Read bassa UTAKADAWE ESHI 11 Bible Online

UTAKADAWE ESHI 11 - bassa bible

UTAKADAWE ESHI 11

¹Bimenji bo orugwusu shanɛ AGWANGWAMA iyi-tupwaŋ, ama bimenji na teni cɛŋ shanɛ bu iyi unyasa.

²Aka na ta tubusa tu kwuni, ibɛ du ụpụrụsa we teni, ama bụtụ na meme zucinje, ubwa incɛ.

³Tɛcara ta atwa tɛkana ta 'yagaga aŋ, ama ubiribiri wa atwa tugbom wo iricingo aŋ nu ufwu tɛnda.

⁴Tɛzhɛgba tu zasa ule nụ ụjita wa amɛ-tụhaŋtụ o, ama tiririri to bicingo bụtụ no tu'wo.

⁵Tiririri ta atwa na zasa unu-tusapa, ta nda maa ge iyi elele nɛ aa nda nama du ririri. Ama tugworozwo ta kalagaga ugworozwo.

⁶Tiririri ta atwa tiririri ta lashɛga aŋ, ama ukwedeyi wa atwa tugbom wa ima aŋ gana ugwuru.

⁷Aka na tu ugworozwo 'wi, asha ashɛlatụ iyi nɛ baa ga nda hwuwowu du. Iyi nɛ kaa atwa na 'wa sụ Agwatana ngbaracɛ uhwaŋna ibɛ ya sha tɛgadaga.

⁸O bicingo bụtụ bi tiririri nụ ụbaụta, ama ụbaụta ata tuba ubwa wo jitono ogworozwo.

⁹Bụtụ na 'wa sụ Agwatana, ba nda binya bwa ufwu nu unu, ama bụtụ bi tiririri zhɛ ba banangana iŋ iwɛnɛ tu baa 'yajɛ iyi-tumapa.

¹⁰Aka na yaa zhɛmanɛ bụtụ bi tiririri, atwa ụshɛpwụ ubwa a bwada unyasa. Ama aka na tuba ugworozwo 'wi, asha amɛ atwa ụshɛpwụ ubwa lemi hwɛɛ.

¹¹Uwebiye nɛ ee peni bụtụ bi tiririri, ya kaana ụshɛpwụ ugombo, ama n-ndumwa mu ugworozwo mo hwuŋzo ụshɛpwụ ata.

¹²Bụtụ na ahaŋsa 'nyananɛ, ubwa ba nda binya bwa asada, ama bụtụ na eshiciji iyi, ba ima unu ubwa gbam.

¹³Bụtụ na ba bana urungo nu unabarɛ, bɛ vwɛ iyi tusweci uvwi, ama bụtụ bɛ tɛcara ba intana iyi tusweci dimi.

¹⁴Udenji we elele na zasa bi'yagajɛ, udenji ata zhɛ wa laya, ama ofwo na atwa na a haŋsa iwɛ gembi ufwugwo, tumama lashaga ta nama apata.

¹⁵Bụtụ be elele na ba la bugaiŋ i'ɛlɛ, bi zhɛ ba nda ụbaụta iwɛ ibɛ tilɛɛ, ama bụtụ na cimi shi ma bu na la atwa i'ɛlɛ, ubwa zhɛ ba banangana.

¹⁶Biyikwo na mepi iwɛ, 'yajɛ ụjɛrụma, ama uduciya kiri atwa na a nda abwagara a 'yaga.

¹⁷Bụtụ na lemi-amɛ ba ya ule wa amɛ-olom, ama bụtụ ba amiaụŋ mama nda iwɛwɛ.

¹⁸Tuhalakaka tuba tɛ shɛ utashɛ na aa tụpa ugworozwo, ama bụtụ na ba nda iyi tiririri ɛ zhɛ a tụpa bụ utashɛ na teni cɛŋ.

¹⁹Bụtụ na shɛ bụtụ bi tiririri gom zhɛ ba 'yaga uraiŋ, ama bụtụ na ba 'wa iyi iwɛ tɛnda, bo tono tu'wo.

²⁰Atwa ahaŋsa tibiribiri shanɛ AGWANGWAMA iyi-tupwaŋ, ama ba nda unyasa na atwa na zasa unu-tusapa.

²¹Mapa inɛ gɛ gom, maa ogworozwo zha shɛ a banangana ulwapɛ kwukwuŋ, ama ɛ zhɛ tuba a lashaga atwa tiririri nu ulwapɛ ata.

²²Biyikwo na pilanụ nụ ụzhɛ, na kaa zasa ahaŋsa ebiye, bɛ shɛ gana bukanɛ ba azhɛnarɛya na ee hwuŋteni ikemi ni inyɛnu.

²³Ukwunanga iyi nɛ atwa tiririri a nda ashɛlatụ ibɛ, i shɛ iyi ibiye, ama iyi nɛ ogworozwo ngbaracɛ uhwaŋna ibɛ ya kwunanga na amɛ-tụhaŋtụ.

²⁴Bụtụ na ba pana atwa iyi arahaŋ, ubwa kaa zhɛ na kaana iyi ti'yaga, ama bụtụ na ba nda tuwumanga, ubwa ba sha ya bukofwo.

²⁵Bụtụ na ba pana atwa apwaŋ, zhɛ na kaana bɛzhɛgba tisha, bụtụ na kaa bo mbiyono atwa vwɛ, ubwa du ɛɛ zhɛ no mbiyono.

²⁶Atwa a kalana bụtụ na ba swakaka iyimɛyɛ na lacɛ maa sangana atwa vwɛ unu, ama a dumanga tuba bụtụ na bɛ vwɛ maa bu na sangana atwa vwɛ.

²⁷Bụtụ na ba jala iyi ibiye zhɛ ba 'yaga uwaŋna-ubiye, ama bụtụ na ba dwalakaka iyi iwɛ, ubwa du iyi iwɛ zhɛ yo jitono.

²⁸Bụtụ be elele na tɛtanɛ uzhɛgba ubwa rishe, ubwa zhɛ ba vwunga[34] nazhɛ, ama bụtụ bi tiririri zhɛ na saba gana ambɛ olom.

²⁹Bụtụ na ba kalanɛ atwa ihwɛ ibwɛ uwuru, bi zha shɛ ba 'yaga iyi elele nu ukwunanga ubwa o. Alagwụ kaa zhɛ a sha bujama ba bụtụ na incɛ.

³⁰Iyi nɛ bụtụ bi tiririri[35] ba nda i shɛ gana ụ'wụ'wụ uraiŋ ama ebweji-undwa,[36] a vwungɛcɛnga atwa uraiŋ.

³¹Yaa shɛ aa tụpana atwa tiririri iyi nɛ aa nda nu unyizo ga, asha gabata du ɛɛ zhɛ a pana atwa iwɛwɛ keeni ogworozwo ulwapɛ tilɛɛ.