Read bassa SHƐZUNGA TUZUNGANGANA AGWANGWAMA 89 Bible Online

SHƐZUNGA TUZUNGANGANA AGWANGWAMA 89 - bassa bible

SHƐZUNGA TUZUNGANGANA AGWANGWAMA 89

¹Azunga Ụzhɛla na ge Etan na shɛ Bu'ezrahi Zụnjɛ Oo AGWANGWAMA, N zhɛ ma zungangana tulubo tụ bụ ti tikpeke azunga unyizo-nom; N zhɛ ma anangana awaŋnɛ elele tɛcara tụ bụ nu unu mu.

²M mepi maa tulubo tụ bụ ti tikpeke tu namɛ unyizo-nom, tɛcara tụ bụ kaa ti shikeni dimi gana tụla.

³Gabụ bi hiɛŋ, N nduwa unu-tutwa na bụtụ mi na Ngee teri; N shilwonuo kaa yɛu mi ugondu ge Devid unu, Ngɛɛ hiɛŋ,

⁴N zhɛ mo shikicingo ajalalo bu unyizo-nom, N zhɛ kaa Ma nda maa idwɛtwɛ tugwama tụ bụ namana awaŋnɛ elele.

⁵Oo AGWANGWAMA, ga atwa na namɛ na azuba shɛtana arụhwajɛ bụ; ga tu'ulwa ta atwa tijilo ti shɛtana tɛcara tụ bụ.

⁶Gaaba namba na tụla ụ sụbɛ AGWANGWAMAA? Gaaba namba na ashashɛ atwa azuba i shɛ gana AGWANGWAMAA?

⁷A sụma AGWANGWAMA inyɛsɛ na ashashɛ ajɛmɛ-ushaura tijilo; aa sụma bu inyɛsɛ uhwuri atwa elele na rungwutwonu bu.

⁸Oo AGWANGWAMA Agwatana, na Hwuri Kpaaŋ, i zasa bụtụ okwo bu ko na 'yajɛ ikɛnyi gana bụ o; Oo AGWANGWAMA, bɛ shɛ bụtụ tɛcara ni iyi elele kpaaŋ.

⁹Gabụ bɛ 'yajɛ ụhwada ukpahiŋ itekwu, gabụ kaa bo gwurusono isɛbwɛ ya adanga ibɛ.

¹⁰Gabụ bu kwụkwụtanganɛ udegbe ata gana ru'wo, gabụ kaa bi gereteji atwa i'ime bu nụ ụragbamụ ata bụ ikɛnyi.

¹¹Gabụ bɛ 'yajɛ azuba, cɛnjɛ tu unyizo kaa du tɛ shɛ ma tụ bụ; gabụ bɛ njɛ unyizo keeni iyi elele nɛ zweni nu bwa.

¹²Gabụ bu karɛ tuzuba keeni tuta; Ishɛmɛ Tebo keeni Ishɛmɛ Hemon ma bu shɛtana na azunga unyasa.

¹³Bi 'yajɛ ukpahiŋ duwa, ikɛnyi ụragbamụ bụ kaa gembi tebiye.

¹⁴Tiririri keeni ụshɛrɛya tishiriri ibɛ shɛ ukoshilo cɛnjɛ-ta-tugwama tụ bụ; iyi elele nɛ aba nda kaa yo mbisono tulubo tụ bụ ti tikpeke keeni tɛcara tụ bụ.

¹⁵Oo AGWANGWAMA, atwa na ma bu zhɛba na shɛzunga gwoje, aba shɛ atwa ata kaa o rungo nu uhioko-uhwaŋna iwɛ-tumapa bụ!

¹⁶Iwɛ bu upo aa bwada unyasa tutu ụrụmɛ, tiririri tụ bụ kaa tuba to gombicingo aŋ.

¹⁷Gabụ bɛ shɛ ụjɛrụma wa aba keeni ukpahiŋ wa aba, tedure ni iwɛ bu tumapa kaa ebi gembicinji ukpahiŋ tu.

¹⁸Oo AGWANGWAMA, gabụ bi teri bụtụ na shɛ ijilɛni tu, gabụ Agwatana Tijilo Isrɛl kaa bi ti peni agwuma tu.

¹⁹Gabụ bɛ jɛmɛ iwɛ na bụtụ bụ bu tɛcara no ozobu cala, ɛbi hiɛŋ, Gamba m peni busaza ata bu urishi ukpahiŋ. Gamba kaa m peni bụtụ ata Ngee teri na ashashɛ atwa idwɛtwɛ tugwama.

²⁰Gamba n njɛ yɛu mi ugondu ge Devid agwuma tedure na manɛbɛ me tijilo mu na Ngee dudugeni bu.

²¹I'ɛlɛ mi zhɛ ya untangana bu aka elele, ụragbamụ mu kaa zhɛ wa nda bu maa 'yaga ikɛnyi tutuu.

²²Atwa i'ime ibwɛ zhɛ a sukakana bụ, i zha shɛ kaa ya 'yagana aŋ eshe kwukwuŋ; ogworozwo kaa zha shɛ a ala bụ o.

²³N zhɛ ma kwụkwụtangana atwa na a sukakana bụ, N zhɛ kaa ma kwụna bụtụ be elele na bo imo bu.

²⁴Tɛcara ti mi, no tulubo ti mi ti tikpeke ti zhɛ ta nama nu bwa. N zhɛ kaa ma pana bụ ukpahiŋ maa bu na lasụ aka elele.

²⁵N zhɛ ma kaana cɛnjɛ-ta-tugwama tu bwa ugombo te kwune ni itekwu, i ci Urefu.

²⁶Bi zhɛ ma n uganana, bɛ hiɛŋ, Gabụ bɛ shɛ Bishi mi na Agwatana mi; gabụ bɛ shɛ ukpahiŋ mu ne Bibicinji mi.

²⁷N zhɛ ma nda bu yɛu mi ye eyi ihiiŋ, keeni agwuma na hwuri shɛgwuma kpaaŋ na cɛnjɛ tu unyizo.

²⁸Tulubo ti mi ti tikpeke ti zhɛ ta untangana bụ aka elele, unu mu tutwa kaa zhɛ wa nama nu bwa unyizo-nom.

²⁹N zhɛ mo shikicingo umwamwa ubwa unyizo-nom, idwɛtwɛ ibwɛ kaa zhɛ yo ilogogo gana tụla.

³⁰Ama yaa shɛ ajalalo ubwa 'wa sụ undwa mu, aa untanganɛ shɛ kaa onu mi tụpana,

³¹yaa shɛ kaa iwɛ shikpogo shi mi te shi aŋ, aa untanganɛ shɛ kaa onu mi tupananga.

³²Asha N zhɛ ma pana aŋ ulwapɛ no bukwuto iwɛ andwa aba tubwada, N zhɛ kaa ma pana aŋ ụbaụta no odugwu iwɛ iyi iwɛ ya aba.

³³Ama N zha shɛ tuba ma pashɛnga bụ tulubo ti mi ti tikpeke o, kwo kaa maa ma panɛ onu na Ngee shileni bu aba o.

³⁴N zha shɛ ma bwada unu mu tutwa nu bwa o, kwo kaa maa mo sheyingo unu na Ngee shileni bu o.

³⁵N shilwonuo bu unu kpalụ ko iwɛ aka kpaaŋ tedure ni izeci mi tijilo; N zha shɛ kaa ma dwatwagana Devid ụzagwụ o.

³⁶Ajalalo ubwa zhɛ a nama unyizo-nom, N zhɛ ma ngbarakana bu cɛnjɛ-ta-tugwama tu bwa tutu uwaŋna to tono.

³⁷Ti zhɛ ta nama tutu gana upiana, tiseyida tu bwa tɛ tɛcara tu namɛ na tụla.

³⁸Ama gabụ bɛ njɛ isɛbwɛ na agwuma bu na ebu dudugeni manɛbɛ ma tugwama, abu lacɛ bu, ebi jeneci bu ya.

³⁹Ebu bweji unu bu tutwa ni yɛu bu ugondu, ebu hwuŋpilenji udara ubwa nu upwupwutu.

⁴⁰Gabụ bu hwuŋzetenji uba ụshɛpwụ ubwa hwɛɛ, ebu hwuŋzetenji kaa tukapanga tu bwa.

⁴¹Atwa elele na a kashɛka apata o zundo ya iyi ibwɛ; anya ubwa kpaaŋ a hinga bu ilɛtu ya asada.

⁴²Gabụ bi gembicinji ukpahiŋ wa atwa na a sukakana bụ, gabụ kaa bɛ njɛ maa ga atwa i'ime ibwɛ kpaaŋ a na bwada unyasa.

⁴³Gabụ bɛ njɛ maa kede i'wɛŋnɛ ibwɛ ujasa 'yagana bu eshe o; ebi leni kaa maa ga a lasụ bụ nu ujasa.

⁴⁴Gabụ bi leshiji okwuto[71] ubwa ni i'ɛlɛ ibwɛ, ebi kelegeji idwɛtwɛ ibwɛ na cɛnjɛ.

⁴⁵Gabụ bɛ ingɛcɛnjɛ bụ tobwolo aka ti'inga tu bwa ge te ci shi o; ebu urigeni bu ụpụrụsa.

⁴⁶Oo AGWANGWAMA, bi zhɛ suu bu mama intana unyizo-nom? I ci ụkwụmbwụ naa isɛbwɛ bu zhɛ yo gorogo gana ulwaa?

⁴⁷Oo AGWANGWAMA, teyinje gana na tu uraiŋ mu namɛ kpendere; teyinje maa gabụ bụ tụ karɛ hwɛɛ tu na ti zhɛ to 'wo!

⁴⁸Gaaba zhɛ ba nama na zha shɛ bo 'woo? Gaaba eri bɛ lɛshijɛ ohwulu ubwa ne e'uyee?

⁴⁹AGWANGWAMA, ce tulubo tụ bụ ti tikpeke tụ ngwụshɛ tu namɛɛ? Tu gata ebi shileni la Devid unu na tɛcara tụ bụ.

⁵⁰Oo AGWANGWAMA, ne teyinje tutwa tu na aa twaga yɛu bu ugondu; keeni gana na Ngaa 'waŋnɛ tutwa ta atwa kpaaŋ[72]

⁵¹Oo AGWANGWAMA, atwa i'ime bu a twaga agwuma bụ na ebu dudugeni manɛbɛ mu tugwama. Aa twaga bu no ofwo elele na bee duri.

⁵²Ge tizhemonjino tɛ shɛ ma tu ta AGWANGWAMA unyizo-nom! Ami! Ami!