Read bassa UTAKADAWE ESHI 20 Bible Online

UTAKADAWE ESHI 20 - bassa bible

UTAKADAWE ESHI 20

¹Mayaga ma ana bụtụ maa sha bɛnjɛ-ba-asada, ubarasa tuswa kaa wa ana bụtụ maa sha bu'weji. Bụtụ be elele na mayaga mɛ inzhɛnjɛ, asha bɛ incɛ shɛ o.

²Isɛbwɛ ya agwuma i shɛ gana bizeci na bo ngwulo, bụtụ be elele na kaa ishicinjɛ iŋ asha uraiŋ ubwa baa inzhɛnga.

³I shɛ iyi ụjɛrụma pa bụtụ na jeri shi uwuru, ama alagwụ elele 'yajɛ izɛlɛgwu nu uwuru.

⁴Bụtụ ba asụsụbagwụ na hwɛŋ shɛ itimɛ na aka bu ushwo, okwo ubwaza hiŋ hwuŋ, bi zha shɛ ba 'yaga iyi nɛ maa gwubo.

⁵Iyi nɛ namɛ na amɛ bụtụ i shɛ gana meni mu na mi iri, ama bụtụ na eshiciji iyi kiri eri bɛ bɛcinjɛ iŋ.

⁶Atwa ofwugwo mama nda gana maa a shɛ atwa tɛcara gom, ama gaaba eri bo gwushigo bụtụ ata bɛ tɛcara gomm?

⁷Bụtụ bi tiririri na zasa unu-tusapa, na tunama tu bwa, miaụŋ mu bwa mu na mu 'wa bụ ne ekwunyi mu gwoje.

⁸Agwuma na jɛjɛ ni idwɛtwɛ ibwɛ maa duma ụshɛrɛya, okwo tipɛpɛpɛ te eshe ubwa tu baba to unzo iyi iwɛ ye elele.

⁹Gaaba eri bɛ hiɛŋ, N nyashɛnjɛ amɛ mi aa namɛ shɛ, Ngaa namɛ ya rụmbɛɛ uzawa iwɛwɛɛ?

¹⁰Te bimenji bu umudu, te bimenji bu uzhinono bo orugwusu bi shanɛ AGWANGWAMA iyi-tupwaŋ hwɛɛ ibɛ iyebi.

¹¹Okwo yɛu ticwɛŋ momo mbisono maa e mepi bu tedure ni iyi nɛ baa nda, okwo iyi nɛ baa njɛ zhɛmɛ yee teni kaa cɛŋ.

¹²AGWANGWAMA ubwa njɛ ta acɛbɛ na a hwuga iwɛ, te eshe na a kwụba uhwaŋna hwɛɛ.

¹³To no lubo malabụ o, shibwonu bi zhɛ ba sha hwuŋ bukofwo. Na kɛpishinjɛ eshe bu, nazhɛ ɛbi zhɛ ba 'yaga iyimɛyɛ te bi gembi.

¹⁴Bụtụ na ba sa iyi, bɛ hiɛŋ, Ulumo hwuleji, ulumo hwuleji, ama bee hwuri hwayɛ hwɛɛ bu na duma ya ishɛkɛ iwɛ ibɛ.

¹⁵Azhɛnarɛya keeni atayɛ na zhanganjɛ barɛ ba du, ama n-ndumwa mi iyi-tumapa mu na bụtụ ba duma mɛ shɛ gana tisemberi to ogwumishi.

¹⁶Bụtụ be elele na leni maa la bugaiŋ i'ɛlɛ, bɛ shɛ ba lashɛga bụ utogwo, go utogwo ata shɛ iyi ufwafwa iwɛ unu na bee shiri iwɛ bugaiŋ ata bee le i'ɛlɛ.

¹⁷Iyimɛyɛ nɛ bụtụ leshiji binya bwa no orugwusu latụmanɛ bụ na aka ata, ama ukwunanga ibɛ zhɛ ya shana bụ gana bụtụ na ba ya ɛzhɛtɛ.

¹⁸Yaa shɛ aba imanganga maa njɛ iyi, na lashɛga ahaŋsa ebiye na aa bu pana. Yaa shɛ kaa aba nda ujasa, asha 'yaga bụtụ na zhɛ na bu 'yagaga.

¹⁹Busharuwa bɛ vwɛ iyi tusweci uvwi, iwɛ ecilo ata na mama bacɛnga na atwa na a duma n-ndumwa mu na mu zasa ogwungwu.

²⁰Bụtụ be elele na keleni bishi kwo kaa bino bwa unu, ga uraiŋ ubwa kwunanjɛ gana ụsụtụla na ee 'wericinji na amɛ tishi tụ 'wụtụ.

²¹Iyi-yo-ogwu nɛ bụtụ yɛ ni izɛlɛgwu tobwolo aka ibɛ ge te ci shi o,[64] i zhɛ ya ngba bụ hwuŋ nu ukwunanga ibɛ.

²²Tɛ hiɛŋ, N zhɛ ma tụpana iyi iwɛ nɛ bụtụ n njɛ o, ama 'yaka AGWANGWAMA maa mo bu mbiyono.

²³AGWANGWAMA o imo timenji to orugwusu, keeni bimenji bu uzhinono na teni shi cɛŋ.

²⁴AGWANGWAMA ubwa bo sokokono ahaŋpalụ tu uhwaŋna, shibwonu gana naa bụtụ be elele ge eri ba mapa uhwaŋna ubwaa?

²⁵To hwulo izɛlɛgwu ni iyi elele nɛ aba jala maa peni AGWANGWAMA upwaŋ o, maa kede to hwuŋ utamapa na aka ukwunanga o.

²⁶Agwuma na incɛ o unzo ogworozwo, boo dubo aŋ no bumbolo bo ohiu ijibi, uzawa inyɛmɛnyɛmɛ ya aba tihioko.

²⁷Ụsụtụla wa AGWANGWAMA wo hioko uhwaŋna maa kwụba iyi elele nɛ namɛ na ahaŋsa bụtụ, okwo tutu i'wɛŋnɛ ibwɛ ya amɛ.

²⁸Tulubo keeni tɛcara, tuba ta lashɛga agwuma, tiririri kaa tuba to shikicingo idwɛtwɛ tugwama tu bwa dimi.

²⁹Ukpahiŋ, ubwa shɛ ụjɛrụma we esemberi ama tuhwaŋla tuba tɛ shɛ tụpilanụ ta n-nyarɛ!

³⁰Ijibi nɛ ya gwucanga bụtụ, ya bacɛnga iyi iwɛ, tukwuto kaa ta bashaga iyi nɛ ga namɛ taa na amɛ na amɛ.