Read bassa UTAKADAWE ESHI 2 Bible Online

UTAKADAWE ESHI 2 - bassa bible

UTAKADAWE ESHI 2

¹Ɛ-yɛu mi, yaa shɛ ebi leni maa na 'wa n-ndumwa mu na Omo bu mbiso, obo shiyono kaa unu na Ama bu pana eshe,

²ebi shiri kaa acɛbɛ maa na hwuga ti'inta tu na ta banɛ na ahaŋsa mi, obo shiyono kaa ahaŋsa bu ni iyi ti'eshicigo,

³iwɛ-tɛkana, yaa shɛ aba uganana iyi geri-be-eshe tụkwụba, aba dwalakaka kaa iyi ti'eshicigo tebiye,

⁴yaa shɛ ebi dwelekeci iŋ tebiye gana na ta bụtụ ba dwalakaka azụrụfa kwo kaa gana uduciya na ee sweci,

⁵nazhɛ ɛbi zhɛ bo eshicigo iyi nɛ shɛ AGWANGWAMA inyɛsɛ tụsụma, nazhɛ ɛbi zhɛ ba ta iyi-tumapa ya Agwatana ugbe.

⁶AGWANGWAMA ubwa ba pana bụtụ ti'inta, no olugwo ubwa kaa iyi-tumapa keeni iyi ti'eshicigo ya banɛ hwɛɛ.

⁷Ubwa ba pana atwa tiririri ti'inta, ubwa kaa du shɛ abula ujasa atwa na a zha tahaŋnụ na tɛcara.

⁸Ubwa ba jilanɛ atwa tiririri, ubwa kaa du ba untangana uhwaŋna wa atwa ubwa tijilo.

⁹Nazhɛ ɛhi zhɛ hio eshicigo tiririri keeni ụshɛrɛya u tishiriri keeni iyi elele nɛ zhɛmɛ tɛnda.

¹⁰Ti'inta ti zhɛ te teni na amɛ bụ, iyi-tumapa bu kaa zhɛ mo bu lomicingo amɛ.

¹¹Tụkwụba tụ bụ ti iyi geri-be-eshe keeni ti'eshicigo tụ bụ ti zhɛ tu na bu jilanɛ.

¹²Ti'inta tụ bụ ti zhɛ tɛ bi jwɛ no olugwo atwa awɛ, tɛɛ zhɛ kaa du ta bu lashajɛ no olugwo atwa n-ndumwa mi ci'nyɛ.

¹³Aba shɛ atwa ata o jinoko ihwɛŋnɛ tiririri, maa a na zha tahaŋnụ ni ihwɛŋnɛ ya aba i tishi.

¹⁴Aba shɛ atwa na a nda unyasa ni iyi iwɛ tɛnda, aba a ndana masha mụ wɛ unyasa.

¹⁵Aba shɛ atwa na iyi elele ya aba nɛ aa nda ontongonu, iyi ya aba ye elele nɛ aa nda teni shi cɛŋ kwukwuŋ.

¹⁶Nazhɛ ɛbi zhɛ ba banangana biyikwo ata bo ogbototu,[5] bu gata shɛ bihelekeci,[6] bu gata n-ndumwa mu bwa mu lacɛmɛ.

¹⁷Bu gata gɛnjɛ bwolo ata bwa bi hiiŋ baa cɛnɛ la tu baa ta waŋnɛ, isɛbwɛ unu na baa twa la na Agwatana ubwa 'wi bu ya.

¹⁸Yaa shɛ obu to uhwaŋna ihwɛ ibwɛ, asha bu to uhwaŋna tu'wo, ihwɛ ibwɛ kaa tizha i shɛ gana bụtụ na zhɛ ne e'uye.

¹⁹I ta zasa bụtụ na zhogwonuo bu u gwure, maa ta uhwaŋna uraiŋ ya o.

²⁰Iwɛ ecilo ata, bɛ shɛ bu na 'wa uhwaŋna wa atwa ebiye, maa na ya uraiŋ u tiririri.

²¹Atwa tiririri keeni atwa tɛcara aba zhɛ a nama na cɛnjɛ ta ata maa a yɛ ogwu tuba.

²²Ama ɛ zhɛ a kwụna ogworozwo na cɛnjɛ ta ata, ɛɛ zhɛ du o unzo atwa na shɛ shɛ atwa tɛcara na tuba.