Read bassa SHƐZUNGA TUZUNGANGANA AGWANGWAMA 97 Bible Online

SHƐZUNGA TUZUNGANGANA AGWANGWAMA 97 - bassa bible

SHƐZUNGA TUZUNGANGANA AGWANGWAMA 97

¹AGWANGWAMA ubwa shɛ Agwuma, ga cɛnjɛ tu unyizo tɛ njɛ unyasa! Ga amɛ adakwụ ntokwu lemi!

²Odomu keeni tishi tu rungwutwonu bu; ba duma ụshɛrɛya ubwa ne tishiriri keeni te teni cɛŋ.

³Ulwa hwuri umbe nu bwa, wee hwoŋzhinji atwa i'ime a na rungwutwonu bu.

⁴Ɛbɛrɛ ubwa aba o hiokono unyizo uhwaŋna; cɛnjɛ tu unyizo tu kwụbɛ aŋ, ibɛ po taa zhɛgɛda.

⁵Nshama mi ni gana manɛbɛ-manyɛshɛ nu umbe AGWANGWAMA, nu umbe AGWANGWAMA na 'yajɛ cɛnjɛ tu unyizo kpaaŋ.

⁶Azuba a ananga tiririri tu bwa, atwa elele kwụbɛ ụjɛrụma ubwa.

⁷Ezuye shɛ atwa elele na a zhɛba tuwa, tuwa te elele tu to bizhiri nu umbe AGWANGWAMA.

⁸Oo AGWANGWAMA, atwa Zayon a hwụjɛ, ibɛ po amɛ aba lemi, ibɛ du po miaụŋ-mo-o mu Juda ma bwada unyasa, iwɛ ashɛrɛya bụ na aba duma.

⁹AGWANGWAMA na Hwuri Kpaaŋ, gabụ bɛ yɛ tugwama tɛ cɛnjɛ tu unyizo kpaaŋ; gabụ bi gembi duwa bu hwuri tuwa te elele.

¹⁰AGWANGWAMA o lubo atwa na o imo iyi iwɛ;[79] baa jilanɛ araiŋ atwa ubwa tijilo; baa lashɛga aŋ ni i'ɛlɛ yo ogworozwo.

¹¹Uhioko-uhwaŋna wa ta no ohiuhiu atwa tiririri, atwa na shɛmɛ sha aba shɛ namɛ rụmbɛɛ gwoje.

¹²Ahiɛba atwa tiririri kpaaŋ, na bwada ma unyasa iwɛ iyi nɛ AGWANGWAMA nduwa! Ne teyinje ma iyi nɛ Agwatana tijilo nduwa, maa hi 'walụ bụ.