Read bassa UTAKADAWE ESHI 17 Bible Online

UTAKADAWE ESHI 17 - bassa bible

UTAKADAWE ESHI 17

¹Uzhokwu na hweteni tiya ungwusangwusa ni ihwɛ ya amɛ-olom, debeji uhwuri iyimɛyɛ ye eligidi tiya ni ihwɛ nɛ lukwumi shi uwuru.

²Bujama na incɛ zhɛ ba sha agwuma-ihwɛ yɛu tisashɛ nɛ ga shɛ umamata, bujama ata kaa du zhɛ ba ya ogwu na aba gana maa bɛ shɛ ya umamata.

³Nu ulwa aa manga azhɛnarɛya keeni azụrụfa, ama AGWANGWAMA tuba ubwa ba manga shɛmɛ sha atwa.

⁴Bɛnjɛ bi iyi iwɛ ba hwuga-unu wo ogworozwo, ejwe-ụzagwụ tuba a hwuga-unu we ejwe-ụzagwụ du.

⁵Bụtụ be elele na ba nda bukofwo asada, asha bụtụ na karɛ bu baa twaga. Bụtụ be elele na kaa ba nda unyasa ta Abara-ne-ebe njɛ bụtụ, a zha shɛ a ganga bụ uzawa ulwapɛ tụpana o.

⁶Ajalụ shanɛ ogwunukwoshi aba udara, eshi miaụŋ tuba shanɛ miaụŋ ụjɛrụma.

⁷N-ndumwa mi biye mi teneni shi alagwụ cɛŋ o, gobwonu du n-ndumwa mu tusashɛ mi teneni shi agwuma cɛŋ.

⁸Ukwuribi ugworo shanɛ atwa na a pana uŋ gana iyi tishino. Maa geri elele bee duri ga i zhɛmanɛ bụ.

⁹Bụtụ na ba gangana bụtụ iyi iwɛ nɛ aa njɛ bụ, asha ba jala maa atwa no lubo bu, ama bụtụ na bo ndopilono iwɛ, bo bogwu tiyejilo to tulubo.

¹⁰Tɛtazhɛganɛ tu kpalụ ko gba ti gembi bụtụ na eshiciji iyi, uhwuri odugwu dipi-yebi na ɛɛ zhɛ a swananga alagwụ.

¹¹Iwɛ tigezhe kiri atwa awɛ a haŋsa aka elele, iwɛbɛ po ɛɛ zhɛ a tumwananɛ aŋ butumwa ba amiaụŋ.

¹²I debeji maa bụtụ twa nu ucwee na ee suji miaụŋ mu bwa, uhwuri maa bụtụ twa na alagwụ.

¹³Yaa shɛ bụtụ ubu njɛ uwebiye, aba tụpana bu tuba iyi iwɛ, iyi iwɛ zha shɛ ya bana ni ihwɛ bu kwukwuŋ.

¹⁴Tukwuno tu uwuru tɛ shɛ gana ukwokwo meni mu na mi keri uhwacɛ, nda maa ngwuricinji uŋ tu woo to mburusonu su.

¹⁵Bụtụ na peni bụtụ na n-ndumwa ga wụmɛ n-ndumwa-zhɛ, nazhɛ bee peni bụtụ na n-ndumwa ga zhɛmɛ n-ndumwa-tụwụma, hwɛɛ ibɛ iyebi shanɛ AGWANGWAMA iyi-tupwaŋ.

¹⁶Ule imbe alagwụ zhɛ a ya tu baa 'waŋnɛ ukwuribi ni i'ɛlɛ ibwɛ maa sa ti'inta, ta ahaŋsa kaa twa sụ bụụ?

¹⁷Tulubo te biyejilo ta nama aka elele, a mata buhongwu bụtụ iwɛ ụjita uwuya.

¹⁸Bụtụ na ahaŋsa twa sụ kiri zhɛ momo shiyono ufwafwa, maa la binya bwa na ga yɛ utashɛ i'ɛlɛ.

¹⁹Bụtụ be elele na bo lubo undwa tubwada, asha bo lubo du uwuru, bụtụ be elele na kaa ba ma odubo ubwa te zeci, bu mama suyananɛ ufwu tɛnda.

²⁰Iyi zhɛmanɛ shɛ bụtụ ba amɛ tibiribiri o, i zhɛ kaa ya wumana bụtụ na ba halakaka atwa nu n-ndumwa mu bwa.

²¹Yɛu nɛ lagwụmɛ ya hashɛgana amɛ bishi bwa, bishi bi yɛu nɛ amɛ ubwa suji shi kaa zasa unyasa o.

²²Unyasa ti'yaga duwa ụ shɛ gana unibi na wa pana bụtụ ulapiya, ama amɛ-tụhaŋtụ ti'yaga aka elele, a incɛnga okwo o'umpwo bụtụ.

²³Bɛjɛmɛ-bụ-ụshɛrɛya bo orugwusu, ba lashɛga ukwuribi ugworo ne tusweci, iwɛ maa ubo n-ndumwa ma bụtụ bi tiririri.

²⁴Bụtụ na eshiciji iyi ba ngbaraka ofwo na ti'inta tu namɛ ririri, ama alagwụ a mbiyangana ofwo elele tutu ukwunanga cɛnjɛ tu unyizo.

²⁵Yɛu nɛ lagwụmɛ ya pana bishi bwa amɛ-tụhaŋtụ, baa hashɛgana kaa du amɛ bino bwa.

²⁶I zhɛshɛ maa e peni bụtụ na n-ndumwa zhɛmɛ ulwapɛ o. Izhɛshɛ kaa du maa o no kwuto bụtụ bụ ụjɛrụma o.

²⁷Bụtụ be elele na eshiciji iyi, ba munanana unu nu n-ndumwa, bụtụ na kaa mepi iyi ba nama suu.

²⁸Okwo yaa shɛ alagwụ, e eri du o mbisogono bu ti'inta ti yaa shɛ baa namɛ saiiŋ, bɛɛ zhɛ du kaa ba mapa iyi, ti yaa shɛ baa 'imɛ unu ubwa.