Read bassa BI'ENENJI 7 Bible Online

BI'ENENJI 7 - bassa bible

BI'ENENJI 7

¹Izeci ibiye zhɛmɛ yee hwuri manɛbɛ mụ ụhiụŋ ubiye mu na mu zhanjɛ duwa. Ụjita tu'wo du kaa zhɛmɛ woo hwuri ụjita tumata.

²I zhɛmɛ maa bụtụ zhe ni ihwɛ nɛ atwa a ta-ụkwụla uhwuri maa zhe ni ihwɛ nɛ aa nda ikwusɛ'uyɛ. Iwɛnɛ po atwa na ta hwungwa zhɛ no momo toyingonu maa tu'wo tɛ 'yacɛ aŋ ba hwɛɛ aba.

³Amɛ-tụhaŋtụ zhɛmɛ ee hwuri ilɛtu tihinga; eshe bu yibwa zhɛ a nama kperi kperi, ama tuba i zhɛ ya babɛrɛnga ti'eshicigo tụ bụ.

⁴Amɛ bụtụ bi ti'inta namɛ nụ ụkwụla-tuta aka elele, ama amɛ alagwụ namɛ nu unyasa nom.

⁵I zhɛmɛ maa bụtụ na incɛ ubu tazhɛganɛ uhwuri azunga shɛlagwụ tɛshɛlaga.

⁶Ilɛtu ya alagwụ 'yajɛ rundu gana esepi na o hwoŋno nu ulwa na ikwɛshɛ patanɛ. Iyi tɛgadaga kaa yaa shaananɛ.

⁷Yaa shɛ bụtụ bi ti'inta yɛ bụtụ imwere, asha bu mama njɛ alagwụ, yaa shɛ kaa bee leshiji ukwuribi ugworo, asha bi tecinji masha mu bwa ụdamụ.

⁸Ukwunanga iyi elele zhɛmɛ yee hwuri tukwuno ti ibɛ, isɛbwɛ-ti'ima kaa zhɛmɛ yee hwuri tumama sata.

⁹Ta nda izɛlɛgwu ni isɛbwɛ-tɛnda o, iwɛnɛ ta shɛlagwụ shi le shi iwɛ isɛbwɛ-tɛnda.

¹⁰To hoŋtono maa hiɛŋ, Iwembe kwuŋ po aka cala debeji ee hwuri aka gaa? Iheŋtene ɛtɛ bu beni shi na ahaŋsa ti'inta o.

¹¹Ti'inta tɛ zhɛmɛ, tɛ shɛ gana iyi-yo-ogwu, taa 'yaganɛ kaa atwa na kwụbɛ uwaŋna ule.

¹²Ti'inta ta jilanɛ bụtụ, gana na tu ukwuribi wa jilanɛ bụtụ. Ti'inta to bicingo atwa na incɛ tụ, inɛ gɛ ibɛ shɛ ule iyi-tumapa.

¹³Haŋsa iwɛ iyi nɛ Agwatana njɛ. Gaaba eri ba ndarɛshɛnga iyi nɛ Agwatana ontonowooŋ?

¹⁴Aka elele na iyi ibu zhɛmanɛ, nda unyasa, aka elele du kaa ụbaụta ubu zhaganɛ, na haŋsa maa Agwatana ubwa ubu tumwananɛ la unyasa ata, ubwa du kaa ba tumwanɛ ụbaụta. I zasa bụtụ eri ba mapa iyi nɛ zhɛ ya nda nu umbe ubwa o.

¹⁵N kwubwa iyi elele kpaaŋ nu uraiŋ ga mu u tɛgadaga. Bụtụ bi tiririri bo 'wo ne tiririri tu bwa, ugworozwo kaa du wa ya uraiŋ te ilegeji no tugworozwo tu bwa.

¹⁶Kede tiririri tụ bụ tu hwuleji o, kede du kaa ti'inta tụ bụ tu hwuleji, shibwonu bi zhɛ bu mama nda ufwu.

¹⁷Kede tugworozwo tụ bụ tu hwuleji o, to hwulo du kaa bu lagwụmɛ o. Shibwonu bi zhɛ bo 'wo uzawa ụjita tuto.

¹⁸I zhɛmɛ maa teri ike maa genji inɛ iyebi, ama bụtụ na ba sụma Agwatana inyɛsɛ bi eri ba nda iŋ hwɛɛ.

¹⁹Ti'inta ta pana bụtụ bi ti'inta ukpahiŋ uhwuri shɛgwuma umpwa shɛ na shɛ namɛ nụ ụshɛpwụ.

²⁰I zasa bụtụ bi tiririri na namba nu unyizo ba nda iyi ibiye na njɛ shɛ iwɛwɛ kwukwuŋ.

²¹Ta na shɛlaga n-ndumwa mu na atwa a dumanga kpaaŋ o. Shibwonu jitoo ko bi zhɛ ba hwuga ti yɛu bu ugondu ma bu twaga.

²²Gabụ du bi mepi na amɛ bụ maa, bu twagwa atwa na aka gembi ufwugwo.

²³Na ti'inta ti mi Ngee mengenji ijɛ hwɛɛ. N heŋshi maa ma inta, ama tuba i n hwuri ikɛnyi.

²⁴Iyi elele ti'inta tɛ shɛ, tɛ shɛ iyi nɛ dụlụmɛ, taa shɛ kaa iyi nɛ iri, ti iri ga kaa tebiye, gaaba eri ba ta tu ugbee?

²⁵Ngee meme peni maa ma mapa-iyi, ti iyi tusoso. Ngee heŋshi maa Ma jalakaka, maa mo hikokono iyi nɛ ti'inta tɛ shɛ hwɛɛ, ti iyi ti'eshicigo ifwugwo, keeni maa ma mapa ụlagwụ na namba no tugworozwo, hwɛɛ tu ụmpɛ mụ ụlagwụ.

²⁶Nazhɛ Ngoo to iyi nɛ wumanjɛ uhwuri tu'wo ugbe, ibɛ shɛ biyikwo ata tulubo tu bwa ta ima bụtụ gana modugwulo keeni igwune, na du kaa turuwanɛ tu bwa ta ima bụtụ gana shigbo. Butubwenyi be elele na ba nda iyi nɛ yo lomicingo Agwatana amɛ, ubwa kiri zhɛ ba banangana bụ. Ama bi zhɛ tuba ba ima atwa iwɛwɛ.

²⁷Bi'enenji ga hiɛŋ, Gana na Ngoo to ijɛ ugbe, i shɛ iyi ike tɛkaana ni inyɛ maa ma mapa gana na ti iyi elele ya nda.

²⁸N jelekeci inɛ vwɛ ama N te shi ugbe o. Semi butubwenyi bi tiririri bu ko gba kiri Ngoo to ugbe na ashashɛ etwenyi akpakwụ-a-ta na tijalakaka ti mi. Ama N kwụbɛ shɛ biyikwo bi tiririri okwo bu ko gba na amɛ aba o.

²⁹Iyi Ngoo to ugbe na maa, Agwatana njɛ bụtụ ririri, ama bụtụ meme umpenji ya ni iyi ifwugwo tɛnda.