Read bassa BI'ENENJI 8 Bible Online

BI'ENENJI 8 - bassa bible

BI'ENENJI 8

¹Gaaba shɛ gana bụtụ bi ti'intaa? Gaaba mepi ecilo iyi ti'eshicigoo? Ti'inta ta nda maa ụpɛshɛka bụtụ na ta. To shoyingo kaa tikperi kperi te eshe ubwa.

²N hiɛŋ, Na hwuga[5] ma unu unu-tupana wa agwuma, iwɛnɛ te hi shiri-unu tijilo na agba Agwatana.

³Ta bana na agba agwuma ni izɛlɛgwu o, to shikono du kaa iwɛ iyi iwɛ tɛnda o. Iwɛnɛ po agwuma eri a nda iyi elele nɛ kwụlanɛ bụ.

⁴Agwuma a nda iyi nu ụhwada na baa 'yajɛ, gaaba twa maa hoŋtono bu maa, Iwembe po abɛ njɛ ijɛɛ?

⁵Bụtụ na ba hwuga-unu unu ubwa tụpana, ubwa du iyi nɛ ya gwumana bụtụ zha shɛ yo jitono. Bụtụ bi ti'inta zhɛ ba mapa aka na maa nda iŋ, tu gana na shɛ maa nda iŋ.

⁶Okwo ta amɛ-tụhaŋtụ ụ bụtụ iri bu, iwɛ ye elele kaa 'yajɛ aka na teni cɛŋ hwɛɛ, tu uhwaŋna na teni cɛŋ maa a njɛ iŋ!

⁷I zasa bụtụ mepi iyi nɛ tɛ zhɛ ya nda o, gaaba kaa eri bo mbiso binya bwa iyi nɛ tee cii?

⁸I zasa bụtụ na 'yajɛ ukpahiŋ maa untangana mpiala, kwo kaa ụhwada maa ngozono ụjita tu'wo tu bwa o. Gana na ti yaa zasa bụtụ na eri ba bɛzhɛnga aka ujasa, gobwonu du tugworozwo ti zha shɛ ta ganga atwa na meme peni tu tɛnda.

⁹Aka na Ngaa kwụbɛ ijɛ hwɛɛ, Ama haŋsa iwɛ iyi elele nɛ ya nda tuta tu uwaŋna ga, ibɛ po Ngoo to ijɛ ugbe, maa i 'yajɛ aka atwa oko mama njɛ shɛgwangwama sha anya aba, maa tuba atwa ata na ndana aŋ ụbaụta.

¹⁰Nazhɛ Ngaa kwụbananɛ du to ogworozwo na atwa na a shana o tono ofwo tijilo, a banananɛ, nazhɛ aa dumanga aŋ nụ ụshɛpwụ ata aa njɛ iŋ la gbaa. Inɛ gɛ shaananɛ iyi tɛgadaga.

¹¹Gana na ta a jɛmɛ shɛ ụshɛrɛya wa atwa na a nda iyi iwɛ kakayɛ kakayɛ, ibɛ du po atwa shikicinji shihaŋsa sha aba maa a na nda gi iyi iwɛ aka elele.

¹²Okwo bụtụ bi iwɛwɛ njɛ iyi iwɛ i ci kpalụ dipi-yebi bu na ya waa uraiŋ te ilegeji. M mepi kaa tuba maa i zhɛ ya zhɛmana atwa na a sụma Agwatana inyɛsɛ, iwɛnɛ ta a sụma bụ inyɛsɛ nu umbe ubwa.

¹³Ama i zha shɛ tuba ya zhɛmana ogworozwo. Uraiŋ wa aba zhɛ wa kashɛka kakayɛ gana uhwuŋnu, iwɛnɛ ta a njɛ shɛ inyɛsɛ ya Agwatana.

¹⁴I 'yajɛ ba iyi ike tɛgadaga ya nda nu unyizo ga, aka oko atwa tiririri a lashɛga ulwapɛ wo ogworozwo, nazhɛ ogworozwo tuba a lashɛga ule wa atwa tiririri. N hiɛŋ ijɛ shaananɛ iyi tɛgadaga.

¹⁵N le tiseyida gom maa bụtụ ga shɛ bu na mama hwụjɛtana ụlatụ, iwɛnɛ po amɛ-olom na kiri baa 'yajɛ nu uraiŋ ga a shɛ maa ya, maa swa, maa hwuga ụlatụ tuta tu uwaŋna ga. Bụtụ eri ba nda ijɛ, ne tire tu na baa nda nu uraiŋ ga Agwatana peni bu nu unyizo ga tutu ukwunanga ubwa.

¹⁶Aka na Ngee mekeni maa Ma inta, kwo kaa maa Mo soso gana na ti iyi ya ndangana nu unyizo, ma ta ya ugbe maa, asha bụtụ shɛ bo ngwulo malabụ, tu uwaŋna tụ ụjita.

¹⁷Nazhɛ Ngaa kwụbɛ iyi elele nɛ Agwatana nduwa. Okwo abɛ njɛ gana elele ta 'yajɛ ikɛnyi, bi eri shi ba ta tu ugbe o. Atwa ti'inta eri ɛ hiɛŋ maa aba mepi, ama e mepi shi kaa o.