Read bassa SHƐZUNGA TUZUNGANGANA AGWANGWAMA 81 Bible Online

SHƐZUNGA TUZUNGANGANA AGWANGWAMA 81 - bassa bible

SHƐZUNGA TUZUNGANGANA AGWANGWAMA 81

¹No Ofwo Iyɛri ya Azụnjɛ:: Azunga na ga Asaf Zunganganɛ AGWANGWAMA Uganana ma Agwatana na ma tu pana ikɛnyi n'ungwa mu unyasa; zungangana ma Agwatana Jekob azunga ashɛtwa!

²Jwɛ ma azunga taawụụ no okoko ti'nyama, keeni rụhwụŋ rụ ụlatụ nu ugweje keeni aduma ti'nyama.

³Hwulupono ma ukakacɛ iwɛ ụjita isene, aka na tu upiana ufwo banɛ keeni aka na tu upiana sepi uvwi cɛnjɛ.

⁴Inɛ gɛ shɛ undwa no ofwo atwa Isrɛl, yaa shɛ kaa okpogo Agwatana Jekob.

⁵Baa njɛ iŋ iyi unu-tɛtɛtagana no ofwo Josɛf; aka na tu boo rungo na cɛnjɛ ti Ijipti. Ngaa hwụjɛ rụhwụŋ ru ko ru na Ngee mepi shi, rɛɛ hiɛŋ,

⁶M bu peshinji i'wɛŋnɛ ɛtɛ zhinengeni na aba bu;[68] Ngɛɛ bi shishijɛ kaa i'wɛŋnɛ ɛtɛ ye etemberi.

⁷Aka na abu namɛ ne tiriri, abu n suyanɛ, Ngee bu hwucice; tu Ngaa namɛ no ohwolu mi tusweci, Ngɛɛ bi jishijɛ nu uto.

⁸Oo atwa mi, shɛlaga ma unu mu tɛtɛtagana, ahiɛba atwa Isrɛl. I n kwụlanɛ maa hiɛ shɛlaga iwe mi.

⁹Hiɛ shɛ shɛ hia zhɛba tuwa te elele kwukwuŋ.

¹⁰Gamba n shɛ AGWANGWAMA Agwatana hiŋ, na ihi bɛcinjɛ na cɛnjɛ ti Ijipti. Kapɛshɛnga ma unu hiŋ kpataa, maa ma hiɛ pananjɛ iyimɛyɛ.

¹¹Ama atwa mi shiri shi acɛbɛ ni iwe mi o, atwa Isrɛl kaa hwụjɛ shɛ unu mu o.

¹²Ibɛ po Ngee leneni aŋ maa o to ihwɛŋnɛ ya aba i tigezhe, maa a njɛ iyi elele nɛ kwụlanɛ aŋ.

¹³Gana na yaa n kwụlanɛ maa atwa mi hwụjɛ iwe mi; i n kwụlanɛ duwa maa atwa mi Isrɛl a 'wa uhwaŋna mu!

¹⁴N ngɛ zhɛ me zucinje atwa i'ime ya aba kakayɛ; maa Mɛ yinjɛ ma sukakana atwa na a pana aŋ ụbaụta.

¹⁵Atwa na mo n imo zhɛ o kwuzo na agba mi ni inyɛsɛ; ulwapɛ wa aba kaa ụ shɛ unyizo-nom.

¹⁶Ama tuba N zhɛ ma hi biga ni iyimɛyɛ wit nɛ fwoni leelee, maa hi shiji ne meni mi iswɛ mu na mu banɛ ne ehilo.