Read bassa SHƐZUNGA TUZUNGANGANA AGWANGWAMA 90 Bible Online

SHƐZUNGA TUZUNGANGANA AGWANGWAMA 90 - bassa bible

SHƐZUNGA TUZUNGANGANA AGWANGWAMA 90

¹Agwatana na 'Wi shi na Bụtụ na bo 'Wo Oo AGWANGWAMA, gabụ bɛ shɛ ihwɛ tu[73] i tunama na awaŋnɛ elele.

²Gabụ kaa bɛ shɛ Agwatana na namɛ tutu unyizo-nom. Nazhɛ abu karɛ nshama, abɛ njɛ maa ga cɛnjɛ tu unyizo tu nama.

³Gabụ bi hiɛŋ ga bụtụ gwuri ni iyi nɛ baa ga shɛ la; ebi sheyinji bu ga, bee gwuri nu upwupwutu!

⁴Shiywa akpakwụ-ata shɛ bu shanɛ maa ụjita uko gba; ụ shɛ gana ti wenebe na koshikwo, waa shɛ gana ta auwa na njɛshɛ shɛ na amɛ ụjita.

⁵Gabụ bu tu suji gana ufwunga meni mu na mu zhagajɛ; ti ilegeji shi uhwuri ụwalabụ o. Tɛ shɛ gana ambɛ na a saba nu uvwungwa,

⁶a na a waŋna, tusumbo ta aba ta bwadụ, ama ụrụmɛ shɛ o hwotono o 'wo ya.

⁷Isɛbwɛ bu iti iricinji; uriri isɛbwɛ ɛtɛ bu i'wɛtwɛ u tɛ 'imɛ.

⁸Gabụ bi tileni iwɛwɛ tu nu umbe bu, iwɛwɛ tu tusweci kaa namɛ nu uhioko-uhwaŋna na ebi eri ba kwụba.

⁹Iwɛnɛ po isɛbwɛ bu munananɛ uraiŋ tu tiya; waa lụmba, waa kwunanga swɛɛ swɛɛ.[74]

¹⁰Shiywa shi tu kpaŋ kpaaŋ shɛ shɛ dupu-nu-woshi, yaa shɛ atɛ 'yajɛ ikɛnyi, nazhɛ shɛɛ zhɛ sha sha dupu-nu-talacɛ; okwo ti yaa shɛ gana ata kaa amɛ-tụhaŋtụ[75] keeni ụngwụ-tuhwuga kiri shaa tu 'waŋnanɛ; hwuwayɛ hwuwayɛ go ti zhɛ to 'wo, asha inee tu kwunanjɛ.

¹¹Gaaba mepi ukpahiŋ isɛbwɛ bu kpaaaŋ? Gaaba mepi inyɛsɛ gɛnɛnɛ isɛbwɛ bu i'wɛtwɛ zhɛ ya 'waŋnɛɛ?

¹²Iti mbisegeni gana na tu uraiŋ tu namɛ kpendere, iwɛ maa ta inta na shɛmɛ shi tu.

¹³Oo AGWANGWAMA, ụkwụmbwụ gana naa isɛbwɛ bu zhɛ yo ilogogoo? Hioko inyɛmɛnyɛmɛ ya atwa na shɛ miaụŋ mụ bụ mu ugondu!

¹⁴No tu shidingo no tulubo tụ bụ ti tikpeke nu uvwungwa uvwungwa iwɛ maa tu na zunga azunga, maa tu na bwada unyasa tutu tu'wo tu tu.

¹⁵Iti peni unyasa te gembi i ci gana na ebi ti peni amɛ-tụhaŋtụ; kwo kaa i ci shiywa shɛ na eshe tu kwụbajɛ iyi iwɛ hwɛɛ.

¹⁶Lono maa atuba na tɛ shɛ miaụŋ mụ bụ mu ugondu ta kwụba ugondu bu ukpahiŋ; lono maa ga miaụŋ mu tu mụ kwụbɛ ụjɛrụma ata bụ ụ'wụtụ.

¹⁷AGWANGWAMA na shɛ Agwatana tu, utu ubi ni iwɛ-tumapa bu; shikicingo ugondu na ata nda ni i'ɛlɛ tu, ge iyi elele nɛ ata nda iti 'yagana eshe.