Read bassa SHƐZUNGA TUZUNGANGANA AGWANGWAMA 48 Bible Online

SHƐZUNGA TUZUNGANGANA AGWANGWAMA 48 - bassa bible

SHƐZUNGA TUZUNGANGANA AGWANGWAMA 48

¹Azunga na Miaụŋ-me-eyi mu Kora mu Zunganganɛ AGWANGWAMA AGWANGWAMA gembi duwa, ga a shɛtana bu du te gembi tebiye nụ ụshɛpwụ ata wa Agwatana tu, ne bikpekwu bwa bi tijilo.

²Zayon Ishɛmɛ ɛtɛ ya Agwatana zeci yaa pilanụ kaa; ụshɛpwụ ata wa agwuma a'wụtụ shapɛrɛganɛ atwa unyizo kpaaŋ unyasa.

³Agwatana mbiswonuo maa tibicingo tu namba kaa na amɛ na amɛ ikepi ụshɛpwụ ata.

⁴Shɛgwuma shi momo sutulonu urubwo uko, aa zhajɛ maa e kepengeni Ishɛmɛ ɛtɛ Zayon.

⁵Ama aka na ta a kwụbɛ iŋ, yaa dama aŋ; inyɛsɛ shɛ aŋ, ee gezhiji.

⁶Tɛzhɛgɛda ti inyɛsɛ tɛ 'imɛ aŋ apata, ibɛ po amɛ kwuni aŋ tụlụmanga gana biyikwo na zhɛ ba mata yɛu.

⁷Ebi iricinji aŋ gana ihɛŋtu tinyakpa nyakpa nɛ banɛ nu Tashish, ebu bwereteji aŋ nu uvwugo na banɛ geri bu uwaŋna-banụ.

⁸Tu hwugwa iŋ, atu kwụbwa iŋ ya nụ ụshɛpwụ ata wa Agwatana tu, na shɛ AGWANGWAMA na Hwuri Kpaaŋ; Agwatana ubwa kaa zhɛ ba ngbaraka ụshɛpwụ ata maa u nama lapiya unyizo-nom.

⁹Oo Agwatana, tu hoŋswo iwɛ tulubo ta ata tụ bụ tụ 'wụtụ na amɛ umwono ata bu.

¹⁰Oo Agwatana, atwamwa ma bu dumanga no ofwo elele, urishi bu kaa botogwu cɛnjɛ tu unyizo kpaaŋ. Gabụ kaa bu untanganɛ ofwo elele ne tiririri.

¹¹Ga shɛmɛ sha atwa Zayon shi lemi! Ga unyasa tubwada nama na ashɛpwụ Juda; iwɛnɛ ta abɛ jɛmɛ ashɛrɛya na teni cɛŋ!

¹²Ahiɛba atwa Agwatana, zhaga ma tahaŋnụ maa hi rinji Zayon maa kaa hiɛ rɛcɛ shɛshɛkpa shɛ bwa;

¹³mapa ma uba ubwa, manga ma tukapanga tu bwa, iwɛ maa hi mbishi uwaŋnɛ na te e ci, maa:

¹⁴Agwatana ga, ubwa shɛ Agwatana tu uuwa unyizo zhe gwuere; ubwa zhɛ ma ti 'yagaga tutu unyizo-nom.