Read bassa SHƐZUNGA TUZUNGANGANA AGWANGWAMA 91 Bible Online

SHƐZUNGA TUZUNGANGANA AGWANGWAMA 91 - bassa bible

SHƐZUNGA TUZUNGANGANA AGWANGWAMA 91

¹Bụtụ be elele na ba zha pa AGWANGWAMA Mokondo iwɛ tijilanɛ; na kaa ba gɛga nu uhwuŋnu Bụtụ ata na Hwuri Kpaaŋ;

²ubwa eri bɛ hiɛŋ AGWANGWAMA, Gabụ bɛ shɛ bikepi mi keeni ijilɛni mi; na Agwatana mi na Ngaa patanɛ-rishe.

³Iwɛnɛ po ubwa zhɛ ma bu la ni iyi mazhanga nɛ swacɛ; keeni ụngwụ ụwɛ na wa kwụna bụtụ.

⁴Ubwa zhɛ mo bu urugono apiambɛ ubwa, u'ala ubwa ti'ima zhɛ mo bu bicingo. Tɛcara tu bwa kaa ti zhɛ ta sha abula ujasa na zhɛ ma bu jilanɛ.

⁵Bi zha shɛ ba nda inyɛsɛ iyi nɛ yo holono bụtụ nụ ụjita; kwo kaa a'inla na aa 'waŋ nu uwaŋna o.

⁶Kwo kaa ụngwụ ụwɛ na wo rungo ne tishi; kwo kaa iyi iwɛ nɛ ya nda iyi ufwu na aka bu uwaŋna kpataa o.

⁷Okwo atwa akpakwụ-ata a 'waŋtatangwụ na bụ'aŋbụ bụ; okwo atwa igbɛɛ-itɛ a 'waŋtatangwụ geri bu u'ala ubiye bu, ama i zha shɛ mo bu tumongono.

⁸Tungbaraka kiri ɛbi zhɛ ba ngbaraka ta a tụpana ogworozwo iyi iwɛ ya aba.

⁹Iwɛnɛ ta AGWANGWAMA shɛ bikepi bu,[76] Agwatana na Hwuri Kpaaŋ kaa ubwa shɛ ijilɛni bu;

¹⁰i zasa iyi iwɛ ye elele nɛ zhɛ mo bu ubo; tishikpe kaa ti zha shɛ to gwumwonu ni ihwɛ bu o.

¹¹Ubwa zhɛ ba pana atumwa ubwa azuba unu maa a na bu ngbaraka, maa a na bu 'yaka no ofwo elele na ɛbi zhɛ.

¹²Ɛ zhɛ ma bu sa ni i'ɛlɛ ya aba maa kede ɛvwɛvwɛjɛ bu twatwagwụ atayɛ o.

¹³Gabụ bi zhɛ bo rukoto bizeci keeni ugbezhi, ɛbi zhɛ ba fwundaka kaa yɛu bizeci keeni uhwa mangayɛ nɛ ɛvwɛvwɛjɛ bụ.

¹⁴Agwatana hiɛŋ, N zhɛ mo bicingo atwa na mo n lubo, Ngɛɛ zhɛ kaa ma jilanɛ atwa na mepi maa Gamba n shɛ AGWANGWAMA.

¹⁵Aka na a n suyanɛ, N zhɛ mɛ jishijɛ aŋ; aka na aa namɛ nụ ụbaụta, N zhɛ ma nama na aba. Ngɛɛ zhɛ kaa ma la aŋ maa ma pana aŋ ụjɛrụma.

¹⁶N zhɛ ma tụpa aŋ urugbo tiya, maa ụ shɛ ule wa aba; Ngɛɛ zhɛ kaa mo bicingo aŋ.