Read bassa AYIZAYA 19 Bible Online

AYIZAYA 19 - bassa bible

AYIZAYA 19

¹Utumwa na Agwatana tumwananɛ atwa Ijipti na, bi hiɛŋ, AGWANGWAMA zhɛ a zhajɛ ni Ijipti, bɛɛ zhɛ bɛ sucɛ udomu na wo gozhigo hwuŋri hwuŋri. Tuwa ta atwa Ijipti ta zhɛgɛda na agba ubwa, shihwulu shɛ bwadụ atwa Ijipti hwɛɛ.

²AGWANGWAMA hiɛŋ, N zhɛ ma kalanɛ atwa Ijipti ujasa abaaba. Yɛu-bino zhɛ ya jasa yɛu-bino bwa, ubabɛshɛ uko zhɛ wa jasa ubabɛshɛ ubwa. Ụshɛpwụ uko zhɛ wɛ ishijɛ wa jasa ụshɛpwụ unya, cɛnjɛ-ta-tugwama tu ko ti zhɛ ta sukana cɛnjɛ-ta-tugwama ti nya.

³N zhɛ ma garataga shihaŋsa sha atwa Ijipti maa ma nda iyi elele nɛ aa imanganjɛ ufwu. Ɛ zhɛ a zhagana tuwa ta aba maa ti mbiyeni aŋ, ɛɛ zhɛ a zhagana ashɛjɛ maa atwa e'uye sumanɛ aŋ u'uno.

⁴N zhɛ mo sugo atwa Ijipti ma pana agwuma na wụmɛ amɛ, agwuma na zhanjɛ maa untangana aŋ. Gamba AGWANGWAMA na Hwuri Kpaaŋ N dumwa.

⁵Meni mu urefu Nayɛl mi zhɛ ma hwaŋ, cɛnjɛ tu urefu ata ti zhɛ to hwotono hwɛɛ.

⁶Olomu meni zhɛ o hwotogono hwɛɛ, te eninjidegbe hwɛɛ, ta ambɛ na unshɛ nu ụpalanụ urefu ata zhɛ a lụmba.

⁷Iyi elele nɛ aa ga bɛrɛ nu ukwoswo urefu ata Nayɛl zhɛ yo hwotono, mpiala mi zhɛ mo sugo iŋ.

⁸Ekwuzhi zhɛ no 'nyongo, ɛ zhɛ na twa-u'wo. Shɛkama sha aba, ti igwune ya aba zhɛ ya nama gadaga.

⁹Atwa na a zaga tizhe, zhɛ a nda ụbaụta gbii, anɛ tugwuno[67] ti ilinɛn ti biye, zhɛ a nama ni i'ɛlɛ yo hondo.

¹⁰Anɛ tugwuno hwɛɛ, te egwoni ugondu i'ɛlɛ zhɛ a nama gadaga, ɛ zhɛ a 'yaga tuzuga na shɛmɛ sha aba.

¹¹A'yagajɛ atwa Zayon lagwụmanjɛ! Atwa na incɛ uhwuri atwa vwɛ hwɛɛ ni Ijipti peni atwa vwɛ ahaŋsa ụlagwụ! Gana naa kwuŋ po ee mbishi agwuma Ijipti maa aba shɛ atwa ti'inta, a na shɛ eseshi-iyi shɛgwuma sha ala shɛ cala shi mepi shi iyi tebiyee?

¹²Gabụ agwuma Ijipti, cee epeni ata bụ shihaŋsa shɛ ti'inta namɛɛ? Ge e bi mbishi iyi nɛ AGWANGWAMA na Hwuri Kpaaŋ imanganjɛ iwɛ Ijipti.

¹³A'yagajɛ Zayon, na a na Mɛfis[68] lagwụmanjɛ! A ga shɛ a 'yagaga udenji ata, ama a inzhɛnjɛ aŋ.

¹⁴AGWANGWAMA njɛ aŋ maa ga shihaŋsa sha aba shi sukwutogwu. Iwɛbɛ po atwa Ijipti a nda iyi nɛ teni shi cɛŋ, aa nda gologolo gana atwa na mayaga ma ngba, a na kaa sherimeni a 'waŋ na tugba tu na ee gbeji.

¹⁵I zasa kaa iyi elele atwa Ijipti eri a nda o; tu uhiuhiu, tu utwenyi, tu ubaga kwo kaa bininjidegbe.

¹⁶Aka zhɛ o to ta atwa Ijipti zhɛ a sha gana eyikwo. Inyɛsɛ zhɛ na sha aŋ, ɛ zhɛ na zhɛgɛdaga, iwɛnɛ ta a kwụbɛ ta AGWANGWAMA mama 'imɛ maa pana aŋ ulwapɛ.

¹⁷Atwa Ijipti zhɛ na nda inyɛsɛ cɛnjɛ tu Juda; bụtụ be elele ee teyingeni iwɛ Juda, inyɛsɛ zhɛ ya sha bụ, iwɛ iyi nɛ AGWANGWAMA na Hwuri Kpaaŋ imanganjɛ maa nda atwa Ijipti.

¹⁸Aka ata ci hwuŋ, ashɛpwụ a'wụtụ a'wụtụ Ijipti ɛ tɛ zhɛ na duma Rikenan, na ashɛpwụ aba. Atwa ata zhɛ a ta tuwa ni izeci ya AGWANGWAMA na Hwuri Kpaaŋ maa ɛ zhɛ a 'wa bụ. Ɛ zhɛ a pa ụshɛpwụ ata uko izeci maa, Ụshɛpwụ uwaŋna.[69]

¹⁹Na aka ata, utukwu-ụrụpɛ wa AGWANGWAMA zhɛ wo shikono na cɛnjɛ ti Ijipti keeni utukpa ata utayɛ ee shikicingeni bu no ogwungwu cɛnjɛ ti Ijipti.

²⁰Ijɛ zhɛ ya sha ụtarụtụ keeni useyida u tunama ta AGWANGWAMA na Hwuri Kpaaŋ na cɛnjɛ ti Ijipti. Yaa shɛ aa nda atwa ata umungwuta apata, aa suyanɛ AGWANGWAMA maa mbiyono aŋ, bi zhɛ ba tumwanɛ bileleji bu ko maa lashaga aŋ.

²¹AGWANGWAMA zhɛ mama bacɛnganɛ atwa Ijipti, nazhɛ ɛɛ zhɛ a mapa bu maa a na zhɛba bụ, maa a na 'waŋnanɛ bụ iyi ụrụpɛ keeni apwaŋ. Ɛ zhɛ o shilogono bu onu ta 'yajɛ ikɛnyi, ɛɛ zhɛ kaa na nda iyi nɛ ee shiri-unu ibɛ.

²²AGWANGWAMA zhɛ a pana atwa Ijipti ulwapɛ, na aka ata bi zhɛ ba nɛnga aŋ. Ɛ zhɛ a zhajɛ pu bwa, bɛɛ zhɛ kaa ba hwuga ilipwɛ ya aba, nazhɛ bɛɛ zhɛ ba nɛnga aŋ.

²³Aka ata ci hwuŋ, uhwaŋna tukpotoo zhɛ wa namana atwa Ijipti na atwa Siria. Atwa cɛnjɛ ta ata zhɛ no momo zhogogonu ụkafwụ, edenji ata eyebi zhɛ na zhɛba Agwatana urubwo uko.

²⁴Aka ata ci hwuŋ, atwa Isrɛl zhɛ o togwu na atwa Ijipti ta atwa Siria, edenji ata a tatụ zhɛ a sha uwebiye ya atwa unyizo hwɛɛ.

²⁵AGWANGWAMA na Hwuri Kpaaŋ zhɛ a pana aŋ uwebiye, bɛ hiɛŋ, Ahiɛba atwa mi Ijipti, ahiɛba atwa Siria a na Ngaa njɛ ni i'ɛlɛ mi; ahiɛba atwa Isrɛl a na shɛ atwa mi na Ngee teri; N zhɛ ma hi pana uwebiye.