Read bassa UTAKADAWE ESHI 29 Bible Online

UTAKADAWE ESHI 29 - bassa bible

UTAKADAWE ESHI 29

¹Bụtụ na oo vwulo ɛgbɛ ɛgbɛɛ na ba kaana go tuhwotono, jitooko bi zhɛ ba nda ufwu eshigiri zawa tɛzhɛmanana.

²Aka na atwa tiririri untanganɛ ụhwada, atwa elele a bwada unyasa, ama aka na ogworozwo munji na tugwama, atwa elele o 'nyongongo.

³Bụtụ na bo lubo ti'inta, bo lomicingo bishi bwa amɛ, ama bụtụ na momo togwu na awale, zhɛ ba nda uduciya ubwa ufwu.

⁴Tedure ne tiririri tụdụma ibɛ agwuma o shikicingo u'una ubwa, ama aka na agwuma a nda ukwedeyi ukwuribi ugworo tulashɛga, asha bi zhɛ bo hwuŋzo u'una ata ubwa.

⁵Bụtụ be elele na ba dumangana uyebi ubwa unu-ụlatụ, asha igwune boo tulonono bu[83] nɛ ɛvwɛvwɛjɛ ubwa.

⁶Iwɛwɛ ya atwa iwɛwɛ ya imanana aŋ gana modugwulo, ama atwa tiririri tuba mama 'yajɛ maa a zụnjɛ azunga unyasa.

⁷Atwa tiririri a dumangana okofwo ụshɛrɛya na teni cɛŋ, ama ogworozwo mepi shi inɛ ɛtɛ o.

⁸Atwa tugbom a garataga ụshɛpwụ, ama atwa na incɛ o 'worocongo isɛbwɛ.

⁹Yaa shɛ bụtụ na incɛ suji alagwụ ụshɛrɛya, alagwụ ata zhɛ na fwụkanɛ, bɛɛ zhɛ na hinga ilɛtu, ofwo zha shɛ a nama shiru o.

¹⁰Atwa na a hwungwatagwwụ iwɛ atwa tụkwụna, aba a ta bụtụ na zasa unu-tusapa ni i'ime, ama atwa tiririri tuba zhɛ na jilanɛ bụ.[84]

¹¹Alagwụ ɛ bɛcinjɛ isɛbwɛ ibwɛ hwɛɛ, ama bụtụ na incɛ ba ima-isɛbwɛ ibwɛ gbam.

¹²Yaa shɛ uhiu wa atwa wo shilo acɛbɛ ubwa nu n-ndumwa mụ ụzagwụ, anjɛ-ugondu ubwa zhɛ a sha du ejwe-ụzagwụ hwɛɛ aba.

¹³Iyi nɛ togotogwu bukofwo na bụtụ na ba nda bu umungwuta, i shɛ iwɛnɛ ti yaa shɛ AGWANGWAMA ubwa peni aŋ eshe hwɛɛ aba ebeyebi.

¹⁴Yaa shɛ bɛjɛmɛ-bụ-ụshɛrɛya ba duma ụshɛrɛya wo okofwo ne tiririri, bi zhɛ bo ilogogo na tugwama tu bwa tiya.

¹⁵Bidingbengbere be evwuri, ba nda maa bụtụ incɛ, ama yɛu nɛ aa ngbaracɛ kwakwa zawa evwuri, ba shapɛrɛganɛ bino bwa ezuye.

¹⁶Aka na tu ugworozwo untanganɛ ụhwada, undwa tubwada zhɛ na kaana ugombo, ama bụtụ bi tiririri tuba zhɛ ba ngbaraka tu ulayɛ wee teni bu.

¹⁷No vwulo yɛu bu, nazhɛ bɛɛ zhɛ ma bu zhɛmana, nazhɛ du amɛ bu zhɛ o lomo nu bwa.

¹⁸Ofwo elele na ozobu zasaba, atwa zhɛ na nda ufwu. Ama atwa na a untangana undwa wa Agwatana, aba zhɛ o gwoje.

¹⁹Yɛu-ugondu hwụjɛ shɛ evwuri unu wo ohondo, okwo bee eshiciji iŋ, bi zha shɛ ba nda iŋ o.

²⁰Okwo alagwụ debeji bee hwuri bụtụ na ba duma n-ndumwa ni izɛlɛgwu.

²¹Yaa shɛ aba pana yɛu-ugondu bu iyi elele nɛ baa jala kwakwa na aka cɛnɛnɛ tu bwa, bi zha shɛ ba ala hwuŋ iwɛ ubwa[85] na aka bu ukwunanga o.

²²Bụtụ na le shi ta amɛ ubwa hashɛganụ, bɛ ishicinjɛ uwuru, bụtụ bi isɛbwɛ kaa le shi tu ba njɛ iwɛwɛ ifwugwo.

²³Ɛ zhɛ e zucinje bụtụ na mama sata, ɛɛ zhɛ tuba a muna bụtụ na meme zucinje ụjɛrụma.

²⁴Bụtụ na shɛ uyebi buzundo, ba nda uhiuhiu ubwa ukɛnyi ibwɛ ufwu, Okwo baa hwụjɛ ta a zha buzundo ata-tuwa, bi zha shɛ kaa bɛ vwɛ bu uvwi o.

²⁵Inyɛsɛ bụtụ tɛnda ya bizhanganɛ bụtụ tijama, ama bụtụ na ba patana AGWANGWAMA rishe, ubwa zhɛ ba banangana.

²⁶Atwa ufwugwo a jala maa agwuma na mapana aŋ iwɛ, ama AGWANGWAMA kiri a dumangana bụtụ ụshɛrɛya u tishiriri.

²⁷Bụtụ bi tiririri cimi shi iwɛ bụtụ bo orugwusu o, bụtụ bo orugwusu kaa du cimi shi iwɛ bụtụ bi tiririri o.