Read bassa AYIZAYA 23 Bible Online

AYIZAYA 23 - bassa bible

AYIZAYA 23

¹Utumwa na aa tumwananɛ Taya na, ɛ hiɛŋ: Oo ahiɛba eheŋteni ihɛŋtu Tashish, zwono ma nu u'wo gboo nụ ụngwụ hiŋ tụhwụga, maa hi beni ni itekwu! Iwɛnɛ po akpata ata ihwɛ hiŋ ga namɛ nu Taya njɛ ufwu, to shimwono sha aba hwɛɛ, to ofwo ata ɛɛ gɛ zɛtɛ ihɛŋtu ya aba hwuŋzwotongwu. Hi zhɛ hia hwuga unabarɛ ata aka na ti ihɛŋtu hiŋ banɛ ni Saipros.[72] Yee jiye.

²Oo ahiɛba atwa na patanɛ nụ ụdakwụ urefu, nama ma saiiŋ; oo ahiɛba ahinya Saidụn, na atwa na urungo nu urefu njɛ azhɛgba.

³Ne meni ma ata mụ 'wụtụ ibɛ po izɛgwu iyi nɛ namɛ nụ ụpalanụ Shaiho banɛ, iyi nɛ kaa ɛɛ jwɛ nu Urefu Nayɛl, ni ibɛ atwa Taya o gwushigo ukwuribi wa aba. Ibɛ po waa shɛ ya udukwo edenji.

⁴Oo gabụ Saidụn, ge ezuye ubu shɛ! Iwɛnɛ po itekwu dumwa iwɛ, ikepi itekwu hiɛŋ, M meci shi la miaụŋ me elele o. N waŋnɛcɛnjɛ shɛ la du kaa okwo miaụŋ-me-eyi kwo kaa mu na mo o.

⁵Okwo atwa Ijipti, ɛ zhɛ a zhɛgɛdana, ya dama aŋ aka na ta a hwụjɛ maa a njɛ Taya ufwu.

⁶Oo ahiɛba atwa ụdakwụ urefu, zwono ma nu u'wo gboo, nụ ụngwụ hiŋ tụhwụga! Gozhigo ma hi keshi Tashish!

⁷Ụshɛpwụ gana na suu atwa Taya a ndana unyasa, ugata ee jwe la cala cala? Ụshɛpwụ gana na maa atwa na namɛ la taa dụlụ kɛshɛ la urefu maa e jwe maa tuba a mama 'yaga?

⁸Gaaba kwuŋ imanganjɛ maa nda Taya ata beni la urishi na adara ebiye, unaa na ahinya ubwa a shɛ atwa na aa mụnɛ la ụjɛrụma nu unyizo hwɛ hwɛɛ ijɛɛ?

⁹AGWANGWAMA na Hwuri Kpaaŋ ubwa imanganjɛ iŋ. Bu imanganjɛ iŋ maa gɛ ishɛkɛ ya aba nɛ aa duma iwɛ iyi nɛ aa njɛ hwuwowu, keeni maa zucinje atwa aba ụjɛrụma.

¹⁰Oo ahiɛba atwa Tashish[73] na fwunga ma na cɛnjɛ ti hiŋ gana Urefu Nayɛl, ofwo na maa hi nɛ zɛtɛ ihɛŋtu hiŋ zha shɛ a nama ya o.

¹¹AGWANGWAMA heŋpi u'ala ubwa boo powo urefu, ibɛ po bee lesheji cɛnjɛ tu ufwugwo. Bee peni-unu maa ge bweji ikepi ɛtɛ Fonikia ikɛnyi.

¹²Gabụ ụshɛpwụ Saidụn, unyasa ata bu hwuwowu, a nda atwa bụ umungwuta, okwo ee gezhiji ee zhe Saipros, a zha shɛ a banangana waa kaa o.

¹³Shɛ atwa Siria o, ama atwa Babulon[74] aba leneni isundɛ ye ehilo maa i leshiji Taya. Atwa Babulon aba mo shɛshɛkpa sha ata maa e lesheji ụshɛpwụ ata, ibɛ po ee hwuŋzetenji ijilɛni ya atwa Taya, aa njɛ ụshɛpwụ ata osombo.

¹⁴Oo ahiɛba eheŋteni ihɛŋtu itekwu, zwono ma nu u'wo gboo, iwɛ tugwumana ti hiŋ; bana ma nu urefu! A nduwa ụshɛpwụ ebe ikepi ibwɛ ga 'yajɛ ikɛnyi ehi go to aba ufwu.

¹⁵Aka zhɛ o to ti iwɛ Taya zhɛ yo 'wo atwa isɛbwɛ shiywa dupu-nu-woshi, ibɛ shɛ shiywa shɛ na agwuma shɛ shɛ a ya uraiŋ. Yaa shɛ shiywa shɛ ata shi keshici hwuŋ, Taya zhɛ wa sha gana buwɛle na jwɛ azunga, bɛɛ hiɛŋ:

¹⁶Shapa aduma bụ, bana urungo nụ ụshɛpwụ, gabụ buwɛle na isɛbwɛ bu 'wi atwa. Na 'nyama aduma bụ, na zunga shɛzunga shi ofwugwo sasana iwɛ maa etwenyi teyinje iwɛ bụ sasana.

¹⁷Yaa shɛ shiywa sha ata dupu-nu-woshi shɛ ulwa hwuŋ, AGWANGWAMA zhɛ o lono maa ga Taya gwuleneni na tihinya ta ala tu bwa, nazhɛ cɛnjɛ cɛnjɛ-ta-tugwama tu unyizo hwɛɛ ti zhɛ tu na ndaanana bụ ụgwụ maa bu na ndaanana tuwɛle tu bwa.

¹⁸Ukwuribi we elele bee leshiji na tihinya ta ata tu bwa, ɛ zhɛ o sugo uŋ a pana AGWANGWAMA. Shɛ ubwa zhɛ na swaka uŋ, ama atwa na a zhɛba AGWANGWAMA[75] aba zhɛ o sugo uŋ a sa iyimɛyɛ keeni tugwuno tu tu'urugono te elele tu na aa jala.