Read bassa AZUNGA SHƐZUNGA 5 Bible Online

AZUNGA SHƐZUNGA 5 - bassa bible

AZUNGA SHƐZUNGA 5

¹E-biyikwo mi bu ufwo, a-bụngwụfwụ mi, N twonuo ni itimɛ ɛtɛ mi. Ngoo sugwo manɛbɛ mi mi mụ ụhiụŋ ubiye, ti iturɛre mi, Ama swa te meni mi iswɛ mi, Ama ya ta azanga ibɛ; Ama swa meni mi mi mụ tụ'walụ ta afwafwa, to mosubo mi mi. Ahiɛba na hi mama kwulanganụ, ya ma, maa hi swe uuwa i ci aka na tumama kwulanganụ ti hiŋ ti hi iri gana atwa na swe mayaga!

²To Omo woto malabụ, ahaŋsa mi tuba weci shi o. Ngee wetegeni ụwalabụ, bụtụ mi na n kwulanganɛ po ukpa mu iyi. A-bụngwụfwụ mi, e-keke mi ya agba, n kepishingeni odubo, e-kwucime mi, o-tulubo ti mi tu na tu zasa unu-tusapa. Uhiuhiu mu 'weri cime, tihiŋzhe ti mi ti lemi shakpaa.

³N bocogwo i'wɛŋnɛ mi, Mo hwuŋtono iŋ suu sasana? Ngoo fwotwo du kaa ɛvwɛvwɛjɛ mi, Ma ndaanana aŋ suu tiri?

⁴Aka na bụtụ mi bu tulubo timengeni ukpa, nazhɛ iwɛ ubwa n kwuni tɛtɛtaga na amɛ mi, Ngee heŋshi maa bu to gwumwonu,

⁵Ngɛɛ ishijɛ maa ma kapɛshɛngana bụ odubo maa teni. I'ɛlɛ mi, ti ivwɛ mi 'yajɛ iturɛre, Ngee kepishinji ya odubo. Ngaa untanganɛ ya ụ'wụ'wụ ata ukpa.

⁶Gana na ti Ngee kepishingeni tulubo ti mi odubo, tobwolo bu hwulwo cebe. Ibɛ po ohwulu m po ya iyi[11] Ngee dwelekeci bu, N kwụbɛ shɛ bụ ya o; Ngaa suyaganɛ bụ, N hwụjɛ shɛ ya ilɛmɛ ibwɛ o.

⁷Ibɛ po a'yacɛ na o rungo nụ ụshɛpwụ ata n kwụbɛ; ee n hwelipi, aa m bwuranjɛ, a'yacɛ uba ụshɛpwụ ata leshiji idikɛ mi.

⁸Ahiɛba eyikwo Jɛrusalɛm, ma hi tabwa, maa yaa shɛ ahiɛ kwụbɛ bụtụ ata mi bu tulubo, mbiso bu ma maa, Gamba na N zhɛ tu'wo iwɛ tulubo tu bwa. Eyikwo ata Hiɛŋ,

⁹E-biyikwo ga pilanụ uhwuri a na vwɛ nụ ụzhɛ, bwolo ata bụ mo bu lubo suu uhwuri a na vwɛ? Imbe kwuŋ bee hwuri a na vwɛ ni bɛ, upo abu ma tu tabwa iwɛ ubwaa?

¹⁰Bwolo ata mi bu tulubo, bɛ zhɛmɛ tebiye, baa 'yajɛ kaa ikɛnyi; bwooko kiri beni swooŋ na amɛ atwa igbɛɛ-itɛ.

¹¹Ụpɛshɛka ubwa shɛ gana azhɛnarɛya tụrụmbɛɛ, wee gbelemi. Tihiŋzhe tu bwa ta nda yayaya, tee shijimi gana ugwaagwaa.

¹²Eshe ubwa zhɛmɛ tebiye gana ikwucime nɛ shikeni nụ ụpalanụ busoso na ba fwunga, gana ikwucime nɛ ee fwoci no mosubo, bee shikeni ya nu uhwulwo

¹³Agawa ubwa zhɛmɛ gana itimɛ nɛ aa hwɛŋ ambɛ na 'yajɛ ụhiụŋ umuru, ihwumbwe ibwɛ shɛ gana modwodwo mi ishɛkpɛcɛ, ba sukwutwa iŋ iturɛre.

¹⁴E zwi aragbamu ubwa tebiye, aa shanɛ aŋ shi'umwo shɛ na aa njɛ tisemberi na azhɛnarɛya. Tu'waba tu bwa ti gbelemi gana rine ru udagba ru na aa njɛ tisemberi na atayɛ na pilanụ[12] tebiye.

¹⁵N'unto mu bwa mɛ shɛ gana atukpa atayɛ na ee peteni akpada na aa njɛ na azhɛnarɛya. Ụjɛrụma ubwa gembi gana nshama mu Lebanon mu na mi 'yajɛ i'wɛ'wɛ yo osobu nɛ ngezeni inɛ vwɛ hwɛɛ nụ ụzhɛ.

¹⁶Ebu kwutenji unu bu nu una ubwa, ba hwụga ụlatụ; iyi ibwɛ ye elele kaa i n kwụlanɛ. Ahiɛba showo shi Jɛrusalɛm, gana bwolo ata bu tulubo shɛ ta.