Read bassa SHƐZUNGA TUZUNGANGANA AGWANGWAMA 42 Bible Online

SHƐZUNGA TUZUNGANGANA AGWANGWAMA 42 - bassa bible

SHƐZUNGA TUZUNGANGANA AGWANGWAMA 42

¹No Ofwo Iyɛri ya Azụnjɛ: Azunga-Ụzhɛla na Miaụŋ-me-eyi mu Kora mu Zunganganɛ AGWANGWAMA Gana na ta bụlụba ba hwungwatangwụ baa sala meni mu uhwulwo mu na ma fwunga, Oo Agwatana, gobwonu du mɛ bi sɛrɛ.

²I'uyɛ bu i n gwụmɛ, gabụ Agwatana uumwa. Aka na kwuŋ Ngɛɛ zhɛ ma zhajɛ maa ma twa eshe na bụ, gabụ Agwatanaa?

³Ma ugaga tu uwaŋna tụ ụjita, malaba mi mi kiri mɛ shɛ iyimɛyɛ mi; atwa i'ime mi mo n hoŋtono aka elele, ɛ hiɛŋ, ce kwuuŋ Agwatana ata bụ namɛ yaa?

⁴Amɛ mi a hashɛganụ tebiye aka na Ngee teyinje iyi nɛ koshikwo, aka na Ngaa zhagajɛ nu unyama wa atwa, eti zhe nu umwono wa Agwatana; Ngee zeriji aŋ na tahaŋnụ tizha, unyama wa atwa na shɛmɛ sha aba shi lemi, a zunga azunga, aa ugaga, aa shɛtana Agwatana.

⁵Iwembe po amɛ mi hashɛganụụ? Iwembe po Ngaa 'yajɛ amɛ-tụhaŋtụụ? N zhɛ ma shɛlana Agwatana, Ngɛɛ zhɛ kaa ma shɛtana bụ sasana, ubwa shɛ Bibicinji mi keeni Agwatana mi.

⁶Oo Agwatana mi, ohwulu ma n nda bwuu bwuu, na amɛ ti'ima tu ga, ibɛ po Ngaa jɛshɛrɛjɛ tuhaŋsa ti mi pu bwa.

⁷Ubwa tumwanɛ ụngwụ-tuhwuga maa u n urigeni gana adanga; tusukwutogwu tu ma n uganana gana meni na ma zhagajɛ, gana meni na ma kala udundu maa bizharangwụ ni Ishɛmɛ Hemon keeni bikpekwu bu Miza moo zuborogono nu Urefu Jodan.

⁸Ga AGWANGWAMA m mbiseni tulubo tu bwa ti tikpeke nu uwaŋna, iwɛ maa tuba Ma zunga azunga nụ ụjita, na adua tɛnda pa Agwatana na 'yajɛ uraiŋ mu.

⁹N hiɛŋ Agwatana na shɛ ijilɛni mi, Iwembe po isɛbwɛ mi ibu 'wii? Iwembe po mo rungo nụ ụkwụla-tuta iwɛ umungwuta na atwa i'ime mi shɛmiaụŋ ma n ndaa?

¹⁰Tutwa ta aba tu ma n gwụcanga tedure ni iheŋtene nɛ a n uranjɛ, ɛɛ hiɛŋ, Ce kwuuŋ Agwatana ata bu namɛ yaa?

¹¹Iwembe po amɛ mi hashɛganụụ? Iwembe po Ngaa 'yajɛ amɛ-tụhaŋtụụ? N zhɛ ma shɛlana Agwatana, N zhɛ kaa ma shɛtana bụ sasana, Ubwa shɛ Bibicinji mi na Agwatana mi.