Read bassa SHƐZUNGA TUZUNGANGANA AGWANGWAMA 85 Bible Online

SHƐZUNGA TUZUNGANGANA AGWANGWAMA 85 - bassa bible

SHƐZUNGA TUZUNGANGANA AGWANGWAMA 85

¹No Ofwo Iyɛri ya Azụnjɛ: Azunga na Miaụŋ-me-eyi mu Kora mu Zunganganɛ AGWANGWAMA AGWANGWAMA, gabụ bi hieci inyɛmɛnyɛmɛ ɛcɛnjɛ tụ bụ gabụ kaa bu gwuricingeni atwa Isrɛl tɛzhɛmana ta aba.

²Gabụ bi gengeni atwa bụ iwɛwɛ nɛ aa njɛ, ebu urigeni kaa iyi iwɛ ya aba kpaaŋ.

³Gabụ bi genji isɛbwɛ tɛnda na aba, ebu gwuricinji kaa isɛbwɛ ɛtɛ bu i'wɛtwɛ.

⁴Oo Agwatana, Bibicinji tu, utu gwuricinje sasana, ganga ya amɛ bụ tụhaŋtụ no tu!

⁵Bi zhɛ suu ba nda isɛbwɛ no tu unyizo-nom? Bi zhɛ suu ba uranga isɛbwɛ bu tutu awaŋnɛ na te e ci kpaaŋ?

⁶Bi zha shɛ suu bu mo tu vwongicingo sasana, iwɛ maa atuba na tɛ shɛ atwa bụ maa ta bụ shɛtana?

⁷Oo AGWANGWAMA, iti lubi no tulubo tụ bụ tụ 'wụtụ, maa iti bicinji.

⁸N shɛlajɛ iyi nɛ AGWANGWAMA Agwatana zhɛ hiɛŋ, bi zhɛ mo tu mbiso n-ndumwa ma amɛ-olom atuba na tɛ shɛ atwa ubwa, aba shɛ atwa ubwa tijilo a na gwure pu bwa na shɛmɛ sha aba hwɛɛ.[70]

⁹Ubino ubwa gwumwongonu pa atwa na a sụma bụ inyɛsɛ, iwɛ maa ga ụjɛrụma nama na cɛnjɛ tu tu.

¹⁰Tulubo ti tikpeke ti zhɛ ta twa na tɛcara; tiririri na amɛ-olom ti zhɛ tu mama ruwanganụ.

¹¹Tɛcara ta bụtụ ti zhɛ ta bana na cɛnjɛ maa tu munji, tiririri ta Agwatana tu na tu namɛ na azuba ti zhɛ ta mbiyanɛ tuta.

¹²Iiŋ, AGWANGWAMA zhɛ a nda maa iti zhɛmanɛ, ibɛ po cɛnjɛ tu tu ti zhɛ ta kaana iyimɛyɛ tumata.

¹³Tiririri ti zhɛ to hwulono AGWANGWAMA umbe maa tu na kalana bụ ụlamụ.