Read bassa AZUNGA SHƐZUNGA 1 Bible Online

AZUNGA SHƐZUNGA 1 - bassa bible

AZUNGA SHƐZUNGA 1

¹Shɛzunga shɛ na shɛ pilanụ tebiye shɛ na go Sụlụmụn zụnjɛ. Biyikwo Ata Hiɛŋ,

²N ruwanɛ maa kwutenji unu bu[1] nu unoo mu, iwɛnɛ to tulubo tụ bụ tụ n kwụlanɛ tee hwuri meni mụ tụ'walụ ta afwafwa.

³Izeci bụ shɛ gana iturɛre nɛ aa 'wɛŋ, nɛ yɛ bɛcinjɛ ụhiụŋ ibɛ ubiye, na tuhwuga tu na bụtụ ba hwuga iŋ. Ibɛ po iwɛ bụ kwụlanɛ showo!

⁴Agwuma, n shepi kakayɛ maa tɛ zhagaga; N shepi maa ti zhe no shigongo shu umwono bu. Ti zhɛ ta gala, ta bwada unyasa na bụ, ti zhɛ ta dumanga tulubo tụ bụ uhwuri meni mụ tụ'walụ ta afwafwa. Iwɛbɛ po eyikwo o bu lubo tebiye!

⁵Ahiɛba eyikwo Jɛrusalɛm, N shɛ bi shi, ama N zhɛmɛ tebiye, N shɛ bi shi gana udulo Kɛda, ama N zhɛmɛ gana ibɛgɛlɛ tugwuno tu umwono Sụlụmụn.

⁶Ta ma ngbaraka ma cwɛŋ iwɛnɛ Ngaa shɛ bi shi o, iwɛnɛ po uwaŋna n kwụnɛ bi shi. Nkwonyi mi mi mi 'yajɛ isɛbwɛ ne mi, ibɛ po ee n eni ugondu ni itimɛ ya afwafwa. Itimɛ mi ya afwafwa kaa du zweni na ambɛ.

⁷O-tulubo ti mi, m mbishi ofwo na ɛbi zhɛ bo sugo hwayɛ agwụdụ bụ na tiyaga. Cee ɛbi zhɛ ba ta hwayɛ ụhinjanụ tu uwaŋna 'waaŋ? Iwɛ maa kede mu no bu rungo[2] hwayɛ no ofwo a'iywa-agwụdụ anya o. Butubwenyi Ata Hiɛŋ,

⁸Gabụ ga bụ pilanụ bu hwuri eyikwo vwɛ, bi mepi shi suu ofwo ata? Zhaga 'wa ụlamụ ata iyimabiga, zhajɛ hwayɛ no ofwo ata gwumwongonu ni idile ɛtɛ ya a'iywa-agwụdụ, maa na pana hwayɛ iyweywe bụ iyimɛyɛ.

⁹Bu ma n dwa eshe gana ta buna bo o na bo kokwulo ihɛŋtu ujasa Faro.

¹⁰Shɛtakwụ sha acɛbɛ bụ shɛ njɛ maa apada bụ pilanụ, tụmbụ ti i'ilu bu kaa tɛ njɛ i'ilu bu tisemberi.

¹¹Ama ti zhɛ ta bụ ndana shɛtakwụ sha azhɛnarɛya keeni ikwɛmbɛ ya azụrụfa.

¹²Agwuma mi weci no ogodo ubwa, mpiala kaa mu suji ụhiụŋ iturɛre ibiye moo mburusonu.

¹³Bụtụ ga mi bu tulubo, bu n shanɛ gana ikeke nɛ ee zweni iturɛre, gana na ti bee weci na agba mi.

¹⁴Bụtụ ga mi bu tulubo, bu n shanɛ gana modwodwo mu na ma barashagwụ ni itimɛ ya afwafwa Ɛngɛdi.

¹⁵E-keke mi ya agba, hioko gana na ta bụ pilanụ tebiye, eshe bụ zhɛmɛ, aa ta ngere ngere gana ikwucime!

¹⁶Hioko gana na ta bụ zhɛmɛ tebiye, gabụ bi ngezeni atwa vwɛ; mo bu lubo kaa tebiye! Ambɛ na ta saba sunɛ sunɛ, aba zhɛ a sha ogodo tu.

¹⁷I'wɛ'wɛ yo osobu ibɛ zhɛ ya sha ezhibi umwono tu, no orokwo tuba ɛti zhɛ ta nda abata[3] ubwa.