Read bassa SHƐZUNGA TUZUNGANGANA AGWANGWAMA 68 Bible Online

SHƐZUNGA TUZUNGANGANA AGWANGWAMA 68 - bassa bible

SHƐZUNGA TUZUNGANGANA AGWANGWAMA 68

¹No Ofwo Iyɛri ya Azụnjɛ: Azunga na ge Devid Zunganganɛ AGWANGWAMA Ga Agwatana ishijɛ maa garataga atwa i'ime ibwɛ. Ga atwa na to bu ni i'ime gezhigeni bu.

²Gana na tu uvwugo wo sugo nshikwo, gobwonu du obo unzo aŋ; gana na ta manɛbɛ manyɛshɛ mo no nu ulwa, gobwonu du ogworozwo zhɛ a nda ufwu na agba Agwatana!

³Ama amɛ atwa tiririri zhɛ o lomo, ɛɛ zhɛ a bwada unyasa na agba Agwatana; u'waba zhɛ wa hia aŋ, ɛɛ zhɛ a kala n'ungwa mu unyasa!

⁴Zungangana ma Agwatana azunga, shɛtana ma izeci ibwɛ na azunga; shapɛrɛgana ma Bụtụ ata ba suka odomu[46] rụhwụŋ ra azunga na azuba. Ɛ hiɛŋ izeci ibwɛ AGWANGWAMA, nda ma unyasa na agba ubwa!

⁵Agwatana na namɛ na ajɛjɛ ubwa tijilo, ubwa ba ngbaraka e'weteji, ubwa kaa ba jilanɛ olulo.

⁶Agwatana ubwa ba pana bụtụ na zasa bụtụ ihwɛ maa nama, baa bacɛnga kaa ajama nu umwono-tishi nu unyasa maa a mama 'yaga, ama atwa tigezhe zhɛ a nama na cɛnjɛ tu undolo.

⁷Oo Agwatana, aka na ebu hwuri umbe na atwa bụ, aka na aba zha tahaŋnụ, obo dulogo ụshɛka,

⁸cɛnjɛ ti zhingotu, tụla ti 'wɛŋ eshilo, iwɛ tɛzhajɛ ta Agwatana Sainai,[47] na shɛ Agwatana Isrɛl.

⁹Oo Agwatana, gabụ bɛ njɛ maa ge eshilo na gembi ngbi maa hiɛciɛngananɛ cɛnjɛ tụ bụ tu na ti ge 'wi.

¹⁰Atwa bụ mo nhwaŋ ma aba na tuba; aba pana okofwo iyi ukekeshi wa aba na amɛ uwebiye bu.

¹¹AGWANGWAMA ubwa ba pana-unu, ibɛ po ugombo tukaana ụ shɛ una unyama wa atwa na 'waŋnɛ unabarɛ ubwa o mburusonu, ɛɛ hiɛŋ.

¹²Shɛgwuma ne ejeshi aba gezhiji! Ibɛ po eyikwo na namɛ ni ihwɛ dwotwogonu i'wɛŋnɛ nɛ ujasa yɛ.

¹³Aka na ehi weteji nu nsumo ma agwụdụ, hiɛ shɛ gana nkwucimo mu na ee sweni azụrụfa a na kaa ee sweni azhɛnarɛya tungarangara na cɛhiɛŋzhɛ ta aba.

¹⁴Aka na ta Agwatana na Hwuri Kpaaŋ gereteji shɛgwuma ni Ishɛmɛ Zalmon, bɛɛ 'wɛŋ tulom apata.

¹⁵Oo gabụ ishɛmɛ ɛtɛ i'wɛtwɛ Bashan; Oo nshama mu Bashan mu na mi zeteji!

¹⁶Ahiɛba nshama mu na mi zeteji, iwembe po ahia kala ishɛmɛ nɛ kwụlanɛ Agwatana maa gɛga ashɛrɛnganɛɛ? AGWANGWAMA kaa zhɛ a gɛga apata unyizo-nom!

¹⁷AGWANGWAMA banɛ ni Ishɛmɛ Sainai[48] bee teni no ohwolu tijilo ni ihɛŋtu ujasa nɛ gembenji; inɛɛ nɛ ufwugwo ibɛ i shɛ igbɛɛ igbɛɛ.

¹⁸Gabụ bu munji taa no ofwo na zeci, ebi zeriji atwa na ujasa ga lasụ nụ ụhaŋtụ bụ ụ cɛnjɛ; ebi lesheji apwaŋ no olugwo atwa tigezhe. AGWANGWAMA Agwatana kaa zhɛ a gɛga apata.

¹⁹Ge e zhemonjino AGWANGWAMA na ma tu 'waŋnana i'wɛŋnɛ iyi-heri elele; ubwa kaa shɛ Agwatana na mo ti bicingo.

²⁰Agwatana tu shɛ Agwatana na bo bicingo bụtụ; ubwa shɛ AGWANGWAMA Agwatana tu, na ma tu lashaga no tu'wo.

²¹Agwatana kaa zhɛ a bwarataga ohiuhiu atwa i'ime ibwɛ tilɛɛ, aba shɛ atwa ata a ta tuhwulo ni ihwɛŋnɛ iwɛwɛ ya aba tutuu.

²²AGWANGWAMA dumwa, bɛɛ hiɛŋ, N zhɛ mɛ bɛcinjɛ atwa i'ime bu maa a banɛ nu Bashan maa e gwure; N zhɛ mɛ bɛcinjɛ aŋ ne me'ilwo mi itekwu maa e gwure,

²³iwɛ maa fwundacɛ mehieŋ[49] ma aba, keeni maa shiwawa shi hiŋ shi senji mu gana elele na aa jala.

²⁴Oo Agwatana, atwa kpaaŋ kwụbɛ tufwundaka ta tahaŋnụ tụ bụ, keeni tubana tụ bụ maa bɛ shɛ Agwatana keeni agwuma mi, maa teni no ohwolu bu tijilo.

²⁵Azụnjɛ hwuri umbe, e'nyemi iyi lɛ ekwunyi, miaụŋ-mo-o mu na ma 'nyama shikoko mu zweni tuba na ashashɛ. Ɛɛ hiɛŋ,

²⁶Shɛtana ma Agwatana na tu'ulwatagwụ ta atwa ubwa tụ 'wụtụ 'wụtụ; ahiɛba ajalalo Jekob kpaaŋ shɛtana ma AGWANGWAMA!

²⁷Gɛ Bɛnjamin, na shɛ ụlamụ na 'nyanɛ hwɛɛ, ubwa banɛ hiiŋ, nazhɛ urubwo we ehwurembe Juda 'wa, atwa na 'wa aŋ shɛ ehwurembe Zɛbulon keeni a na Naftali.

²⁸Oo Agwatana, mbisono ukpahiŋ bụ, ubwa shɛ ukpahiŋ ata na abɛ njɛ la uhwara iwɛ tu.

²⁹Shɛgwuma shɛ bụ 'waŋnanɛ apwaŋ iwɛ umwono bu na namɛ nu Jɛrusalɛm.

³⁰Tazhɛgana atwa Ijipti a na shɛ gana isundɛ ehilo nɛ zweni ne eninjidegbe; tazhɛgana edenji ata na shɛ gana inɛ ye eyi, uuwa i ci aka na ee bu kwuzeni hwɛɛ aba maa e bi peni azụrụfa aba. Garataga[50] atwa ata o lubo ujasa tɛnda!

³¹Lono maa gɛ ɛtumburɛ banɛ ni Ijipti; lono maa atwa Etiopia e bu sugeni i'ɛlɛ ya aba na azuba kakayɛ, gabụ Agwatana.

³²Ahiɛba cɛnjɛ cɛnjɛ-ta-tugwama tu unyizo, zungangana ma Agwatana azunga; shɛtana ma Agwangwama na azunga,

³³ubwa shɛ bụtụ na ba suka azuba na namba cala cala; hioko, bu tumwanɛ rụhwụŋ ru bwa ru na ri 'yajɛ ikɛnyi gana uto.

³⁴Ananga ma ukpahiŋ wa Agwatana na igɛhi ibwɛ ubi atwa Isrɛl, ukpahiŋ ubwa kaa namɛ na tụla.

³⁵Oo Agwatana, igɛhi bu hwuleji ta abu banɛ no ohwolu bu[51] tijilo, gabụ bɛ shɛ Agwatana atwa Isrɛl! Ubwa kaa ba pana atwa ubwa ikɛnyi keeni ukpahiŋ. Ge e zhemonjino Agwatana!