Read bassa SHƐZUNGA TUZUNGANGANA AGWANGWAMA 44 Bible Online

SHƐZUNGA TUZUNGANGANA AGWANGWAMA 44 - bassa bible

SHƐZUNGA TUZUNGANGANA AGWANGWAMA 44

¹No Ofwo Iyɛri ya Azụnjɛ: Azunga-Ụzhɛla na Miaụŋ-me-eyi mu Kora mu Zunganganɛ AGWANGWAMA Oo Agwatana, tu hwugwa na acɛbɛ tu, eshi tu utu mbiswo iwɛ ugondu ụ'wụtụ na abɛ njɛ la na aka aba, ibɛ shɛ na aka cala cala.

²Gana na ebu unzhi la anya edenji ni ikɛnyi bu, nazhɛ ebi shikicinji kaa atwa bu na cɛnjɛ ta aba; gana na ebi peni anya edenji ata ulwapɛ, abɛ njɛ tuba maa ga i zhɛmanɛ atwa bu ikɛnyi bu.

³Shɛ nu utokwobi la atwa bu leshiji cɛnjɛ ta ata o; a lasụ sụ tụ kaa nu ukpahiŋ ikɛnyi ya aba o; semi nu ukpahiŋ bụ keeni ikɛnyi u'ala bụ, na tunama te eshe bu ibɛ mbiseni caakwụ maa bu lubi aŋ.

⁴Gabụ bɛ shɛ Agwuma mi na Agwatana mi, gabụ bi peni atwa bu ukpahiŋ u tụlasụ,

⁵tedure nu ukpahiŋ ata bu kaa ibɛ po eti rikeci atwa i'ime tu. Tedure ni izeci bu kaa atu lasatagwụ atwa na ga tu sukakana.

⁶N tɛtanɛ shɛ uta mu rishe o kwo kaa utokwobi mu maa ibɛ eri mo m bicingo;

⁷ama gabụ bi ti bicinji no olugwo atwa i'ime tu, ebi rikeci kaa atwa na ma tu sukakana.

⁸Ti zhɛ tu na bu shɛtana aka elele maa tu na bu 'walụ unyizo-nom.

⁹Ama bi ti jeneci ya kaa hwuwayɛ, ebi leni maa kaa e ti rikeci; gabụ kaa bi zhe shi ya tahaŋnụ ne ejeshi tu o.

¹⁰Gabụ bu po eti gezhigeni atwa i'ime tu, ibɛ po ee suji i'wɛŋnɛ tu hwɛɛ iwɛ ikɛnyi aba.

¹¹Gabụ bi leni maa a tɛ shɛrɛ gana agwụdụ; gabụ kaa bi ti gereteji maa ta zha na cɛnjɛ ta anya edenji.

¹²Gabụ bi senji atwa bụ nu ulumo ticwɛŋ gana maa bi heŋshi iwɛ aba maa ule wa aba twa sụ o.

¹³Anya tu kwụbɛ iyi nɛ abɛ tɛ njɛ, ibɛ po aa ma tu nda asada, aa ma tu hinga kaa ilɛtu.

¹⁴Gabụ bɛ njɛ maa ụpụrụsa ɛtɛ 'imɛ na ashashɛ anya edenji; aa ma tu nda asada na azhɛkwa.

¹⁵N namɛ nụ ụpụrụsa aka elele; ezuye kaa 'imɛ eshe mi

¹⁶tedure na asada keeni tutwa tu na Ama hwuga no olugwo atwa i'ime mi.

¹⁷Okwo ti ijɛ iti vwutengeni kpaaŋ, isɛbwɛ bu kaa iti 'wi shi o; tu bweji shi kaa unu na abu twa no tu o.

¹⁸Ti genji shi kaa tɛcara tu tu na bụ o; ti genji shi kaa unu wa andwa bu tuhwuga o.

¹⁹Okwo ti yaa shɛ gana ata gabụ bi ti gengeni ecwee, tu zasa kaa bụtụ maa mo ti mbiyono; ebi ti jinekeni tishi tu na tu hwuri mo'inswo.

²⁰Yaa shɛ eti genji Agwatana tu tɛzhɛba, oto sugono tuwa ta anya edenji i'ɛlɛ tu na adua,

²¹aga sha bu towo iŋ ugbe, iwɛnɛ ebi mepi iyi tusweci nɛ namɛ na shɛmɛ shi tu.

²²Ama iwɛ bu kiri aa ma tu kwụna tutu ụrụmɛ, aa ma tu nda gana agwụdụ na aa shɛla.

²³Oo AGWANGWAMA, zhinjɛ! Iwembe po obo woto malabụụ? Mɛmɛ ishicinjɛ! To tu jinoko unyizo-nom o!

²⁴Iwembe po abu ma tu swakanaa? Kede isɛbwɛ ụbaụta tu keeni umungwuta na aa tɛ nda ubu 'wi o!

²⁵Ti leyi na cɛnjɛ otu hwuŋpilongwu; ee ti rikeci nu upwupwutu.

²⁶Zhajɛ maa iti mbiyeni! Iti bicinji tedure no tulubo tụ bụ tụ 'wụtụ!