛya u tishiriri, bi zha shɛ kaa bo jinoko atwa ubwa tijilo. Ubwa ba jilanɛ atwa tiririri unyizo-nom, ama bi zhɛ tuba bo unzo ajalalo ogworozwo.

²⁹Atwa tiririri zhɛ a lashɛga cɛnjɛ ta ata, ɛ zhɛ a gɛga na tuba unyizo-nom.

³⁰Bụtụ bi tiririri ba duma n-ndumwa ma ahaŋsa tuto, aka elele bụratụ bu bwa kaa ba duma iyi nɛ namɛ ririri.

³¹Ba untangana undwa wa Agwatana ubwa na amɛ ubwa, bi zha shɛ kaa ba gangaa uŋ kwukwuŋ.

³²Ugworozwo wo gwubogo bụtụ bi tiririri, bu na jala maa kwụna bụ.

³³AGWANGWAMA zha shɛ o lono kaa maa kalana bụ ukpahiŋ wa atwa i'ime ibwɛ kwo kaa maa gwushigo tụwụma tu na bɛɛ zhɛ ba pana bụ na aka na ti bee menji bu o.

³⁴Shɛlana AGWANGWAMA, untangana unu ubwa tụpana; bi zhɛ mo bu gombicingo na cɛnjɛ ta ata bɛɛ zhɛ ma bu pana, bi zhɛ kaa ba kwụba to ogworozwo a nda ufwu.

³⁵N kwụbwa la ugworozwo uko na 'yajɛ ukpahiŋ duwa; bɛ njɛshɛ bee hwuri bụtụ be elele, gana ụ'wụ'wụ usobu na shikeni nu uwapa Lebanon;[19]

³⁶ti yaa namɛ fwalaa Ngee keshici apata, bu zasaba ya o; Ngee jelekeci bu, N kwụbɛ shɛ bụ ya o.

³⁷No shiyono bụtụ na zasa unu-tusapa eshe, nazhɛ ɛbi zhɛ ba mapa bụtụ bi tiririri; bụtụ ba amɛ-olom kaa ba 'yaga ajalalo ne ekwunyi.

³⁸Ama atwa iwɛwɛ zhɛ o ilono hwɛɛ aba, ɛɛ zhɛ kaa o iricingo du ajalalo ogworozwo.

³⁹AGWANGWAMA o bicingo atwa tiririri, baa jilanɛ aŋ kaa na aka ụbaụta.

⁴⁰AGWANGWAMA o mbiyono aŋ baa lashɛga aŋ; boo bicingo aŋ no olugwo ogworozwo, iwɛnɛ ta a zhagana bu iwɛ maa sha bikepi ba aba.