Read bassa UTAKADAWE ESHI 5 Bible Online

UTAKADAWE ESHI 5 - bassa bible

UTAKADAWE ESHI 5

¹Ɛ-yɛu mi, no shilo acɛbɛ na ti'inta ti mi, maa na shɛlaga ti'eshicigo ti mi.

²Nazhɛ ɛbi zhɛ ba mapa gana na maa na nda masha mụ bụ tebiye, maa nɛ bɛcinjɛ ti'eshicigo tụ bụ nu n-ndumwa mu na aba duma.

³N-ndumwa mo biyikwo ata bo ogbototu mu lacɛmɛ gana iswɛ, ihwumbwe[13] ibwɛ kaa gbelemi yee hwuri iyi nɛ aa shananjɛ manɛbɛ ma buta.

⁴Ama ukwunanga n-ndumwa mu bwa gagwụmɛ gana bugasa, maa lacɛmɛ kaa gana utokwobi na lacɛmɛ tebiye.

⁵Ɛvwɛvwɛjɛ ubwa zwi tutu tu'wo, ahaŋpalụ ubwa keshici[14] ee zhe ne e'uye.

⁶Bi shiri shi ụcɛbɛ nu n-ndumwa mu uhwaŋna uraiŋ o, ihwɛŋnɛ ibwɛ vwụlajɛ geri geri, ubwa ni ikɛnyi ibwɛ eri shi bo eshicigo iŋ hwɛɛ o.

⁷Oo a-miaụŋ mi mi me eyi, shɛlaga ma n-ndumwa mi mi, ta ganga ma kaa n-ndumwa mu unu mu o.

⁸Kede uhwaŋna hiŋ gwumwongonu nu una ubwa kwukwuŋ, to gwumwonu ma kaa no odubo umwono ubwa o.

⁹Yaa shɛ ehi zhe, asha anya atwa zhɛ a lashɛga ụjɛrụma hiŋ, atwa na zasa inyɛmɛnyɛmɛ bụtụ zhɛ mo hi tono i'ɛlɛ.

¹⁰Iwɛ aka na agaiŋ zhɛ o sugo uduciya[15] hiŋ hwɛɛ, nazhɛ iyi nɛ ahiɛ njɛ ugondu ibɛ zhɛ ya zha ni i'ɛlɛ ya atwa cɛnjɛ ti nya.

¹¹Ahiɛba tuba hi zhɛ hi no 'nyongo ya nu ukwunanga uraiŋ hiŋ ibɛ shɛ aka na ta ahiɛ injɛ ya.

¹²Na aka ata ɛhi zhɛ hiɛ hiɛŋ, Kwụba gana na ti Ngee imi la evwuri na oo mo n vwulo Ngaa ngbaracɛ la kaa uvwi na ɛɛ mɛ n vwɛ cwɛŋ.

¹³N hwụjɛ shɛ la unu we embisegeni mi o, N shiri shi la kaa acɛbɛ ni iyi nɛ atwa mo n sokokono.

¹⁴Ngee meme pushiteni ya nu ukwunanga ufwu tɛnda umɛwɛɛ, na amɛ tusotulonu ta tu'ulwa.

¹⁵Na swa meni mo okwokwo bu, mu naa na mɛ fwunjɛ nu u'ibwa meni mụ bụ.

¹⁶I zhɛmɛ suu maa ɛmɛzhinjɛ bụ na garatagwụ ni ihwɛnɛ ụshɛpwụ? Maa uhwulwo bu na fwunga nu ugba tụlagwụ?

¹⁷Ga shɛ gobuko kiri bi yajɛ mụ, to gbodongonu mu na agaiŋ o.

¹⁸Ge peni ibilɛ meni mụ bụ uwebiye, na nda unyasa ne biyikwo ata bu ebi zeni te kwuni na aka tuwaŋnɛ tụ bụ.

¹⁹Gana unabara wo o na pilanụ tebiye, go tulubo tu na obo lubo shosubo shu bwa tu na bu pana unyasa ụ'wụtụ aka elele.

²⁰Ɛ-yɛu mi, iwembe po iwɛ biykwo ata bo ogbototu ubu kwulanganɛɛ? Iwembe po aba ruwanɛ biyikwo ata mama sangana anya atwaa?

²¹Eshe AGWANGWAMA a kwụba ihwɛŋnɛ nɛ bụtụ be elele ba nda iyi, baa ngbaraka[16] kaa ofwo elele na bụtụ be elele bo dulo.

²²Iwɛwɛ ugworozwo zhɛ ya ima bu gana ugwuru, iwɛwɛ nɛ baa nda kaa zhɛ ya untangana bụ dimi gana ihwehwe.

²³Bi zhɛ bo 'wo iwɛnɛ te evwuri twa sụ bụ, bi zhɛ kaa ba ina iwɛ ụlagwụ ubwa ụ'wụtụ.