Read bassa BI'ENENJI 1 Bible Online

BI'ENENJI 1 - bassa bible

BI'ENENJI 1

¹N-ndumwa mu na Bi'enenji na shɛ yɛu Devid ata yɛ la tugwama nu Jɛrusalɛm jɛmɛ na.

²Bi'enenji ga hiɛŋ, Tɛgadaga, tɛ tɛgadaga, tɛ shɛ tɛgadaga, iyi elele i shɛ tɛgadaga.

³Imbe i shɛ ule tire tu na bụtụ ba nda tire ti ibɛ kpaaŋ tuta tu uwaŋna gaa?

⁴Uwaŋnɛ uko wa kashɛka, uwaŋnɛ unya we teni, ama unyizo namɛ kaa unyizo-nom.

⁵Uwaŋna wa banɛ, uwaŋna wo tono, wo tono no ofwo ebe waa ga banɛ ni izɛlɛgwu.

⁶Uvwugo wo mungo tuzuba, wee zwe tuta, wo rungo uuwa we gwuleneni nu urubwo ebe.

⁷Ohwulwo elele a fwunga oo zwo ni itekwu, itekwu kaa te shini shi taa hwayɛ o. Ohwulwo ata a fwunga oo gwulo no ofwo na aa ga banɛ la.[1]

⁸Iyi elele ya nda ugondu uuwa yo lukwumo, ulukwu na unu eri shi wa duma, eshe a ngbaraka igbɛtɛtɛ, ama igbɛtɛtɛ kaa twa sụ eshe o, acɛbɛ a hwuga iwɛ uuwa, iwɛ tuhwuga kaa twa sụ acɛbɛ o.

⁹Iyi nɛ namɛ la cala, ibɛ tɛ zhɛ ya nama sasana. Iyi nɛ nduwa la cala ibɛ kaa tɛ zhɛ ya ndaanana. I zasa iyi nɛ i shɛ iyi ifwo tuta tu uwaŋna ga o.

¹⁰I 'yajɛ suu iyi ike nɛ bụtụ bu ko eri bɛ hiɛŋ, Kwụba, ijɛ i shɛ iyi ifwo? Awo, ijɛ ɛtɛ namwawaŋ la cala tobwolo e te bu meci shi o.

¹¹I zasa bụtụ na teyinje iyi nɛ nduwa la i koshikwo, atwa na te ci kaa du zha shɛ e teyinje hwuŋ iyi nɛ tɛ zhɛ ya nda te kwuni na aka ga uuwa i ci aka aba o.

¹²Gamba ga N shɛ Bi'enenji, N yɛwa la tugwama ti Isrɛl nu Jɛrusalɛm.

¹³M meme peni maa N zhɛ ma dwalakaka iyi, maa Mo hikokono iyi tedure na ti'inta, maa Ma kwụba iyi elele nɛ aa njɛ tuta ta azuba ga. Ngoo to ugbe maa ugondu na Agwatana eni miaụŋ ma atwa ụ shɛ ugondu wa amɛ-tụhaŋtụ.

¹⁴N kwụbɛ iyi elele nɛ aa nda tuta tu uwaŋna ga, hioko ma, i shɛ iyi tɛgadaga. I shɛ uvwugo tu'urugono nu usumwa.[2]

¹⁵Hi eri shi hia ndarɛshɛnga iyi nɛ ontonowoŋ, hi eri shi kaa hia rɛta iyi nɛ zasaba o.

¹⁶Nazhɛ Ngɛɛ mɛmɛ hiɛŋ, N 'yagawa la ti'inta, Ngee hwuri bụtụ be elele na yɛwa la tugwama nu umbe mu nu Jɛrusalɛm. M mepi iyi nɛ ti'inta tɛ shɛ hwɛɛ, ti iyi-tumapa na ahaŋsa mi.

¹⁷Ibɛ po Ngee meme shi na ahaŋsa mi maa ma mapa ti'inta, nụ ụlagwụ tu ụmpɛ-tụsụma hwɛɛ. Ama N to ugbe maa ijɛ hwɛɛ i shɛ uvwugo tu'urugono nu usumwa.

¹⁸Gana na ti'inta tụ bụ ti ci, gana ata du ahaŋsa bụ ofwugwo namɛ, gana na ta aba kaana iyi-tumapa, gobwonu du amɛ-tụhaŋtụ bụ a kaana ugombo.