Read bassa BI'ENENJI 11 Bible Online

BI'ENENJI 11 - bassa bible

BI'ENENJI 11

¹Hwoŋso iyimɛyɛ bu arahaŋ tutu keshi Urefu,[9] bi zhɛ ba kwụbanana iŋ hwuŋ na aka fwalaa.

²Hwoŋso iŋ i ci orubwo ecenje kwo kaa atụndatụ, iwɛnɛ te bi mepi shi Abara-ne-ebe na eri o jitono hwuŋ cɛnjɛ tu unyizo ga.

³Yaa shɛ odomu hwungbi meni, ɛ zhɛ e duduje eshilo na cɛnjɛ. Yaa shɛ kaa ụ'wụ'wụ leyi tuzuba kwo kaa tuta, u zhɛ wo shilo no ofwo ata wee leyi.

⁴Bụtụ be elele na bo shiyono uvwugo eshe, bi zha shɛ ba bila iyi o, bụtụ be elele na du kaa ba ngbaraka odomu, bi zha shɛ bo gwubo hwuŋ iyi elele o.

⁵Gana na te ebi mepi shi uhwaŋna uvwugo,[10] kwo kaa gana na yɛu ya nda yaa waŋna na amɛ biyikwo bo ofubo, gana ata du ebi eri shi bo eshicigo ugondu wa Agwatana ga njɛ iyi elele.

⁶Bila izɛgwu bu tu uvwungwa keeni ụrụmɛ du, iwɛnɛ po bu zha shɛ ba mapa inɛɛ nɛ zhɛ ya zhɛma hwuŋ, okwo inee ye, kwo kaa inɛ gɛ ahoo. Okwo i zhɛ ya zhɛma hwɛɛ ibɛ, bi mepi shi o.

⁷Uhioko-uhwaŋna zhɛmɛ tebiye, yaa shɛ kaa du iyi unyasa maa bụtụ kwụbɛ uwaŋna.

⁸Na nda ugwoje na shiywa shi ufwugwo shɛ na abu yɛwa uraiŋ na shɛ ba kpaaŋ. Gana elele ta bụtụ yɛ uraiŋ, bɛ shɛ be teyinje maa ebu 'wi hwuŋ, nazhɛ ɛbi zhɛ bo ilogogo uhwuri aka na abɛ yɛ la uraiŋ. Iyi elele nɛ ya zhajɛ kaa i shɛ tɛgadaga.

⁹Oo gabụ usemberi, na nda unyasa ta abu ta waŋnɛ bana. Ga amɛ bụ lemi na aka tisemberi tụ bụ, maa na nda iyi nɛ amɛ bụ a jala, keeni iyi nɛ eshe bu a kwụba, ama mapa tuba maa Agwatana zhɛ a duma hwuŋ ụshɛrɛya bụ ni iyi elele nɛ abɛ njɛ.

¹⁰Iwɛ ecilo ata, bacɛnga ahaŋsa ofwugwo na amɛ bụ, maa becinji du iyi elele nɛ shɛ ụngwụ na tu'waba tụ bụ. Iwɛnɛ po cɛnɛnɛ no tugborofu tɛ shɛ iyi tɛgadaga hwɛɛ ibɛ.