Read bassa UTAKADAWE ESHI 21 Bible Online

UTAKADAWE ESHI 21 - bassa bible

UTAKADAWE ESHI 21

¹Amɛ agwuma namɛ ni i'ɛlɛ ya AGWANGWAMA, ubwa ba yingacanga aŋ geri na kwụlanɛ bụ, gana na baa yingacanga meni mu uhwulwo mu na ma fwunga.

²Uhwaŋna we elele na bụtụ ba nda iyi, teneni bu cɛŋ ne eshe ubwa, ama AGWANGWAMA tuba ubwa ba manganga iyi nɛ namɛ na amɛ bụtụ.

³Iyi tiririri tɛnda keeni ụshɛrɛya na teni cɛŋ tụdụma, kwụlanɛ AGWANGWAMA uhwuri arụpɛ.

⁴Umama kwụba keeni tubusa tu na tɛ shɛ uhioko-uhwaŋna wo ogworozwo, ụ shɛ iwɛwɛ.

⁵Ti'imanganga ta bụtụ na eshiciji iyi ta 'waŋnanɛ bụ tɛzhɛmana duwa, ama yaa shɛ izɛlɛgwu ibu hwuleji, ya bu 'waŋnanɛ tukofwo.

⁶Uduciya na bụtụ ba 'yaga tedure nụ ụzagwụ-tudwa, ụ shɛ gana uzhikwozhikwo na zasa iwɛ tuhwuwowu, na kaa wa zarɛganɛ bụtụ tu'wo.

⁷Abwagara ogworozwo zhɛ o sugo aŋ, iwɛnɛ ta a laka maa a na nda iyi tiririri.

⁸Atwa na a nda iyi nu uhwaŋna na teni shi cɛŋ, aba n-ndumwa ma wụma, ama ugondu na atwa tiririri a nda teni cɛŋ.

⁹I debeji maa data na apanya umwono, uhwuri maa shiyono na amɛ umwono ahiɛba na ne biyikwo na shɛ bu'weji.

¹⁰Ugworozwo wo lubo iyi iwɛ tɛnda, bu zasa kaa inyɛmɛnyɛmɛ uyebi ubwa o.

¹¹Aka na ee peni bụtụ bu umama kwụba ulwapɛ, nazhɛ bụtụ na hwuwi shi zhɛ bo eshicigo iyi. Aka na ee mbisegeni bụtụ na incɛ iwɛ, bi zhɛ ba kaana iyi-tumapa.

¹²Agwatana na shɛ bụtụ bi tiririri mepi gana na ti ihwɛ ugworozwo shɛ, ubwa kaa zhɛ bo zucingo ugworozwo ata no ofwo ufwu tɛnda.

¹³Bụtụ be elele na bo utogo acɛbɛ ubwa to bukofwo ba twana bu u'wo, ɛ zhɛ du o sumongo bu hwuŋ na aka na tu baa twa una ubwa u'wo.

¹⁴Upwaŋ u tusweci wa kwusa isɛbwɛ, ukwuribi ugworo kaa wo gwurusono isɛbwɛ nɛ ga 'yajɛ ikɛnyi.

¹⁵Aka na aa jɛmɛ ụshɛrɛya nu uhwaŋna tishiriri, atwa ebiye a nda unyasa, ohwulu tuba o horoko atwa na a nda iyi iwɛ.

¹⁶Bụtụ be elele na ti'inta tu bwa tu lakanɛ iyi ti'eshicigo, asha ụhinjanụ ubwa zhɛ wa nama na atwa e'uye.

¹⁷Bụtụ na bo lubo gi iyimɛyɛ ibiye tiya, bi zhɛ ba sha bukofwo, bụtụ na kaa du bo lubo mayaga keeni manɛbɛ, bi zha shɛ ba sha bɛzhɛgba kwukwuŋ.

¹⁸No ogworozwo ɛɛ zhɛ e gwube atwa tiririri, na atwa na zasa rishe-tɛtɛtana tuba ɛɛ zhɛ e gwube atwa tɛkana.

¹⁹I debeji maa mama namanga gobuko okwo nụ ụshɛka, uhwuri maa zeni biyikwo na 'yajɛ isɛbwɛ na kaa shɛ bu'weji.

²⁰Iyimɛyɛ ye eligidi keeni manɛbɛ[65] mu barɛ ni ihwɛ bụtụ na incɛ, ama shɛlagwụ sha waŋtanga inɛ ya aba kakayɛ.

²¹Bụtụ na ba 'wa tiririri keeni iwɛ-tumapa, bi zhɛ ba ya uraiŋ[66] te ilegeji, atwa kaa du zhɛ a muna bụ ụjɛrụma.

²²Bụtụ na incɛ ba lashɛga ụshɛpwụ na atwa ukpahiŋ ge jwe, bo hwuŋzo uba wa aba ukɛnyi na aa ga patanɛ-rishe.

²³Bụtụ na ba ima unu ubwa gbam nu n-ndumwa, ba banangana tijama.

²⁴Ɛ hiɛŋ izeci bụtụ tugbom keeni bụtụ na momo mungicingo, ga Mamakwụba, tumama sata kiri tɛ shɛ inɛ ya aba aka elele.

²⁵Ukwulana u buruna wa kwụna bụ, iwɛnɛ ti i'ɛlɛ ibwɛ cimi shi ugondu tɛnda.

²⁶Iyi-heri bu[67] na jalakaka gana na maa 'yaga iyi, ama bụtụ bi tiririri tuba na pana atwa apwaŋ uzawa i'ɛlɛ tumunanana.

²⁷Ụrụpɛ wo ogworozwo shanɛ AGWANGWAMA iyi-tupwaŋ, i zhɛ kaa ya kaana aŋ tuwumanganụ ti yaa shɛ oo to uŋ ni iwɛ na amɛ.

²⁸Tiseyida ta bụtụ bu tukata, ti zhɛ ta nda ufwu, ama tiseyida ta bụtụ na hwụjɛ iwɛ ɛtɛ, ti zhɛ to shikono tutuu.

²⁹Ugworozwo wa nda iyi ne eshehwoo aka elele, ama bụtụ bi tiririri ba yalaga[68] tugwo iyi nazhɛ nda iŋ.

³⁰I zasa ti'inta, ni iyi ti'eshicigo keeni iyi ti'imanganga nɛ eri ya sukakana inɛ ya AGWANGWAMA kwukwuŋ.

³¹Bi eri ba vwana a'inla mangayɛ iwɛ ụjita ujasa, ama tụlasụ tuba tu namɛ ni i'ɛlɛ ya AGWANGWAMA.