Read bassa SHƐZUNGA TUZUNGANGANA AGWANGWAMA 58 Bible Online

SHƐZUNGA TUZUNGANGANA AGWANGWAMA 58 - bassa bible

SHƐZUNGA TUZUNGANGANA AGWANGWAMA 58

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA, bɛɛ hiɛŋ, Te iricingo iyi Elele Kpaaŋ o Ahiɛba ehiu,[37] hia duma ba n-ndumwa mu na mu namɛ ririri kaa? Hia duma ba ụshɛrɛya wa atwa kpaaŋ te teni cɛŋ kaa?

²Awo! Semi iyi iwɛ tɛnda kiri ahia haŋsa, ahia nda abwagara ɛ ci'nyɛ na cɛnjɛ tu unyizo.

³Atwa na shɛ ogworozwo 'inɛ te kwuni taa na amɛ ono aba; a dwa-cibɛ te kwuni taa nụ ụjita na ee meci aŋ.

⁴Mangayɛ mu na mɛ shɛ gana mu na ma ahwa mi shini na shɛmɛ sha aba; ee sukekeni shɛcɛbɛ sha aba gana uluwu na shɛ akwụrụ,

⁵na hwụjɛ shɛ rụhwụŋ ra bɛnjɛ bu nlayɛ, kwo kaa anjɛ tishino a na shɛ egwoni iyi elele.

⁶Oo Agwatana, kwusataga shine shi unu wa aba, Oo AGWANGWAMA, mushongo agacɛ mangayɛ mi izeci ɛtɛ.

⁷Ga a inanjɛ eshe gana meni mu na ma hwuŋtana; ga a lụmbɛ gana ambɛ[38] na namɛ nụ ụzalụ uhwaŋna.

⁸Ga a shɛ gana ugodowuŋ na wa bana ụsharamụ; ga a shɛ gana yɛu nɛ 'wi nazhɛ ee meci iŋ inɛɛ nɛ eshe ibɛ kwụbɛ shɛ uhioko-uhwaŋna u tupohondo.

⁹Ɛ zhɛ o gwubo aŋ gana ambɛ tobwolo e te mepi shi o; Agwatana zhɛ o hwulupono aŋ ni isɛbwɛ ibwɛ mangayɛ, na aka na aa ta hwungwa.

¹⁰Atwa tiririri zhɛ na bwada unyasa aka na aa kwụbɛ ta a tụpana atwa iwɛwɛ iyi nɛ aa nda; ɛ zhɛ o rukoto mehieŋ mo ogworozwo.

¹¹Atwa zhɛ ɛ hiɛŋ, Ule nambana ga atwa tiririri gom; Agwatana ga namba baa duma ụshɛrɛya unyizo ga gom.