Read bassa AZUNGA SHƐZUNGA 2 Bible Online

AZUNGA SHƐZUNGA 2 - bassa bible

AZUNGA SHƐZUNGA 2

¹N shɛ gana modwodwo mi ishɛkpɛcɛ[4] mu na mu namɛ nu ukwoswo na ɛɛ hiɛŋ, Sharon, gana modwodwo mu na mu namɛ no olomu nshama.

²Gana na modwodwo mi ishɛkpɛcɛ mu na mi shikeni na ashashɛ esepi mɛ shɛ, gana ata du biyikwo ga na shɛ ikeke mi ya agba namɛ na ashashɛ eyikwo vwɛ.

³Butubwenyi ga iwɛ ubwa n kwulanganɛ uhwuri a na vwɛ hwɛɛ, bi shikeni ne etwenyi vwɛ gana ụ'wụ'wụ na ɛɛ hiɛŋ, Apul na shikeni nu uwapa. N lubi bɛjɛjɛ nu uhwuŋnu ubwa, tụ'walụ tu bwa kaa tu n latụmanɛ tebiye.

⁴Bu n suyanɛ nu umwono ubwa na ba ya iyimɛyɛ, bee shikicinji igɛrigɛ nɛ mbiseni gana na tu boo mo n lubo.

⁵M panɛ tụ'walụ ta ata ta afwafwa tu hwoo ma Ma ya maa ikɛnyi mi gwure, n keeni ikɛnyi na tụ'walụ tụ ụ'wụ'wụ ata ɛɛ hiɛŋ, Apul! M mama zasa ya ni iwɛ bụ nɛ n kwulanganɛ o.

⁶M peteni uhiuhiu mu nu u'ala ubwa ugwulwo, ibɛ po baa n ruwanɛ nu u'ala ubwa ubiye.

⁷Ahiɛba eyikwo Jɛrusalɛm, n shileni ma unu; ta ma tuwa kakayɛ gana na tu unabara keeni bụlụba bo gozhigo ni zɛlɛgwu maa hi zha shɛ hia karɛ iyi elele nɛ zhɛ yo sukwutogo tukwulangana tu na atu mama kwulanganụ o.

⁸N hwụjɛ rụhwụŋ ra bụtụ ata iwɛ ubwa n kwụlanganɛ! Ti bee mungenji nshama bee ci, bee gezhije nu nshama ma ata, bee ci pi mi.

⁹Bụtụ ga iwɛ ubwa n kwụlanganɛ, bɛ shɛ gana unabara, baa shɛ gana biywoywo ba bụlụba. Bwe ye shikeni nụ ụdatụ, be hikekeni nụ ụgbahwụ umwono, bee zweni apata gbɛtɛtɛ zenji zenji.

¹⁰Bụtụ ata iwɛ ubwa n kwulanganɛ Butubwenyi ata Hiɛŋ, Ekeke mi ya agba, zhajɛ yaa, hwure ti zhagaga, bu n hwuleni bụtụ be elele.

¹¹Ubwaza hiŋ ya, eshilo dwawa;

¹²modwodwo mu bwadawa ne shihilo. Aka azunga tuzunga na; tụ hwụjɛ shɛzunga shu nkwucimo ne shihilo.

¹³Owowo kwuni tuna; mpiala mo buso ụhiụŋ tusumbo ta afwafwa tu na ta bwadụ Ekeke mi ya agba, zhajɛ yaa, hwure ti zhagaga, bu n hwuleni bụtụ be elele.

¹⁴Oo e-kwucime mi nɛ swacɛ na tụbagwụ tu uparatayɛ, keeni ofwo tusweci na namɛ ne embi nshama. Me ci ba de ma kwụba ụpɛshɛka ata bụ n kwulanganɛ, maa Ma hwụga de rụhwụŋ ra ata rụ bụ ro lomicingo bụtụ amɛ.

¹⁵Iti imanjɛ n-nyonyo to oywoywo aba hwɛɛ, maa kede a njɛ afwafwa ga tu zweni no tusumbo ufwu o.

¹⁶Bụtụ mi bu tulubo shɛ bi nee mi, Ngaa shɛ du kaa bu na bwa. Bu suji iyi bwɛ mabiga tiyaga na ashashɛ modwodwo mi ishɛkpɛcɛ.

¹⁷Uuwa i ci aka na iyi kwuni tusuje, tishi to gozhigo. A-bụtụ mi bu tulubo, gwure gana unabara, gana biywoywo ba bụlụba na namɛ nu nshama mu rugɛd.[5]