Read bassa UTAKADAWE ESHI 16 Bible Online

UTAKADAWE ESHI 16 - bassa bible

UTAKADAWE ESHI 16

¹Ti'imanganga tɛ shɛ inɛ ya ahaŋsa butugwumwa, ama n-ndumwa ma AGWANGWAMA muba mɛ shɛ ajɛshɛgwa na ulwa.

²Ihwɛŋnɛ nɛ bụtụ ba nda iyi teneni bu cɛŋ ne eshe ubwa, ama AGWANGWAMA a manga iyi nɛ namɛ na ahaŋsa bụtụ upo baa nda iyi.

³Utogono AGWANGWAMA ugondu we elele na aba imanganga, nazhɛ ti'imanganga ta ata tụ bụ ti zhɛ ta bu 'yagana eshe.

⁴Iyi elele nɛ AGWANGWAMA njɛ 'yaganɛ bu ecilo, okwo yaa shɛ ogworozwo, a njɛ aŋ iwɛ maa a njɛ aŋ ufwu jitoo ko.

⁵Tumama sata tɛ shanɛ AGWANGWAMA iyi-tupwaŋ, mapa gom maa bi eri shi ba banangana ulwapɛ na ɛɛ zhɛ ma bu pana tɛnda o.

⁶Tedure na tɛkana keeni tɛcara yo lono maa e gengeni bụtụ iwɛwɛ ibwɛ, aka na ata sụma kaa AGWANGWAMA inyɛsɛ, nazhɛ ɛti zhɛ tu no gozhigono iyi iwɛ.

⁷Aka na ti ihwɛŋnɛ nɛ bụtụ ba nda iyi yo lomicingo AGWANGWAMA amɛ, nazhɛ AGWANGWAMA zhɛ na nda du maa okwo atwa i'ime bụtụ ata 'yaga amɛ-olom nu bwa.

⁸I zhɛmɛ maa bụtụ 'yaga iyi cwɛŋ nu uhwaŋna tiririri, uhwuri maa bụtụ 'yaga iyi duwa nu uhwaŋna wo orugwusu.

⁹Butugwumwa ba imanganga iyi nɛ baa jala tɛnda na ahaŋsa ubwa, ama AGWANGWAMA ubwa zhɛ bo sokokono bu gana na maa tɛnda ti bɛ ti 'yaga eshe.

¹⁰Agwuma a duma n-ndumwa nu ụhwada na baa 'yajɛ, baa kwunanga kaa n-ndumwa me elele uzawa tishiriri tu'ubo.

¹¹AGWANGWAMA a jala timenji te elele tu na tu namɛ ririri keeni ma tu na tu nangwụ, te timenji tu uzhinono iyi elele nɛ teni cɛŋ.

¹²Iyi iwɛ tɛnda shanɛ shɛgwuma iyi-tupwaŋ, ne tiririri ibɛ idwɛtwɛ tugwama yo shikono.

¹³Agwuma a nda unyasa na bụtụ na ba duma iwɛ ne tiririri. Boo lubo kaa du bụtụ na ba duma iwɛ te teni cɛŋ.

¹⁴Isɛbwɛ ya agwuma ibɛ shɛ butumwa bo tu'wo, ama bụtụ na incɛ, ubwa eri bo kozhicingo isɛbwɛ ɛtɛ.

¹⁵Uhioko-uhwaŋna we eshe agwuma ụ shɛ gana uraiŋ iwɛ-tumapa ubwa kaa i shɛ gana cilwo te eshilo ɛhɛnɛnɛyɛ.

¹⁶Ti'inta tɛ zhɛmɛ[53] tee hwuri azhɛnarɛya, yaa zhɛmɛ kaa maa bụtụ teri iyi ti'eshicigo uhwuri azụrụfa.

¹⁷Pa'ụtụ iyi nɛ bụtụ bi biye ba nda, ya haba iyi iwɛ, bụtụ na kaa bo shiyono iyi nɛ baa nda eshe tebiye, baa jilanɛ uraiŋ ubwa.

¹⁸Tumama sata ta nda bụtụ ufwu, tubusa kaa ta kalagaga bụtụ.

¹⁹I zhɛmɛ maa ne meme zucinje maa shɛ yibwa bukofwo, uhwuri maa no dwotwogonu iyi nɛ ogworozwo a lashajɛ.

²⁰I zhɛ ya zhɛmana bụtụ na bo lono maa o no sokokono bu iwɛ, bụtụ na kaa ba patana AGWANGWAMA rishe gwoje.

²¹Atwa na incɛ aba aa suyana maa aba du 'yebi iyi tumanganga, n-ndumwa ma amɛ-olom kaa ma kaana ohwolu bụtụ ugombo.

²²Ti'inta ti shanɛ bụtụ na incɛ tụ gana umɛzhinjɛ uraiŋ, ama ụlagwụ wa pana shɛlagwụ ulwapɛ.

²³Atwa na incɛ a haŋsa tugwo iwɛ nazhɛ a jɛmɛ iŋ, n-ndumwa mu unu wa aba kaa ma kaana aŋ tugombicingo.

²⁴N-ndumwa ma amɛ-olom mɛ shɛ gana azanga iswɛ, ma latụmana kaa atwa na a hwuga mụ, maa shanɛ du tu'waba ta aba ulapiya.

²⁵I 'yajɛ ihwɛŋnɛ[54] nɛ i shɛ maa i teneni bụtụ cɛŋ, ama ukwunanga ibɛ tuba i shɛ ihwɛŋnɛ i tu'wo.

²⁶Iyi nɛ kwụlanɛ bụtụ, ibɛ ya ana bu ugondu, iwɛnɛ tu bee jeri shi maa ya-imunɛ.

²⁷Atwa tusashɛ aba du a haŋsa iyi iwɛ, n-ndumwa ma aba kaa mɛ shɛ gana ulwa na wo gorogo.

²⁸Bụtụ ba ahaŋsa tibiribiri bo tulono uwuru, tisharuwa kaa to bogwu eyejilo na go momo lubonu.

²⁹Bụtụ ba abwagara ba halakaka binya bwa, baa zarɛga bụ kaa nu uhwaŋna na zhɛshɛ.

³⁰Bụtụ be elele na ma bu kala ashɛrɛnganɛ, asha ba bu haŋsagana iyi iwɛ, bụtụ be elele na kaa jeri shi maa dumana iwɛ, bo lono maa ge iyi iwɛ teni.

³¹Tuhwaŋla, tuba tɛ shɛ ụjɛrụma iyɛri, bụtụ bu uraiŋ tiririri ubwa kaa ba 'yaga tụ.

³²Isɛbwɛ-ti'ima zhɛmɛ yee hwuri ukpahiŋ tɛnda nu ujasa, bụtụ na kaa ba ima-isɛbwɛ gbamụ bu hwuri bụtụ na lesheji ashɛpwụ a'wụtụ nu ujasa.

³³Atwa a 'waŋ icɛcɛ maa e mepi ukwulana wa Agwatana, ama AGWANGWAMA tuba ubwa bɛ bɛcinjɛ ajɛshɛgwa ibɛ.